ریاستی زوراکی بلوچ نودربرانی زانت ءُ زانش ءِ سبب بیت اِنت – ڈاکٹر ماہ رنگ بلوچ

بلوچ نودربر رھشسن ڈاکٹر ماہ رنگ بلوچ ءَ بلوچستان ءِ بنجاھی شھر شال ءَ کچھری ءِ دیم ءَ نندانک ءَ نودربرانی زھرشانی ءَ گپ کنان ءَ گُشتگ کہ من ءَ مروچی اد ءَ نشتگیں نودربرانی گندگ ءَ اجکھی ءُ بژنیگ نہ کتگ پرچاکہ سرکار ء بلوچستام ءُ ریاستی رویش ھروھد ءَ بلوچستان ءُ بلوچانی گون ءَ ھمے وڑ بیتگ اَنت –

آئی ءَ گُشتگ کہ ریاست ءِ ھمک ادارہ بلوچستان ءِ مردمانی ھکانی پُلگ ءَ ھوار بیتگ اَنت –

ماہ رنگ بلوچ ءَ گُشتگ کہ کجام ھم ھسو ءَ کجام ھم ریاست ءَ وتی شھریانی گون ءَ اے وڑیں رویش نہ کرتگ نانکہ دنیا ءِ دراھیں بھراں ریاست وتی تھی شھریانی ھکانی واستا جد ءُ جھد کن اَنت بلے آیانی گون ءَ اے وڑی ءَ ھچ ریاست ڈیل نہ کنت ھما رنگ ءَ پاکستان بلوچستان ءِ مھلوک ءِ گون ءَ کنگ ءَ اِنت –

آئی ءَ گُشتگ کہ پاکستان ءِ تہ ءَ بلوچستان درستاں چورو تریں اُستان اِنت کہ آئی ءِ ھچ جست ءُ پرس کنوک نیست اِنت –

آئی ءَ گُشتگ کہ بلوچستان ءِ اُستانی وزیر بلوچستان ءِ ھکانی پھریزگ ءَ سرجم ءَ بے سوب بیتگ، اگاں آ ریاست پُلپھانچی ءُ دگہ جیڑھانی سر ءَ گپ کرت نہ کن اَنت بلے بلوچستان ءَ وانگی جیڑگانی سر ءَ بے تواری ءَ نشتگ اَنت، بلوچستان ءِ نودربر جسمانی ءُ زھنی ناوشی ءِ دیمپان اَنت مروچی اد ءَ ھما زھگ نشتگ اَنت اشانی اُمر ھژدہ سال ءَ گیش نہ اِنت ءُ اے نودربر بلوچستان ءِ ھما دمگاں گوں چہ اتکگ اَنت اود ءَ ریاست ءَ وانگ ءِ واستا ھچی نہ کرتگ بلوچستان ءِ گیشتریں نودربر پرائمری ءَ داں وانگ ءَ سرجم کرت نہ کن اَنف اے بلوچستان ءِ جتا جتائیں جاھاں اتکگ اَنت گچینی ھسابی اَنت کہ بلوچستان ءِ دور دوریں ھنداں اتکگ ءُ اد ءَ وانگ ءِ دربرگ ءَ –

آئی ءَ گُشتگ کہ اے نودربر شال یا شھرانی نیمگ ءَ آرگ ءُ وانگ ءِ نیمگ ءَ ترینگ ءَ سرکار ءُ ریاست ءِ ھچ رنگیں دست مان نیست بلکیں اے وت وتی زور ءَ اتکگ اَنت دانکی راجی بنزہ ءِ واستا مھکمیں کرد پیلو کرت بہ کن اَنت وھدیکہ آ اد ءَ سربنت ءُ وانگی تکاں بندات کن اَنت آیاں میرٹ ءِ پامالی، آیانی چکاس ءِ کرپشن ءُ وھدیکہ آ وتی ھکانی واستا توار چِست کن اَنت زھرشانی ءُ سلوات کن اَنت دانکہ نودربراں ترنیں زھنی ناوشی ءِ آماچ کت بہ کن اَنت-

