بلوچ یکجھتی کمیٹی ءَ رابعہ بلوچ ءُ محراب پندرانی ءَ چہ درد ءِ درشانی ءِ ھاتر ءَ ڈیڑہ بازی خان ءَ روانک

بلوچ یکجھتی کیمٹی ڈی جی خان ءِ نیمگ ءَ چہ دو ستمبر ءَ ڈیرہ غازی خان ءَ بواٹہ وئیل ءَ اسر کپتگیں رابعہ بلوچ ءُ شال ءَ لَٹ ءُ کُٹاں چہ ءَ کُشگ بوتگیں ورنا محراب پندرانی ءَ چہ درد درشانی ءِ ھاتر ءَ یک رھرشانی ئیں روانکے برجم داشتگ ءُ چریشی ءِ آسر ءَ بازیں کچے ءَ جتاجتائیں ھیال لیکہ ءِ سیاسی داروکیں مردماں بھر زرتگ ءُ اسر کپتگیناں انساپ ءِ دیگ ءِ لوٹ کتگ-

زانگ بہ بیت ھپدہ اگست ءَ بواٹہ فروٹ منرو ءَ ایف سی چیک پوسٹ ءِ نزیک ءَ ناشناسیں مردماں الہی بخش لغاری ءِ لوگ ءَ پترتگ تیرگواری کتگ ءُ کھول ءِ سے مردم کشتگ وھدیکہ سے مردم سک ٹپی کتگ اَنت تیرگواری ءَ یک شیرمچیں نُنُّک رابعہ بلوچ ھم ٹپی بوتگ-

ڈیرہ غازی خان ءَ روانک ءَ ھواریں مردماں گْوشتگ کہ لوگ ءِ نزیک ءَ ایف سی چیک پوسٹ ءِ ساڑی بوگ ءَ ھم اے دردناکیں وئیل بوگ ءَ بازیں جُستے دراھگ ءَ اِنت ءُ تنی وھدی کُشکارانی شوھازگ ءَ ھچ وڑیں جُھد ءِ نہ کنگ کھول ءِ گوم ءَ زُلم اِنت چریشی ءِ بگیری ءَ ھچ وڑ بے توار نہ بہ ئے ایں-

زانگ بہ بیت محراب پندرانی نامداریں ٹرانسپورٹ ءُ سدابھار ٹرانسپورٹ ءِ واھنند ھاجی دولت خان لھڑی ءِ گور ءَ کار ءَ بوتگ-

محراب پندرانی ءِ کھول ءِ رِد ءَ محراب پندارانی سدابھار ٹرانسپورٹ ءِ واجھاں گوں تُرندی ءَ لَٹ ءُ کُٹانی نشانگ کتگ ءُ چریشی ءِ آسر ءَ آ وتی ساہ داتگ اَنت-

کسانیں ورناہ محراب ءِ میڈیکل رپورٹ ءِ رِد ءَ آ آسن ءُ لَٹانی سر ءَ نشانگ کتگ چریشی ءِ آسر ءَ آ مرتگ-

رپورٹ ءِ رِد ءَ محراب پندرانی ءِ سرجمیں جان لَٹانی نشانگ کتگ ءُ سینگ ءِ پھلیگ ھک پرشتگ اَنت-

چریشی ءِ بگیر ءَ شال ، کراچی ءُ اسلام آباد ءَ زھرشانی ءُ روانک کشگ بوتگ-