بلوچستان ءَ کرونا ویروس ءِ چِل ءُ چار نوکیں نادراہ پدر بیتگ اَنت

سربوتگیں ھالانی رِد ءَ گوستگیں روچ ءَ بلوچستان ءِ تہ ءَ جھانی وبا کرونا ویروس ءِ نادراھی ءَ آماچ بوتگیں چِل ءُ چار دگہ نوکیں کیس دیم ءَ اتکگ اَنت ءُ اے وھد ءَ کرونا ویروس ءَ آماچ بوتگیں درسیں مردمانی کچ سیءُ یک ھزار دوسد ءُ نُھ ءَ سر بوتگ اَنت-

بلوچستان جانسلامتی ءِ نیمگ ءَ چہ شنگ بوتگیں رپورٹ ءِ رِد ءَ گوستگیں روچ ءَ بزاں شمبے ءَ بلوچستان ءِ ھپت دمگاں چِل ءُ چار مردماں کرونا نادراھی پدر بوتگ، کہ آھانی تہ ءَ درساں گیش بلوچستان ءِ بنجاھی شھر شال ءَ بیست ءُ سَے ،مستونگ ءَ ھپت، تربت ءَ پنچ، گوادر ءُ پنجگور ءَ سَے سَے، ھزدار ءَ دو ءُ نوشکی ءَ یک مردمے کرونا ویروس پدر بوتگ، چریشی ءَ پد تنی وھدی بلوچستان ءِ تہ ءَ کرونا نادراھی ءَ آماچ بوتگیں مردمانی کچ نوکیں کیساساں ھوار سرجمی ءَ سی ءُ یک ھزار دوسد ءُ نُھ ءَ سر بوتگ اَنت-

رپورٹ ءِ رِد ءَ بلوچستان ءِ تہ ءَ گوستگیں روچ ءَ بیست مردم وش بوتگ انت، وش بوتگیں مردمانی کچ نوکیں کیساساں ھوار سرجمی ءَ سِی ھزار ءُ سَے سد ءُ بیست ءُ ھشت انت –

رپورٹ ءِ رِد ءَ بلوچستان ءِ تہ ءَ گوستگیں روچ ءَ یک ھزار ءُ پنجاہ ءُ پنچ مردمانی کرونا ٹیسٹ کنگ بوتگ اَنت، کہ آھانی تہ ءَ چِل ءُ چار مردماں کرونا نادراھی پدر بوتگ ءُ وھدیکہ پنچ سد ءُ چاردہ مردمانی رپورٹ دنیگت ءَ نہ اتکگ انت-

رپورٹ ءِ رِد ءَ بلوچستان ءِ تہ ءَ اے وھدی کرونا وائرس ءِ پنچ سد ءُ چِل ءُ سَے نادراہ ھست انت کہ نوزدہ نادراہ بلوچستان ءِ نادراھجاہ الاج کنگ ءَ انت ءُ آھانی تہ ءَ ھپت نادراہ ھائی فلو آکسیجن ءَ اِلاج ءَ انت –

بلوچستان ءَ کرونا وائرس ءِ پوزٹیو کیسانی گیشی چار ٹک ھبدہ درسد بوتگ تنی وھدی بلوچستان ءِ تہ ءَ کرونا وائرس ءَ سرجمی ءَ سَے سد ءُ سِی ءُ ھشت مردم بیران بوتگ انت-