بیگواھیں بلوچانی دروگیں میڑ ءِ نام ءَ آھانی کوشانی تہ ءَ گیشی آرگ بوگ ءَ انت – بی وائی سی

بلوچ یکجھتی کمیٹی ءُ بلوچ وومن فورم ءَ رسانکدراں وتی شنگ کرتگیں درشانانی تہ ءَ گوشتگ کہ سی ٹی ڈی دروگیں میڑ ءِ نام ءَ زورانسری آوار جنگ ءُ بیگواہ بوتگیں مردماں کُشگ ءَ انت –

بلوچ یکجھتی کمیٹی ءَ وتی شنگ کرتگیں درشان ءِ تہ ءَ گوشتگ کہ بلوچستان ءِ تہ ءَ ھزارانی کچ ءَ مردم زورانسری آوار جنگ ءُ بیگواہ کنگ بوتگ انت کہ آھانی کھولاں پہ آھاں زھرشانی ءُ روانک ھم کَش اِتگ وھدیکہ سوبائی سرکار، وفاقی سرکار، وزیراعلی ءُ وزیر آعظم ءُ پاکستانی آرمی ءِ جارکش ءَ ھوار درستاں بلوچستان ءَ بیگواھیں مردمانی زورانسری اوار جنی منّ اِتگ ءُ آھانی کھول باور کنائینتگ کہ یل کنگ بنت وھدیکہ ھمے زوتاں سوبائی سرکار ءَ وائس فار بلوچ مسنگ پرسنز ءَ چہ بیگواھیں مردمانی لسٹ لوٹ اتگ بلے بدکسمتی ءَ یکشلیں زھرشانی ءُ سرکار ءُ وفاقی وزیرانی باور کنائینگ ءَ ابید بیگواھیں مردمانی یل کنگ ءَ ابید آھاں دروگیں میڑ ءِ نام ءَ دیگ ءُ شھید کنگ ءَ انت چریشی ءَ ھزاراں بیگواھیں مردمانی کھولانی دل ءَ تُرس ءِ ودی بوتگ اَنت –

جارکش ءَ گوشتگ کہ نیوکاھان ءَ یازدہ اگست ءَ پنچ مردم دروگیں میڑ ءِ نام ءَ کُشگ بوتگ اَنت ھمے وڑ بیست ءُ پنچ اگست ءَ ھم ھپت مردم دروگیں میڑ ءِ نام ءَ کُشگ ءُ چگل دیگ بوتگ انت کہ رند ءَ آھانی پجار پدر بوتگ کہ آ پیسر ءَ چہ زورانسری آوار جنگ ءُ بیگواہ کنگ بوتگ انت –

جارکش ءَ گوشتگ کہ سی ٹی ڈی ءِ اے کاراں چہ پدر بیت کہ بلوچ مسنگ پرسنزاں گوست ءِ وڑ ءَ ماورائے عدالت کُشگ ءِ یک نوکیں درچ ءِ بندات کنگ بوتگ – آئی ءَ چہ درسیں سیاسی ءُ انسانی ھکانی گلاں چہ لوٹ کتگ کہ اے جاور ھالاں بیگواھیں بلوچانی ماورائے عدالت کُشگ ءِ گر ءُ دار ءِ ھاتر ءَ درس یکجاہ بہ بنت مھکمیں جھدے بہ کن انت – جارکش ءَ بیگواھیں مردمانی کھولاں چہ لوٹ کتگ کہ گوشتگ کہ گوستگیں روچاں سی ٹی ڈی ءَ ھما مردم کُشتگ ءُ چگل داتگ اَنت کہ آھانی کیس رسانکدر ءَ کم دیم ءَ اتکگ یا آھانی کیس نبشتہ کنگ نبوتگ انت ما چہ درسیں بیگواھیں مردمانی کھولاں چہ لوٹ کنیں کہ وتی دوستیگیں مردمانی کیس ءَ نبشتہ بکنائیناں ءُ رسانکدر ءَ توار چست بہ کن انت اگاں ناں گڑا آ ھمے وڑدروگیں میڑ ءِ نام ءَ جنگ بوت کن انت –

درشان ءِ تہ ءَ گوشگ بوتگ کہ بلوچ یکجھتی کمیٹی نیمگ ءَ باند ءَ چہ چاگردی ترامجاھاں

StopFakeEncounterOfBaloch

نام ءَ ھیش ٹیگ ءِ چلائینگ بیت کہ بیگواھیں مردمانی کھول ءَ ھوار درسیں راج ءَ بھر زورگے لوٹ ءَ کنیں –

ھمے وڑ بلوچ وومن فورم ءِ جارکش ءَ وتی شنگ کرتگیں درشان ءِ تہ ءَ گوشتگ کہ سی ٹی ڈی زورانسری آوار جنگ ءُ بیگواہ بوتگیں مردماں یکشل ءَ دروگیں میڑ ءِ نام ءَ کُشگ ءُ آھاں ناشرکار گوشگ انت ھما مردم کہ دروگیں میڑ ءِ نام ءَ جنگ بوھگ انت آھانی زورانسری آوار جنی ءِ سبوت ھست انت –

جارکش ءَ گوشتگ کہ یکیں ماھے اے سیمی وئیل انت کہ سی ٹی ڈی ناشرکارانی کُشگ ءِ جار ءَ جنگ انت بلے اے مردم پیسر ءَ چہ ریاستی ادارھاں زورانسری آوار جتگ ءُ بیگواہ کتگ انت –

جارکش ءَ گوشتگ کہ ھر ماہ سی ٹی ڈی دروگیں میڑ ءِ نام ءَ پیسر ءَ چہ آوار جنگ بوتگیں مردماں کُشگ انت اشی ءَ پیش سی ٹی ڈی مستونگ، بولان، ءُ شال ءَ پیسر ءَ چہ زورانسری آوار جتگیں بیگواھیں مردم کُشتگ ءُ دروگیں میڑ ءِ نام داتگ انت –

جارکش ءَ گوشتگ کہ بیگواھیں مردماں دروگیں میڑ ءِ نام ءَ کُشگ ءَ پد گمنامیں مانشاں کبر کنگ انت آھانی پجار ءِ ھاتر ءَ ناکہ آھانی ڈی این اے ٹیسٹ بیت انت ناکہ دومی کانودی تقاضہ سرجم کنگ بنت –

جارکش ءَ گوشتگ کہ بلوچستان ءِ تہ سی ٹی ڈی ءُ دگہ پاکستانی ادارھانی نیمگ ءَ بیگواھیں مردماں دروگیں میڑ نام ءَ کُشگ قابل ایرجنگ انت انسانی ھکانی ادارہ اے جیڑہ ءِ سر ءَ توار چست بہ کنت ءُ دروگیں میڑ ءِ گر ءُ دار ءَ وتی کرد ءَ پیلو بہ کنت –