بلوچ راجداریں گلاں سردار عطاءاللہ مینگل ءِ بیرانی ءِ پژدر ءَ پدردی درشان اِتگ

بلوچ نیشنل مومنٹ ءِ بنجاھی جارکش ءَ رسانکدراں وتی شنگ کرتگیں درشان ءِ تہ ءَ بلوچ راجدوستیں رھشون سردار عطاء اللہ مینگل ءِ بیرانی ءَ دلپدردی درشان کُرتگ ءُ گْوشتگ کہ سردار عطاء اللہ خان مینگل ءِ سرجمیں زند گوں بلوچ راجی جُھد ءَ بندوک بیتگ- آئی ءِ بیرانی ءَ بلوچ چہ یک نامی ئیں سروکے ءَ زبھر بوت، آئی ءِ جاہ ءَ کس گیپت نہ کنت –

جارکش ءَ گْوشتگ کہ سردار عطاء اللہ مینگل ءَ وتی ھمبل میر غوث بخش بزنجو، نواب خیربخش مری ءُ اکبرخان بگٹی ءِ ھواری ءَ بلوچستان ءَ نوکیں سیاسی چاگرد ئے ءِ بنیاد ایر کُرتگ ءُ بلوچ راج ءِ تہ ءَ راجی وتواجھی، راجی مڈی ءُ راجی ارزیشت ءِ سکین داتگ اَنت – آئی ءَ راج ءَ را اے مارِشت داتگ کہ اگاں پہ سرڈگار ءَ جنگ نہ کُرت گڑا پاکستان چہ ما مئے سرڈگار، ھستی ءُ مڈیاں پُل ایت ءُ مارا پہ مدامی وتی چیردست کنت-

آئی ءَ گْوشتگ کہ سردار ءِ راجکاری ءَ بگیری دارگ بیت بلے آئی ءِ داتگیں دیمونی بیھال کنگ نہ بنت – پاکستان ءَ بلوچ ورنایانی بیگواہ کنگ ءِ بندات چہ ھمائی ءِ ورنائیں بچ ءَ کُرتگ – آئی وتی زھگ ءِ یل بیگ ءِ راہ چار اِت داں چہ کوڈھیں دنیا ءَ شُت بلے داں روچ ءِ مرچی کس ءَ چہ آئی ءِ زُبان ءَ بژن ءِ گپ اِش نہ کُرتگ، آئی ءَ بندیگجاہ ءُ دگہ جنجالانی دیمپانی ھم کُرتگ بلے پاکستانی ھاکمانی دیم ءَ سرجھل نہ کُرتگ بلکیں گوں بلوچی شان ءُ راجدوستی ءِ جوزگ ءَ ھمک زوراک ءِ دیم پہ دیمی کُرتگ-

آئی ءَ گْوشتگ کہ سردار عطاء اللہ مینگل ءَ وتی مزنیں سیاسی زانت ءِ آسر ءَ اے گپ تچک کُرتگ اَت کہ پاکستانی پارلیمانی سیاست ءَ بلوچ راج ھچبر وتی ھستی ءُ سرڈگار ءَ پھریز اِت نہ کنت، پمشکا توانداری ءَ ابید آ چہ پاکستانی پارلیمانی سیاست ءَ یکِر بوت-

گڈسر ءَ بی این ایم ءِ جارکش ءَ گْوشتگ کہ ما سردار عطااللہ خان ءِ پُشپد، سیاسی رندگیر کنوک ءُ باسکاں دلپدردی درشان کنیں ءُ اے ناگیگیں وھد ءَ ما گوں آھاں ھواریں-

