کراچی ءَ محراب پندرانی کوش ءُ ڈیرہ غازی خان وئیل ءِ بگیری ءَ بلوچ یکجھتی کمیٹی ءِ زھرشانی

کراچی ءَ بلوچ یکجھتی کمیٹی ءِ نیمگ ءَ محراب پندرانی ءِ کوش ءُ ڈیرہ غازی خان ءَ شیرمچیں رابعہ بلوچ ءِ کھول ءِ کوش ءُ وئیل زدگ بوتگیں رابعہ ءِ انساپ دیگ ءِ ھاتر ءَ مروچی کراچی پریس کلب ءِ دیم ءَ زھرشانی کنگ بوتگ –

کراچی ءَ زھرشانی ءَ وائس فار بلوچ مسنگ پرسنز ، بلوچ متحدہ مھاز ءُ دگہ سیاسی ، چاگردی ءُ انسانی ھکّانی باسکاں بھر زرتگ- زھرشانی کنوکانی دست ءَ پلے کارڈ بوتگ آں آیانی سر ءَ محراب پندرانی کوش ءُ ڈیرہ غازی خان ءِ وئیل ھوار کُتکارانی دزگیری لوٹ نبشتہ کنگ بوتگ اَنت-

زھرشانی کنوکاں تران کنان ءَ گْوشتگ کہ پاکستان ءَ ایردستیں بلوچانی ھون ارزان بوتگ چریشی ءَ روچے جتائیں رنگے ءَ ریچگ ءَ اَنت ئے ریاست ءِ زوراورانی مھار یل ءَ اِنت ءُ آ وتی مالاں گند اَنت ءُ نزورینانی سر ءَ زوراور جوڑ بنت ءُ آھاں وتی لُٹ ءُ کُٹانی نشانگ کن اَنت-

زھرشانی کنوکاں گْوشتگ کہ اد ءَ باپاری کنوک پوریاگراں انسان ناں بلکیں کَڑوک مڑوک سرپد بنت –

زھرشانی کنوکاں بس ءِ واھند ءُ دگہ ٹرانسپورٹ کمپنیاں گوں دزبندی کتگ کہ آ محراب پندرانی ءِ کوشکارانی ھک ءِ بوگ ءَ یل بہ کن اَنت دانکہ کوشکار ءَ اے وئیل ءِ سر ءَ سزا بہ رس اِیت – مردمانی گوشگ اِنت کہ کوشکارانی سزا دیَگ ءَ چہ آ مات ءُ پت ءَ چہ وتی چک ءَ جتا بوتگ اَنت آیانی چُک واتر وَ نَیت بلے اگاں انساپ رسگ ءَ آھاں سکین بہ رس اِیت-

زانگ بہ بیت محراب پندرانی نامداریں ٹرانسپورٹ ءُ سدا بھار ٹرانسپورٹ ءِ واجہ حاجی دولت خان لھڑی ءِ گور ءَ کار ءَ بوتگ-

محراب پندرانی ءِ کھول ءِ رِد ءَ محراب پندرانی سدابھار ٹرانسپورٹ ءِ واجہ سک لَٹ ءُ کُٹانی نشانگ کتگ ءُ چریشی ءِ آسر ءَ آئی ءَ وتی ساہ داتگ اَنت –