آئی ءَ گشتگ کہ اے نودربر چندے کلداراں وتی زند ءَ تیلانک دیگ ءَ اَنت وتی وانگ ءَ دیم ءَ برگ ءِ واستا آیانی سر ءَ ریاست اے اُمر ءَ لٹ ءُ کُٹ ءَ بندات کنت آیاں اے کلوہ ءَ دنت کہ اے ریاست ءِ تہ ءَ آیانی آیوکیں باندات اے نودربرانی چی بیت اِنت –

آئی ءَ گُشتگ کہ اے دگ ھروھد ءَ نودربر رھشونانی رھشونی جوڑ بیتگ اے ھما دگ اَنت اد ءَ کمبر چاکر ءَ زمزیل بندگ بیتگ اَنت اے ھما دگ اَنت اد ءَ زاکر مجید ءُ دگہ نودربر رھشوناں چمکوڑینگ بیتگ اَنت کہ آ زانت ءُ زانش ءِ چراگ ءِ راہ ءَ روان بیتگ اَنت –

آئی ءَ گُشتگ کہ بلوچستان اے دمگ ءِ تہ ءَ درستاں مستریں گھگیری زمین اِنت اد ءَ ھر رنگیں نا انساپیانی بگیری ءَ گھگیری کنگ بیت اِنت –

آئی ءَ گُشتگ کہ مھلوک گوش ایت بلوچستان ءِ مھلوک ھر جیڑ ہ ءِ سر ءَ پرچا زھرشانی کن اَنت پرچاکہ بلوچستان ءِ ماتاں وتی زھگاں ناانساپی ءِ ھلاپ ءَ بے تواری ھیل نہ داتگ اَنت وھدیکہ دومی نیمگ ءَ ریاستی زوراکیاں مارا گھگیری ءِ سکین داتگ مروچی اے نودربر اد ءَ چہ پاد کایاں رو اَنت زند ءِ کجام ھم تک ءَ سر بنت بلے آیاں اے وئیل ھرچ وڑ ءَ یاتگیری ءَ کاینت اِنت –

آئی ءَ گُشتگ کہ نودربرانی سر ءَ لَٹ ءُ کُٹ آیانی سر ءَ آنسو گیس ءُ دگہ لَٹ شاپی پولیس ءَ نا بلکیں سرکار ھوار اِنت پرچاکہ پولیس ءَ سرکار ءِ نیمگ ءَ آرڈر رس ایت ھما کنت ھما کہ نودربرانی سر ءَ بیڑ برگ ءِ واستا پولیس ءَ آرڈر دنت –

ڈاکٹر ماہ رنگ بلوچ ءَ گُشتگ کہ اے لھتے نودربر نہ اَنت اے دگ ءِ سر ءَ جاڑیگ اَنت بلکیں آیانی کھولانی باندات ءِ واباں گوں بندوک اَنت –

ریاستی وانگ بلوچستان ءِ نودربرانی ستکی ءَ پرشتگ آ وتی کوپگاں ھمگرنچ اَنت وانگ ءَ دیم ءَ برگ ءُ وتی راج ءِ باندات ءَ جیڑگ ءَ اَنت اے نودربر کجام ھم رنگ ءَ گیر انسان املاں اوشتوک نہ اَنت اشاں وانگ ءِ پیلسہ کرتگ آیاں کس داشت نہ کنت –

بلوچستان ھِ نودربرانی گون ءَ سرکار ءُ سرکاری نمائندگ رویش ھروھد ءَ بژینگ ءُ ایر جنگ اَنف وزیر بیگ ءَ پیسر اے دسھت کن اَنت ءُ دے اَنت کہ بلوچ نسل کُشی ءِ سر ءَ آ بے توار بنت بلکیں اشی ءِ پشتی ءَ ھما رنگیں کرد ءَ پیلو کن ایں سرکاری وزیر وتی ایرجنگی درشان ءِ سلسلگ ءَ ھلاس کنت پرچاکہ آیاں وانگ ءِ واستا ھچ رنگیں کرد پیلو نہ کرتگ بلوچستان ءِ ھمینکس مردماں ونتگ آیاں وتی کِسگ ءَ چہ ونتگ –