شال ءَ بیگواھیں مردمانی بنجل ءَ کھولانی تران

پاکستانی پوج ءِ دست ءَ زورانسری آوار جنگ ءُ بیگواہ بوتگیں مردمانی کھولاں وائس فار بلوچ مسنگ پرسنز ءِ بنجل ءَ اتکگ ءُ وتی دوستیگیں مردمانی بیگواھی “پروفارم ” پُر کُتگ ءُ بیگواھیں مردمانی گل وائس فار بلوچ مسنگ پرسنز ءِ گور ءَ سر کتگ انت – گل ءِ “پروفارمہ” ھوار آھاں وتی دوستگیں مردمانی ھاتر ءَ تامری درشان ءِ ھم شنگ کُتگ ءُ لوٹ کُتگ کہ اگاں آھانی مردم کسور وار انت گڑا ملکی کانودانی رِد ءَ آمیدگس ءَ آرگ بہ بنت ءُ سزا دیگ بہ بنت –

ھشت اکتوبر دوھزار ءُ سیزدہ ءَ رئیس کوٹ کراچی ءَ زورانسری آوار جنگ بوتگیں غیاث الدین بلوچ ءِ زھگ ءِ گوشگ ات کہ منی پت ءَ ھشت سال انت کہ بیگواہ انت ھچ ھال ءُ اھوالے نیست، ما لوٹ کناں کہ درسیں بے گناھیں مردمانی ھواری ءَ منی پت یل کنگ بہ بیت – منی پت ءِ کسور چی بیتگ کہ انچوکیں سز ءَ ئِے دیگ بوگ انت – آ بس یک ٹرانسپورٹرے بوتگ آئی ءَ چی ءِ سزا دیگ بوگ انت –

آئی ءِ گوشگ ات کہ منی مات سک نادراہ انت ءُ منی پت ءِ راہ ءَ چارگ انت ما مدامی ءُ ھمک ائید ءَ وتی پت ءِ وداریگ انت – مار ءَ بلوچاں بید چہ گم ءُ سکی ءَ دگہ ھچ نہ رسیت – ما ھر سال ھر ماہ ھمک روچ ھمے ودار ءَ ایں کہ مئے پت کیت بلے آئی ءِ ھچ ھال نیست –

آئی ءِ گوشگ ات کہ کسے ءِ برات، کسے ءِ چک، کسے ءِ پت دراہ بیگواہ انت -ما ھمے لوٹ کنیں کہ مئے پت یل کنگ بہ بیت پرچا کہ منی برات بے روزگار انت مات نادراہ انت مئے زند چوں گوز ایت؟ مئے سر ءَ رھم بہ کن اِت –

آئی ءِ گوشگ ات کہ اے زالم چی بہ زانت کہ وتیگاں چہ سِدگ ءِ درد چی یے؟ ھر مات ءُ پت، زھگ ، لوگی بس ھمے ودار ءَ ایں کہ مئے دوستیگیں مردم کدی کیت – بس ھاوند ءَ چہ دوائیں کہ مئے دوستیگیں مردم زوت بیا انت مار ءَ سر بہ بنت –

نھ ستمبر دوھزار ءُ پانزدہ ءَ ناگ ءَ زورانسری آوار جنگ بوتگیں عبدالغفور ء خدابخش ءِ برات ءَ وائس فار بلوچ مسنگ پرسنز ءِ بنجل ءَ اتکگ ءُ وتی برات ءِ زورانسری آوار جنی ءِ کیس نبشتہ کنائینتگ ءُ وتی تامری درشان ءِ تہ ءَ گوشتگ کہ آئی ءِ برات ناگ رخشان ءَ چہ شپ ءِ ادار دو ءَ وتی ناکوزتکانی گِس ءَ زورانسری آوار جنگ ءُ بیگواہ کنگ بوتگ –

آئی ءِ گوشگ ات کہ منی برات دھکان کارے بوتگ آئی ءَ گوں ھچ وڑیں سیاسی یا دگہ گلاں گوں سیادی نہ بوتگ – اگاں منی برات ءَ گناھے کتگ ءُ آ سزائے ھکدار انت گڑا من چہ سرکار ءَ لوٹ کناں کہ آئی ءَ ملکی آمیدگس ءَ بیار انت ءُ آئی ءِ ھر وڑیں سزا بیت مار ءَ کبول انت –

ھمے وڑ تاج محمد بلوچ ءَ وی بی ایم پی بنجل ءَ اتکگ ءُ وتی زھگ ءِ آوارجنی ءِ کیس نبشتہ کنائینتگ ءُ گوشتگ کہ آئی ءِ زھگ نھ ستمبر دوھزار ءُ پانزدہ ءِ شپ ءَ کلی گراڑی ناگ واشک ءَ زورانسری آوار جنگ ءُ بیگواہ کنگ بوتگ –

آئی ءِ گوشگ ات کہ آئی ءِ زھگ درسیں دمگی مردمانی دیم ءَ پاکستانی پوج ءُ ایف سی ءُ دگہ ملکی ادارھانی کارمنداں زورانسری آوار جتگ گوں وت برتگ – آئی ءِ گوشگ ات کہ آئی ءِ زھگ ءَ ھچ وڑیں گلاں گوں سیادی نہ بوتگ بس وتی گریبی ءَ گوں دلگوش بوتگ –

ھمے وڑ چار اگست دوھزار ءُ شانزدہ ءَ آواران ءِ دمگ سیاہ گزی ءَ پاکستانی پوج ءِ دست ءَ زورانسری آوار جنگ بوتگیں گزی ءِ فیض محمد ءِ زھگ ءَ وتی تامری درشان ءِ تہ ءَ گوشتگ کہ منی پت چہ گِس ءَ پاکستانی پوج ءَ زورانسری آوار جتگ ءُ گوں وت برتگ اگاں منی پت کتکار انت گڑا ملکی کانودانی رِد ءَ وتی آمیدگس ءَ آرگ بہ بیت- آئی ءَ چہ انسانی ھکانی ادارہ ءُ میان استمانی گلاں چہ لوٹ کرتگ کہ آئی پت ءِ یل کنائینگ ءَ وتی کرد ءَ پیلو بہ کن انت –

دو سال ءَ پیش یک جولائی دوھزار ءُ نوزدہ ءَ پنجگور ءَ زورانسری آوار جنگ بوتگیں مند نوکیں کہن ءِ جھمنند اسداللہ ء ناصر علی کسان سالیں زھگ ءِ گوشگ ات منی پت ءَ دو سال انت کہ بندیگ جاھاں بندیگ انت منی پت آجو کنگ بہ بیت من ءَ پہ وتی پت ءَ زھیر کنت ملکی وزیر منی سر ءَ بزگ بہ کن انت ءُ منی پت ءَ یل بکنائین انت –

زانگ بہ بیت ھمے لھتے ھپتگانی تہ ءَ بلوچستان ءَ بازیں گار ءُ بیگواھیں مردم جنگ ءُ کُشگ بیتگ اِت اَنت کہ چریشی ءَ پد بیگواھیں مردمانی کھول ترس آماچ بیت ءُ آیانی گوشگ اِنت کہ باریں مئے بیگواھیں مردمانی ھال چی اِنت –