شبیر بلوچ ءِ زورانسری آوار جنی ءَ پنچ سال سرجم، کراچی ءَ زھرشانی

دوشمبے ءِ روچ ءَ سندھ ءِ بنجاھی شھر کراچی ءِ پریس کلب ءِ دیم ءَ نودربر رھشون شبیر بلوچ ءِ زورانسری آوار جنی ءَ پنچ سال سرجم بوگ ءَ زھرشانی کنگ بوتگ –

بیگواھیں شبیر بلوچ ءِ گوھار سیما بلوچ ءِ گوشگ ءِ پد ءَ چُک ءُ زالبول ورنایاں مزنیں کساسے ءَ بیگواھیں مردمانی اکس زرتگ ءُ زھرشانی ءَ بھر زرتگ – وھدیکہ وائس فار بلوچ مسنگ پرسنز ءُ بلوچ یکجھتی کمیٹی ءَ زھرشانی ءِ پلامرزی کتگ –

زھرشانی ءَ تران کنان ءَ شبیر بلوچ ءِ گوھار سیما بلوچ ءِ گوشگ ات کہ گوستگیں پنچ سالاں وتی برات ءِ یل کنائینگ ءِ ھاتر ءَ زھرشانی کنگایاں – کدی کراچی ءُ کدی شال پریس کلب ءِ دیم ءَ ما پریات کنگائیں بلے مارا انساپ دیگ نہ بیت اِنت –

سیما بلوچ ءِ گوشگ ات کہ وھدیکہ من زھرشانی ءَ پد گِس ءَ واتر باں گڑا منی مات ءُ شبیر ءِ لوگی من ءَ چہ شبیر ءِ وش ءُ سلامتی ءِ ھال پُرسی ءَ کن اَنت – وھدیکہ کہ ما اسلامباد ءَ شُتگیں پاکستان ءِ سروزیر ءَ گوں دچار کپتگ انت گڑا آئی ءَ گوں ما کول کتگ کہ مئے دوستیگیں مردماں یل کنائینیت، بلے مروچی آ کول ءُ کرار بس لبز بوتگ انت آھانی سر ءَ ھچ گامگیج زورگ نہ بوتگ –

آئی ءَ چہ پاکستان ءِ سروزیر ءَ لوٹ کتگ گوشتگ کہ آ وتی کول ءِ سر ءَ بہ اوشتیت ءُ مئے دوستگیں مردماں یل بکنائینیت –

آئی ءِ گوشگ ات کہ شبیر بلوچ ءَ بگیر مئے وشھالی شُتگ – آئی ءَ چہ انسانی ھکانی ادارھاں چہ لوٹ کتگ کہ منی برات ءِ یل کنائینگ ءَ وتی کِرد ءَ پیلو بہ کن انت –

زھرشانی ءَ بیگواھیں ڈاکٹر دین محمد بلوچ ءِ جنک سمی دین بلوچ، بیگواھیں انسانی ھکانی باسک راشد حسین بلوچ ءِ مات، بیگواھیں محمد آصف ءُ رشید ءِ کھول ءَ ھوار دگہ بیگواھیں مردمانی کھولاں بھر زرتگ –
زانگ بہ بیت بلوچ نودربر گل آزات ءِ گوستگیں انفارمیشن سیکرٹری شبیر بلوچ چار اکتوبر سال دوھزار ءُ شانزدہ ءَ پاکستانی پوج ءِ کارمنداں کیچ ءِ دمگ گورکوپ ءَ زورانسری آوارجنی ءَ پد بیگواہ کتگ –

دومی نیمگ ءَ بی ایس او آزات ءِ نیمگ ءَ چاگردی ترامجاہ ٹویٹر ءَ یک کمپئین ءِ برجم دارگ بوتگ کہ سوشل میڈیا ایکٹوسٹس، نودربر گل ءُ بلوچ نیشنل مومنٹ ءَ ھوار دگہ انسانی ھکانی باسکاں بھر زرتگ ءُ بلوچستان ءَ زورانسری آوار جنی ءُ شبیر بلوچ ءِ درگت ءَ ٹویٹ کرتگ – میان استمانی انسانی ھکانی ادارھاں چہ بیگواھیں مردمانی یل کنائینگ ءَ وتی کرد ءُ بلوچستان ءَ انسانی ھکانی پھازگے ھاتر ءَ توار چست کنگ ءِ لوٹ کتگ –