شئیر: نَدر پہ شیرزال ھانی بلوچ ءِ نام ءَ
آبؔد رھشون
دی بلوچستان پوسٹ
کریؔمہ بانُک ءِ اَھد ءِ اَبد ھمراہ
نہ بیت جُھد ءُ تئی رُژن ءِ چراگ بیگواہ
اگاں روکے اے راج ءِ دیدگاں جلّ ایت
اگاں ارواہ ءُ ساھے ملپداں ملّ ایت
شپ ءِ سیاھی گوں روچ ءِ بْرانزے ءَ ھلّ ایت
مدام درپش ایت تئی پگر ءِ گلیں بانگواہ
کریؔمہ بانک ءِ اھد ءِ اَبد ھمراہ
ھمک بازار کہ تُنّیگ ءُ شُدی ڈیھ ءِ
چہ ھون ءَ پُلّ میتاپاں رُدیت ڈیھ ءِ
سِدیت پُلّے بَدن مسکیں کُدیت ڈیھ ءِ
رُدان اِنت تئی گُلیں زانت ءِ گِھیں پیژگاہ
کریؔمہ بانُک ءِ اَھد ءِ اَبد ھمراہ
ھمے آشوب بلان اِنت روت گوں آساں گوں
ءُ جنگ کوھاں بْرھدار اِنت براساں گوں
بلوچ ءِ ھکّ ءِ بیرک گُھار ءُ ماساں گوں
نمیران ئے بلوچ راج ءِ دلی دوزواہ
کریؔمہ بانُک ءِ اَھد ءِ اَبد ھمراہ
لگور اَنت آ کہ ٹاکور ءُ شگانی بنت
شھیدیں ھون رُدنت ءُ چو کہ ھانؔی بنت
اے سُھریں تاک پہ باندات ءَ نشانی بنت
گواہ ءُ شاھد اِنت پاکیں منی اللؔہ
کریؔمہ بانُک ءِ اَھد ءِ اَبد ھمراہ
گُلیں ھاؔنی تئی ھون ءُ زمین ءِ ھاک
جھان ءَ پہ بلوچ ءِ دپتر ءِ بنت تاک
مڑاھاں گوں شُت ئے ھست اِنت تئی گویاک
بہ مار رھشؔون بلوچ مار اَنت کہ درد ءُ آہ
کریؔمہ بانُک ءِ اَھد ءِ اَبد ھمراہ