سالے ءَ پیسر آوار جنگ بوتگیں منی زھگ یل کنگ بہ بیت – عبدالرزاق ءِ مات

ھپت نومبر دوھزار ءُ بیست ءَ مستونگ شنگی دگ ءَ پاکستانی پوج ءِ دست ءَ زورانسری آوار جنگ ءُ بیگواہ بوتگیں عبدالرزاق ء عبدالرشید بنگلزئی دنیگت ءَ یل ءَ کنگ نہ بوتگ –

عبدالرزاق ءِ مات ءَ بیگواھیں مردمانی گل وائس فار بلوچ مسنگ پرسنز ءِ بنجل ءَ شتگ ءُ وتی زھگ ءِ کیس نبشتہ کنائینتگ ءُ گوشتگ کہ سالے ءَ پیش آوار جنگ بوتگیں منی زھگ دنیگت ءَ تاں یل کنگ نہ بوتگ –

آئی ءِ گوشگ ات کہ ناشناسیں مردم دو بگیر نمبریں ٹوڈی گاڑی ءَ سوار بوتگ ءُ اتکگ انت منی چک اش آوار جتگ ءُ بیگواہ کتگ کہ مئے بازار شنگی ءِ درسیں مردماں دیستگ انت –

آئی ءِ گوشگ ات کہ آوار جنی ءِ گواہ ھست انت بلے درست تُرساں کہ ما گواھی دات مارا ھم چست کن اَنت یا تاوان دے اَنت آئی ءَ گوشت کہ ما ھمے واستا ھچ نہ گوش ایں کہ مارا مدامی بیھار دیگ بوتگ – ھمے واستا ما ھچ نہ گوشتگ –