سی ٹی ڈی ءِ دروگیں جنگ: دگہ دو کسانی پجار بیتگ اَنت

سی ٹی ڈی ءِ دروگیں دیم پہ دیمی جنگ ءَ بیران بیتگیں دو کسانی پجار بیگواھیں مردمانی بیتگ اَنت کہ بازیں سالاں پاکستانی لشکر ءِ زنداناں بندیگ بیتگ اَنت –

بیست ءُ شش اگست ءَ سی ٹی ڈی ءَ ٹاہ داتگ اَت کہ آئی ءَ بلوچستان ءِ دمگ لورالائی ءَ یک جنگے ءِ میان ءَ ھپت مردم کُشتگ اَنت، سی ٹی ڈی ءَ ٹاہ داتگ اَت کہ اے مردمانی سیادی بلوچ سلاہ بندیں گل بلوچستان لبریشن فرنٹ ءَ اِنت –

اے دیم پہ دیمی ءَ جنگ بیتگیں دو مردمانی پجار بیگواھیں مردمانی بیتگ اَنت کہ بازیں سالاں پاکستانی پوج ءَ دزگیر کرتگ ءُ برتگ اَنت –

کُشگ بیتگیں مردمانی تہ ءَ دو کسانی پجار عبدالغنی ءُ صدام ءِ ناماں زانگ بیتگ اَنت –

ھردوکیں مردمانی کھولاں اے گپ ءِ راستی پدر کرتگ ءُ گُشتگ کہ آیاں لیویز ءِ واکداراں پجار کاڈ ءَ پاسپوڑٹانی اکس دیم داتگ اَنت -ھردوکانی کھولاں لاشانی پجار کتگ اَنت –

زانگ بہ بیت غنی بلوچ بیست اکتوبر دوزھزار ءُ ھبدہ ءَ پسنی ءِ زیروپوائنٹ ءَ پاکستانی پوج ءَ دزگیر کرتگ ءُ ھما وھد ءَ بیگواہ کتگ کہ آ وتی مات ءِ الاج ےخ کراچی ءَ واتر آیگ ءَ بیتگ –

کُشگ بیتگیں صدام بیست ءُ چار اپریل دوھزار ءُ ھژدہ ءَ پاکستانی پوج ءُ چیریں ادارھانی کارمنداں کراچی ءِ دمگ ملیر ءَ آوار جتگ ءُ برتگ –

گوستگیں لھتے وھداں سی ٹی ڈی یکشل ءَ دیم پہ دیمی ٹاھاں دیگ اِنت ءُ پد ءَ اے گپ دروگ بیگ ءَ اِنت ءُ ھمود ءَ اے مردمانی نام پیسر ءَ بیگواھیں مردمانی تہ ءَ ھوار اَنت –

اے درگت ءَ بلوچستان ءَ سیادی داروکیں انسانی ھکانی باسک نوید احمد بلوچ ءَ دی بلوچستان پوسٹ ءَ گوں گپ کنان ءَ گُشتگ کہ اے ھما چِست کن ءُ بہ جن ءُ چگل دیگ ءِ پالیسی اَنت بلے کار ءُ رھبند نوکین اَنت پیسر ءَ مردم کُشگ ءُ شپ ءَ لاش چگل دیگ بیتگ اَنت نِی دیم پہ دیمی جنگ ءِ نام دیگ بیگ ءَ اَنت –

زانگ بہ بیت چریشاں پیسر سی ٹی ڈی ءِ نیمگ ءَ اے وڑیں ٹاہ دیگ بیتگ اَنت ءُ پد ءَ اے دروگ گوشگ بیتگ اَنت ءَ کہ پیسر ءَ دزگیر کرتگیں مردم بیگواھی ءَ پد سی ٹی ڈی ءَ دیم پہ دیمی جنگ ءِ نام داتگ ءُ کُشتگ اَنت –

آئی ءَ گُشتگ کہ گوست ءِ لھتے وھداں ھمینکس مردم سی ٹی ڈی ءَ کُشتگ اَنت آ درست ھما اَنت کہ آیانی کھول دیم ءَ نیاینت آیانی یل کنگ ءِ واستا توار چِست نہ کن اَنت آ ھمے ترس ءَ بے توار بنت کہ آیانی توار ءِ پژدر ءَ آیانی مردماں گیش تاوان مہ دنت ھمے نپ ءِ سر ءَ پورسز آیاں کُشگ اِنت –

آئی ءَ دزبندی کتگ کہ ھمینکس مردم بیگواہ اِنت آیانی کھول دیم ءَ بیاینت اے وڑ ءَ بے توار بیگ ءَ گیش آیانی مردم تاوان بار بیت کُت کن اَنت –