چہ دو سالاں بیگواھیں نیاز اھمد یل کنگ بہ بیت اِنت – حوا بلوچ

بلوچستان ءِ دمگ کیچ ءِ ھند تمپ ءِ جھمنندیں حوا بلوچ ءَ چاگردی رسانکجاھاں وتی یک شنگ کرتگیں درشانے ءَ گشتگ کہ منی ناکو نیاز احمد ء کادر بکش یل کنگ بہ بیت اِنت –

آئی ءِ گوشگ اَت کہ نیاز اھمد سَے دگہ مردمانی ھمراھی ءَ پانزدہ اپریل دوھزار ءُ نوزدہ ءَ آئی ءِ لوگ ءَ پاکستانی پوج ءَ دزگیر کنگ ءَ پد بیگواہ کرتگ – آئی ءِ رد ءَ آ دگہ سئیں کس یل بیتگ اَنت بلے منی ناکو انگت ءَ گار اِنت –

آئی ءَ مزن واکاں گوں نیاز اھمد ءِ سلامتی ءِ یل کنگ ءِ دزبندی ءُ انساپ ءِ لوٹ کرتگ –

زانگ بہ بیت بلوچستان ءَ زورانسری آوارجنیانی جیڑہ دو دھکاں برجاہ اِنت، بلوچستان ءَ بیگواھیں مردمانی واستا پرکاریں گل وائس فار بلوچ مسنگ پرسنز ءِ رد ءَ بلوچستان ءَ اے کچ ھزارانی کچ ءَ اِنت ھمے وڑ انسانی ھکانی میان اُستمانی گلاں بلوچستان ءَ زورانسری آوارجنیانی پدری کرتگ اَنت –

بلوچستان ءَ سیاسی ءُ انسانی ھکانی گلانی نیمگ ءَ بلوچستان ءَ زورانسری آوار جنیانی بگیری ءَ زھرشانی کنگ ءُ پیداک اَنت ءُ آیاں آمیدگساں پیش کنگ ءِ لوٹ ءَ کنگ ءَ اَنت –