بلوچ نودربر گل آزات ءَ وتی شنگ کرتگیں درشان ءِ تہ ءَ راجی رھشون سردار عطا اللہ مینگل دروت ندرکتگ گوشتگ کہ سردار عطاءاللہ مینگل بلوچ راجی زرمبشت بنکی سرھیلیں رھشوناں چہ یکے، کہ آئی ءَ بلوچستان ءِ سر ءَ پاکستان ءِ زورگیری بگیری ءَ مدامی جھد ءِ گام سکین داتگ اَنت، اے جھد ءِ تہ ءَ آئی ءَ گرانتریں ساھتانی دیمپانی کتگ ءُ وتی یک زھگے ءِ شھیدی درد ھم اوپار کتگ بلے وتی سرڈگار ءِ ھچ وڑ ءَ نہ بکشاتگ آئی ءَ پہ سرڈگار ءِ ھاتر ءَ ھچبر کسانیں ءُ پہ وھدی آسائش نوک نہ نداتگ انت ءُ راجدپتر ءِ تہ ءَ وتی جاہ مدام بُرز کتگ -ائی ءَ وتی زند ءِ تہ ءَ ھچبر بلوچ ڈیھ ءِ سودا نہ جتگ ءُ بلوچ راج دپتر ءِ تہ ءَ عطاءاللہ مینگل سردار ءِ ناں بلکیں بلوچ راجی رھشون ءُ بلوچ جُھد ءِ سرھیلیں رھشونانی تہ ءَ ھوار بیت -.

جارکش ءَ گوشتگ کہ راجدپتر ءِ تاکانی تہ ءَ مدامی ھما مردم مان انت کہ آسائش بدل ءَ رھبند ءُ وقتی مپادانی بدل ءَ راجی مپاد ءَ نوکی کار اَنت اے وڑیں ازیمیں کردانی واھنداں راجدپتر ءُ راج ھچبر نہ شموش ات – سردار عطاءاللہ مینگل ھما رھشونانی تہ ءَ ھوار بیت کہ اھاں ھچبر مایوسی درشان نہ کتگ بلکیں بلوچ ورنایاناں مدامی جھد ءِ راہ پیش داشتگ وتی سر ءَ بوتگیں ھچ وڑیں زوراکیاں پد کنز نبوتگ آئی ءِ زند ، جھد، جیڑہ ءُ جنجال بلوچ راج ءِ کُلیں ورنایانی ھاتر ءَ روکیں چراگ ءِ مانند انت راجدپتر ءِ تہ ءَ ھما کردار زندگ مان انت کہ مدامی جھد ءُ سر جھل نہ کنگ ءِ پیسلہ کن انت وھدیکہ سرجھل کنوک ءُ وتی مپادانی ھاتر ءَ زند گوازینوکاں راجدپتر ءِ تہ ءَ ھچ وڑیں ھیسیت نیست –

جارکش ءَ گڈسر ءَ سردار عطاءاللہ مینگل دروت ندرکتگ ءُ بلوچ راج ءِ ورنایاں چہ لوٹ کتگ کہ آ سردار ءِ گپانی سر ءَ بہ اوشت انت راجی جھدے تہ ءَ ھوار بہ بنت ءُ راجی جھد ءَ مھکم بہ کن انت نوں راج ءِ پرز انت کہ راجی جھد ءَ سوبمندی نیمگ ءَ بہ بر انت اے وڑیں کلانیں کردانی واھنداں مدامی زندگ بہ دار انت بلوچ راجی راجدپتر ءِ ھکئیں وارس ھمیش انت –

ھمے وڑ بلوچ ریپبلکن پارٹی ءِ بنجاھی جارکش شیر محمد بگٹی ءَ وتی شنگ کرتگیں درشان ءِ بزرگ راجدوستیں رھشون سردار عطاءاللہ مینگل بیرانی ءَ دلپدردی درشانتگ گوشتگ کہ سردار عطاء اللہ مینگل ءِ بیرانی ءَ بلوچستان چہ یک نہ تُرس تمرد ءُ راستیگیں رھشون ءَ زبھر بوتگ –

آئی ءِ گوشگ ات کہ سردار عطاءاللہ مینگل بلوچستان ءِ ھاتر ءَ جھد ءُ دیمونیانی راجدپتر ءَ مدامی زندگ مانیت ءُ آئی ءِ داتگیں درونت راج ءُ آوکیں پدریچ ءِ رھشونی ءَ کن انت –

جارکش ءَ گوشتگ کہ بلوچ ریپبلکن پارٹی سردار عطاءاللہ مینگل ءِ بلوچ سرڈگار ھاتر ءِ جُھد ءَ دروت ندرکنت ءُ اے کول ءَ کنت کہ ما وتی بزرگانی داتگیں درونتانی سر ءَ امل کنیں ءُ وتی جھد ءَ برجاہ داریں –