شال ءَ پوج ءَ دو ورناہ زورانسری آوار جتگ اَنت

بلوچستان ءِ جتا جتائیں دمگاں زورانسری آوار جنیامی رِد یکشل ءَ برجاہ انت – گوستگیں بیست ءُ چار ادارانی میان ءَ چار مردمانی زورانسری آوار جنی ءِ ھال اتکگ اَنت –

بلوچستان ءِ بنجاھی شھر شال ءَ گوستگیں شپ ءَ پاکستانی پوج ءَ گِسانی سر ءَ بیڑ برتگ فیاض بلوچ ء حاجی محمد آعظم سرپرہ جھمنند جیل روڈ ھدہ ءُ جاوید شمس ء شمس الحق سرپرہ جھمنند کیچی بیگ زورانسری آوار جتگ ءُ گوں وت برتگ انت تنی وھدی آھانی ھچ وڑیں ھال نیست –

زانگ بہ بیت انوگیں سی ٹی ڈی نیمگ ءَ دروگیں میڑ جنگ بوگ ءَ چہ بیگواھیں مردمانی کھولانی دلاں تُرس ءِ تہ ءَ گیشی اتکگ کہ آھانی دوستگیں مردم دروگیں میڑ ءِ نام ءَ جنگ بنت –

دومی نیمگ وائس فار بلوچ مسنگ پرسنز ءُ بلوچ ایکٹوسٹسانی نیمگ ءَ چہ بیگواھیں مردمانی کھولاں چہ لوٹ کنگ بوتگ کہ آ بیگواھیں مردمانی کیس ءَ گل ءِ کر ءَ سر بہ کن انت تانکہ آھانی کیس کانودی دیم ءَ بہ روت –