نبشتانک: بکڑ ، دی کنفوژن
نبشتہ کار: ماھنور بلوچ
دی بلوچستان پوسٹ
اے گپ ءَ ھچ دْروگ نیست اِنت بلکیں یک راست ءُ تچکیں گپے کہ دنیا ءِ تہ ءَ بلوچ یک گُلامیں راجے ءُ گُلامیں راجاں آیانی زُبان ماں وانگجاھاں وانینگ نہ بنت بلکیں دژمن آئی ءَ راجی دود ءُ ربیدگاں ھوار، اول سر آئی ءِ راجی زُبان ءَ تاوان دنت۔ کم کم ءَ زیردستیں راج ءِ زُبان ءِ گار ءُ بیگْوھی ءَ وڑ وڑیں پندل ساز ایت۔ راج ءِ لس مھلوک ءَ کم کم ءَ ردیان ءَ راج ءِ تہ ءَ بکڑ ودی کنت۔ راج ءَ بھر ءُ بانگ کنگ ءِ ھاتر ءَ زَر، لب ءُ لالچ ءِ وڑ وڑیں سِلکاریاں کنائین ایت۔ راجی رھشُوناں وت ماں گْورجیگ کنائین ایت۔ بزاں پہ زیردستیں راج ءِ رَد دیگ ءُ بیگْواھی ءَ ھچ وڑیں بَزّگی یے نیار ایت۔
چوناھا اِے وڑیں بدیں پندل چو آسانی ءَ گِندگ نہ بنت بلے لھتیں زانتکار ءُ راجدوستیں مردم اِے وڑیں پندلاں زوت سرپد ءُ سما کن اَنت ءُ راج ءَ بدیں پندلانی بابت ءَ آگاھی ءُ سرپدی دے اَنت کہ راج نوں تیار بَہ ئے، نوں تیار بَہ ئے کہ رستریں دژمن تئی گاری ءُ بیگْواھی ءِ جُھد ءَ انت۔
وھدے کہ راج ءَ وتی ھلاپ ءَ اے وڑیں پندل ءُ بکڑ پھم اِت اَنت گُڑا راج ءِ تہ ءَ راجی آجوئی ءِ آشوب ودی بنت، دژمن ءِ ھلاپ ءَ گھگری جُنز دیم ءَ کا اَنت۔
اے وَ دنیا ءِ رِد ءُ بند اَنت ءُ دنیا ءِ ھر وڑیں زوراک دستگریں راجانی سر ءَ اِے وڑ زورانسری کن اَنت۔ اگاں ھورت بہ گِند ئے بلوچ راج ھم چہ کرناں اے وڑیں پندل ءُ بکڑانی آماچ اِنت۔ توری بلوچ راج ءِ رھشُونے بہ گْوش ئے یا توری راج ءِ وانِندگے بچار ئے، ھر کس بکڑ ءِ آماچ اِنت، لھتیں لالچی ئیں دمگی کوڑائیں میر ءُ سردار دژمن ءِ لب ءُ لالچ ءَ کور کُتگ اَنت ءُ لھتیں دژمن ءِ بیھار( بلیک میل) ءِ آماچ اَنت۔ اے وڑیں چیزاں بلوچ راج ءِ زانتکاریں راجدوست جْوان سرپد اَنت پمیشکا نبشتانک ءِ تہ ءَ اے وڑیں دمگی میر ءُ نوابانی نام گِرگ شر نہ اِنت کہ ھرکسے ءِ وتی شرپ ءُ اِزت ھست البت ما گوں ھُدا ءَ دُوا ءِ دزبندی کن ایں اَے ھُدا اِے وڑیں کاسگ چٹّاں ھوش بہ دئے۔
البت من وتی نبشتانک ءِ تہ ءَ یک دو بکڑ ءِ بابت ءَ لازُم گپ کن آں کہ ھمے بکڑ راجی زُبان ءِ بابت ءَ اَنت۔ راجی زُبان ءِ دیمروئی زِندگیں راجانی پجّار اِنت ءُ زُبان ءِ وانگ ءُ نبیسّگ ءَ لس مھلوک ءِ تہ ءَ راجدوستی یے ودی بیت پمیشکا ھورت بچار ئے دژمن ءَ گیشتر زیانی ءُ بکڑ زبان ءِ تہ ءَ ودی کُتگ اَنت راج ءَ وتی زُبان ماں وانینگ نہ بیتگ پمیشکا راج وتی زُبان ءِ وانگ ءُ نبیسّگ ءَ ھیل نہ اِنت ماں وانگجاھاں پارسی ءُ ھندی ءِ وانگ ءِ آسر ءَ ھرکسی دپ ءَ دژمن ءِ پوتاری اِنت، ھاس جھل ءِ دوئیں بکڑ اَنت-
1- بلوچی گوں اردو ءِ آباں نبیسّگ نہ بیت۔ ما بلوچی ءَ رومن گوں رومن آباں نبیسّ ایں۔
