تاج بی بی ءِ کوش: شال ءَ زھرشانی

بلوچ یکجھتی کمیٹی ءِ نیمگ ءَ مروچی دو شمبے ءِ روچ ءَ بلوچستان ءِ بنجاھی شھر شال ءِ پریس کلب ءِ دیم ءَ تربت ءَ پوج ءِ دست ءَ کُشگ بوتگیں تاج بی بی ءِ کوش ءِ بگیری ءَ زھرشانی کنگ بوتگ – زھرشانی ءَ سیاسی ءُ چاگردی باسکاں ھوار نودربر گل ءُ دگہ تک ءُ پھناتاں سیادی داروکیں رھشون ءُ باسکاں بھرزرتگ ءُ تاج بی بی کوش ءِ بگیری ءَ توار چست کتگ –

زھرشانی کنوکاں تاج بی بی کوش ءِ بگیری ءَ نارہ جتگ ءُ بلوچستان ءَ ٹارگٹ کلنگ ءِ بگیری ءَ نبشتھیں کارڈ دست ءَ بوتگ کہ آھانی سر ءَ بازیں نارہ ءِ نبشتہ بوتگ اَنت –

زھرشانی ءَ تران کنان ءَ آھانی گوشگ ات کہ بلوچستان ءِ تہ ءَ دو دھکاں زلم ءُ زوراکی ءِ درچ یکشل ءَ برجاہ انت بلے ھستیں وھد ءَ بلوچ ءِ دود ءُ دودمان لگتمال بوگ ءُ زالبول جنگ بوگ ءَ انت – بلوچ راجدپتر اے گپ ءِ گواہ انت ھر ھما وھد ءَ بلوچ زالبولاں وتی گُشان پچ کُتگ گڑا مزن مزنیں جنگ ھلاس کنگ بوتگ انت بلے بد بھتی ءَ بلوچستان ءِ تہ ءَ پوج بلوچ ءِ دودانی لگتمالی وتی پرز لیکیت –

بلوچستان ءِ تہ ءَ ھمک روچ بلوچ زالبولانی کم شرپی برجاہ انت بلوچ چاگرد ءِ تہ ءَ اے وڑیں کتگاری ءِ کس ءَ گمان نہ کرتگ بلے نوں ھمک روچ اے وڑ بوگ َ انت بلے ھاکم ءُ سرکاراں وتی چم بند کرتگ انت ءُ اے زوراکیاں ھچ گوشگ ءَ نہ انت ھمے سوب ءَ بلوچستان ءِ تہ ءَ اے وڑیں زوراکیانی تہ ءَ گیشی آیگ انت اگان اے درچ ھمے وڑ برجاہ بوت دارگ نبوت گڑا دیمتر ءَ انسان ھلاس بوان بنت –

آھانی گوشگ ات کہ تاج بی بی ءَ کجام گناہ کتگ بیتگ کہ اے وڑ تیرباران کنگ ءُ جنگ بوتگ تاج بی بی یک زالبولے بوتگ کہ جنگل ءَ شتگ دار ءِ چنگ ءَ کہ وتی چکاں لاپ بہ دنت بلے آ بے دردی جنگ ءُ کُشگ بوتگ ءُ آھاں جست کنوک ھم نیست –

پوج ءَ بلوچستان ءِ تہ ءَ گنوکیں کارمند دیم داتگ کہ ھمک روچ بلوچستان ءِ تہ ءَ وتی رستری ءَ پیش دار انت –

آھانی گوشگ ات کہ زالبولانی نشانگ کنگ اولی رند نہ انت بلکیں بلوچستان ءِ ھمک ھند ءُ دمگاں بازیں وھداں زالبول زلم ءُ زوراکی نشانگ کنگ بوگ ءَ انت ءُ پوج زالبولانی گوم ءَ دگہ بازیں کتگکاریاں ھم ھوار انت کہ بلوچ ءِ دود ربیدگ ءُ کوڈ اف کنڈیکٹ سر ءَ اُرش اِنت بلے اے درچ یکشل ءَ برجاہ انت آئی ءِ تہ ءَ ھچ وڑیں کمی آیگ ءَ نہ انت –

تاج بی بی ءِ کوش اے پدر کنت کہ بلوچستان ءَ پوج ءَ مھار گُٹ دیگ ءُ یل کنگ بوتگ ھر کس ءَ بلوٹ جنت ءُ چگل دنت پرچاکہ آئی ءَ جُست کنوک نیست آئی ءَ انساپ ءِ تھتگ ءِ سر ءَ آرگ ءُ اُشتارینگ ءِ ھمت ءُ تاکت کسے ءِ تہ ءَ نیست –

زھرشانی کنوکانی گوشگ ات کہ بلوچستان ءَ ھر نیمگ ءَ زلم زوراکی بوگ ءَ انت بلے بدکسمتی ءَ بلوچستان ءِ تہ ءَ اے بؤکیں زوراکیانی سر ءَ سرجمیں پاکستان ھاموش انت کہ پدردی گپ ئِے ھر ھما وھد ءَ بلوچستان ءِ مال ءُ مڈیانی گپ کہ کیت بلوچستان ءِ مڈیانی گپ بیت گڑا پاکستان ءِ ھاکم درساں دیم ءَ انت پہ اے گوشگ ءِ ھاتر ءَ کہ بلوچستان ءِ مال ءُ مڈیانی سر ریچیں بلے ھر وھد ءَ کہ انسانیت گپ بیت گڑا درست گار بنت چریشی ءَ ھمے پدر بیت کہ پاکستان ءِ مردم ءُ ھاکماں بلوچستان ءِ مردمانی ھاتر ءَ درد دل ءَ نیست آھانی واستا گوں مال ءُ مڈیان اِنر پرچا کہ چریشی ءَ آھانی وتی زند وشھال بیت انت –

آھانی گوشگ ات کہ بلوچستان ءَ ھون ءِ گوازی بوگ ءَ انت سرجمیں مکران مروچی ریاست ءِ زوراکیانی آماچ انت کدی ملک ناز شپ ءِ نیم ءَ کُشگ بیت کدی کلثوم ءُ کدی ھیات مات ءِ چمانی دیم ءَ روچ رھمانی تیرانی آماچ کنگ بیت انت کدی کسان سالیں قدیر پرپٹ ءِ پشت ءَ بندگ بیت ءُ کشان کنگ بیت بلے اے درسیں زلم ءَ زوراکیاں ابید ھاکمانی نیمگ ءَ پوج ءِ بگیری ءَ ھچ وڑیں گامگیج زورگ نہ بیت اِنت – پاکستان ءِ تہ ءَ کانود ءُ رھبندانی بس نام پشت کپتگ بلے راستی ءَ کانود ءُ رھبند ھماھانی دست انت کہ آھانی دست ءَ تاکت انت –

زھرشانی کنوکانی گوشگ ات کہ وھدیکہ ما ھمے گُشیں بلوچ کُشگ بنت نشانگ کنگ بنت گڑا مار ءَ پسو دیگ بیت اِنت کہ شما بس بلوچانی ھاتر ءَ پرچا گپ جن ئِے اد ءَ دگہ راج ھم زوراکیانی آماچ انت آھانی درگت ءَ ھم گپ بہ جن ات بلے ما گوشگ لوٹیں مارا بلوچ پجار ھاتر ءَ جنگ بیت ءُ مار ءَ زوراکیانی آماچ کنگ بیت کہ ما بلوچ انت –