پوج ءِ دست ءَ یک مردمے بیگواہ، یکے یلو بیتگ

پاکستانی پوج ءَ بلوچستان ءِ دمگ پنجگور ءَ دو روچ پیسر یک مردمے دزگیر کنگ ءَ پد بیگواہ کرتگ، ھمے وڑ دوازدہ اگست ءَ بیگواہ بیتگیں ورنا یلو کنگ بیتگ –

گیشیں ھالانی رد ءَ دو روچ پیسر پاکستانی پوج ءَ پنجگور ءِ دمگ کیلکور ءَ یک مردمے دزگیر کنگ ءَ پد بیگواہ کرتگ کہ آئی ءِ پجار حکیم ء غلام مھمد ءِ نام ءَ زانگ بیتگ –

دمگی مردماں دی بلوچستان پوسٹ ءَ گوں گپ کنان ءَ گُشتگ کہ بیگواہ بیتگیں مردم پاکستانی پوج ءَ کیلکور ءِ دمگ گڈگی زراگو ءَ آوار جتگ ءُ گوں وت برتگ چریشی ءَ پد آئی ءِ بارو ءَ ھچ ھال نیست اِنت –

دمگی مردمانی رد ءَ دو سال ءَ پیسر پوج ءَ حکیم گپتگ ءُ برتگ ءُ یک سالے ءَ زندانی کرتگ ءُ چریشی ءَ پد یلو بیتگ بلے گوستگیں دو روچاں دوبر گرگ بیتگ –

زانگ بہ بیت بلوچستان ءَ بیگواھیانی درچ یکشل ءَ برجاہ اَنت –

ھمے وڑ ھالانی تہ ءَ گُشگ بیتگ کہ پاکستانی پوج ءِ دست ءَ دوازدہ اگست ءَ دشتی بازار ءَ آوار جنگ بیتگیں اخلاق ء پیر بکش یل بیتگ ءُ وتی لوگ ءَ سر بیتگ –