دروگیں دیم پہ دیمی جنگ ءِ نام ءَ بیگواھیں مردماں کُشگ ءُ چگل دیگ ءَ اَنت – ماما قدیر بلوچ

وائس فار بلوچ مسنگ پرسنز ءِ وائس چیئرمین ماما قدیر بلوچ ءَ گُشتگ کہ دروگیں دیم پہ دیمی جنگ ءِ نام ءَ بیگواھیں مردماں کُشگ ءُ چگل دیگ ءَ اَنت –

وائس فار بلوچ مسنگ پرسنز میان اُستمانی روچ ءِ درگت ءَ زورانسرء آوار جنی ءِ آماچ بیتگیں مردمانی بارو ءَ شال ءِ پریس کلب ءِ دیم ءَ زھرشانی کنت – اے گپانی درشانی وائس فار بلوچ مسنگ پرسنز ءِ وائس چیئرمین ماما قدیر بلوچ ءَ زھرشانی بنجل ءَ یک تامر بندے ءَ کرتگ اَنت –

شال ءَ وی بی ایم پی ءِ زھرشانی بنجل ءَ چار ھزار ءُ چار سد ءُ بیست ءُ دو روچ سرجم بیتگ اَنت – بلوچ یکجھتی کمیٹی ءِ مھرنگ بلوچ، بلوچستان نیشنل پاٹی ءِ شمائلہ اسمائیل، ایکٹیوسٹ ھالدہ ایڈوکیٹ ءُ دگہ مردماں بنجل ءَ اتکگ ءُ کھولانی گون ءَ پدردی درشان کتگ اَنت –

ماما قدیر بلوچ ءَ وتی تامربندیں کلوہ ءَ دراھیں تکاں بندوکیں مردماں گوں اے زھرشانی ءَ بھر زورگ ءِ دزبندی کرتگ، اشی ءِ ھواری ءَ وی بی ایم پی ءَ بلوچستان ءَ بیگواہ بیتگیں مردمانی کھولاں گوں زھرشانی ءَ گیش ءَ چہ گیش بھر زورگ ءِ دزبندی کرتگ ءُ گوشتگ کہ آ بیاینت ءُ وتی دوستگیں مردمانی سلامتی ءَ یل بیگ ءِ توار ءَ برز بہ کن اَنت –

وی بی ایم پی ءَ وتی درشان ءَ گُشتگ کہ اے وھد ءَ بلوچستان ءَ ھزارانی کچ ءَ مردم بیگواہ اَنت ءُ ھمک روچ مھلوک ءَ زورانسری آوار جنگ ءُ بیگواہ کنگ ءَ اَنت – زورانسری آوارجنی یک گیر کانونی ءُ گیر انسانی املے اشی ءِ پاشک کنگ المی اِنت –

وی بی ایم پی ءَ زورانسری بیگواہ بیتگیں مردمانی کھولاں گوں یک رندے پد ءَ کڈنی کرتگ ءُ گُشتگ کہ آ المی ءَ وتی دوستگیں مردمانی یل کنائینگ ءِ واستا توار چِست بہ کن اَنت ءُ آیانی کیساں وی بی ایم پی ءُ انسانی ھکانی ادارھانی گور ءَ جمع بہ کن اَنت ھمے وڑ مار ءَ گمان بیگ ءَ اِنت دگہ لھتے بیگواھیں مردمانی رنگ ءَ آیانی مردماں ھم کاؤنٹر ڈیپارٹمنٹ آف ٹیررازم (سی ٹی ڈی) ءِ دروگیں جنگ ءِ نام ءَ دیگ ءُ کشگ ءُ آیانی لاشاں چگل دے اَنت ھنچش گوستگیں روچاں پنچ مردمانی لاش نیوکاھان شال ءُ لورالائی ءَ دور دیگ بیتگ اَنت کہ چریشانی تہ ءَ لھتے ءِ پجار کھولاں گل ءَ گوں گُشتگ اَنت آ ماھانی ماہ یا سالانی سال زورانسری بیگواھی ءِ آماچ بیتگ اَنت –

زانگ بہ بیت بلوچ یکجھتی کمیٹی ءَ سی ٹی ڈی ءِ نیمگ ءَ دروگیں جنگ ءِ نام ءَ دیگ زھر درشاب کرتگ ءُ بانداتگیں روچ ءَ رسانکدراں یک ھیش ٹیگ StopFakeEncounterOfBaloch ءِ نام ءَ کمپین ءِ جار جتگ –