2 اَربی آبانی کَشگ ما گُناھگار بَہ ایں بزاں اربی گال گوں بلوچی آبانی نبیسّگ ءَ گال بے مانا بنت یا مانا اش بدل بیت! چوناھا اے دوئیں بکڑانی بابت ءَ سک باز باوست بیتگ ءُ بازیں زانتکار ءُ زُبانزانتاں ھم اِے بابت ءَ راج ءَ بے کساس سرپدی داتگ بلے منی دل ءَ لوٹ اِتگ کہ من ھم اِے بکڑانی بابت ءَ چیزے نبشتہ بکنان ءُ راج ءَ سرپدی بہ دے آں۔ اولی بکڑ ءَ ھما ناسرپدیں مردم آماچ اَنت کہ آیاں بلوچی ءِ یک درونتے نہ وانتگ۔ آیاں اِے سرپدی ھم نیست کہ اے آب وَ اردو ءِ پت ءِ نہ اَنت۔ اردو وت ھندی اِنت۔ بلکیں گوں اِے آباں پارسی، دری، پشتو، تاجک، اُزبک، سندھی، کشمیری، پنجابی، کُرد ءُ اَربی ءَ ھوار دنیا ءِ سی ءُ ھشت زُبان نبیسّگ بیت۔ بزاں تئی نزیکیں ھمساھِگ ھمے سْیاھگ ءَ زُور اَنت گُڑا تو گُلامیں راج چون گوں انگریزی آباں بلوچی نبیسّ ئے؟ روایرشُت ءُ رودرآتکی بلوچاں پارسی ءُ ھندی وانینگ بوگ ءَ اَنت چمیشکا ھرکس ھمے سْیاھگ ءَ ھیل انت ھورت بچار ئے اگاں بلوچ راجی وتی راجی زُبان ءَ وتی دزھُورکی ءِ وھد ءَ وت وانگ ءُ نبیسّگ ءِ جُھد بہ کنت گُڑا یک ھپتگے ءِ تہ ءَ وت ھم ھیل کُت کنت انچوشکہ ما دْراہ وتی جھد ردیاں دربُرتگ۔ چی ءَ کہ اِے گُلامی ءَ بلوچ راج ءَ ماں وانگجاھاں ناں بلوچی گوں اربی سْیاھگ ءَ وانینگ بیت ءُ ناں کہ رومن پمیشکا پہ راجی زُبان ءِ وانگ ءُ نبیسّگ ءَ بلوچ اربی سْیاھگ ءَ زوت وت ھیل کُت کنت کہ ایران ءُ پاکستان ءِ زیردستی ءَ بلوچ ءَ پارسی ءُ ھندی وانینگ بوگ ءَ اَنت۔ البت وھدے کہ تو آجو بہ ئے، تئی وتواجھیں راجمستری سرکارے جوڑ بیت گُڑا تئی سرکار یک سوڑگے کنت کہ ما رومن سْیاھگ ءَ زِور ایں یا اربی سّیاھگ ءَ، چی ءَ کہ گلامی ءِ ساھگ ءَ رومن راجی زُبان ءَ دیمرئی نہ دنت۔
دومی بکڑ ءِ بابت ءَ بازیں زِبان زانتکاراں نبیسّ ات ءُ راج سرپد کُت بلے من ھم گْوش آں کہ بے دوزواھیں آباں نبیسّگ ءَ کس گُناھگار نہ بیت اگاں اربی نام ءُ گال بنگالی، روسی چچن، ھندی، سری لنکائی، ترکی رومن ءُ انگریزی آباں نبیسّگ بنت گُڑا ایشانی مانا بدل نہ بنت گُڑا بلوچی ءَ چون مانا اش بدل بنت؟ اگاں ھمے راج ءِ مسلمان گُناھگار نہ بنت گُڑا ما بلوچ چی ءَ گُناھگار بَہ ایں؟ اگاں تو “مھمد، ابدلکادر، کُران ءُ اَلہ” ءَ بنگالی ءُ انگریزی ءَ نبیسّ ئے گُڑا زاناں ایشانی مانا بدل بنت؟ اِنّا مانا بدل نہ بنت اش ءُ نَیکہ کسے گُناھگار بیت ایشانی تھنا نبیسّگ ءِ دْروشم بدل بنت ءُ مانا وَ ھم بُندری اِنت۔
اگاں ھورت بہ چار ئے اے وڑیں بکڑانی ودی کنوک گیشتر دژمن ءِ دپچٹ اَنت ھاس ھما مردم اَنت کہ آیاں دژمن ءِ پوتاری سک دلگوش کُتگ اَنت۔ گُڑا مارا اِے وڑیں سِلیں مردم ڈالچار کنگ لوٹ ایت باید اِنت ما بلوچ راج دژمن ءِ اِے وڑیں پندلاں بزان ایں ءُ اے وڑیں بکڑاں دلگوش مہ کن ایں۔ بلوچ مُدام راج آباد بات اَنت ءُ بلوچ راجی زُبان براھوئی ءُ بلوچی دیمرئی بہ کنات اَنت۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