چہ گوادر ءَ دریاورد اتھاد ءِ جنرل سیکریٹری ءُ شال ءَ نودربرے بیگواہ

بلوچستان ءِ تیابدپی شھر گوادر ءَ آدینگ ءِ شپ ءَ دریاورد اتھاد ءِ جنرل سیکریٹری ءُ ھمے وڑ شال ءَ نودربرے آوار جنگ ءَ بیگواہ کنگ بیتگ اَنت –

دریاورد رھشونانی رد ءَ یونس انور پدری زر شیڈ ءَ وتی سنگتانی ھمراھی ءَ نندوک بیتگ سلای بندیں کارمنداں آوار جتگ ءُ گوں وت برتگ –

دریاوردانی رھشون ءِ زورانسری آوار جنی ایر اش جتگ ءُ گوشتگ اِش کہ چینی ءُ گیر کانونی ٹرالرنگ ءِ ھلاپ ءَ جد ءُ جھد ءِ پژدر ءَ زورانسری یونس ءِ آوار جنگ ھچ رنگ ءَ اوپار کنگ نہ بیت اِنت –

آیاں گُشتگ کہ ادارہ مئے رھشون ءَ سلامتی ءَ یلو بہ کن اَنت اگاں آ جرمکارے گڑا آ بیست ءُ چار ادارانی تہ ءَ آمیدگس ءَ پیش کنگ بہ بیت اِنت –

ھمے وڑ چہ شال ءَ پوج ءَ تربت ءِ جھنندیں نودربر نور خان دزگیر کنگ ءَ پد بیگواہ کرتگ، نورخان ءِ بیگواھی ءِ ھال آئی ءِ سنگتاں شنگ کرتگ غ

نورخان اشی ءَ پیسر سال دوھزار ءُ نوزدہ ءَ آوار جنگ ءُ بیگواہ کنگ بیتگ کہ چریشی ءَ پد آ یلو بیتگ –

بلوچستان ءَ زورانسری آوارجنیانی درچ یکشل ءَ برجاہ اَنت ھژدہ اگست ءَ نوشکی ءَ دیم پہ شال ءَ روگ ءِ وھد ءَ سریاب ءِ جھمنندیں ورنا شفیع اللہ مستونگ کانک ءِ ھند ءَ پوج ءَ گاڑی ءَ ایرگپتگ ءُ گوں وت برتگ –

زانگ بہ بیت اگست ءِ ماہ ءَ بلوچستان ءِ جتا جتائیں جاھاں دَہ ءَ گیش مردمانی زورانسری آوار جنیانی ھال بیتگ اَنت –