لورلائی ءَ سی ٹی ڈی ءَ ھپت مردمانی کُشگ ءِ ٹاہ داتگ

سربوتگیں ھالانی رِد ءَ بلوچستان ءِ دمگ لورلائی ءَ سی ٹی ڈی ءَ یک بیڑے ءِ میان ءَ ھپت مردمانی کُشگ ءِ ٹاہ داتگ –

سی ٹی ڈی ءِ جارکش ءِ رِد ءَ چارشمبے ءَ لورلائی دمگ کوھاڈ ڈیم ءَ مار ءَ سلاہ بندیں مردمانی ساڑی بوگ ءِ ھال رس اتگ گڑا سی ٹی ڈی ءَ ھما دمان ءَ بیڑ برتگ –

آئی ءَ گُشتگ کہ سلاہ بنداں آھانی سر ءَ تیرگواری کُتگ پسھی تیرگواری ءَ ھپت مردم جنگ بوتگ ءُ سَے تتکگ ءُ شُتگ کہ آھانی شوھاز برجاہ انت –

سی ٹی ڈی ءِ رِد ءَ آھاں اشانی سلاہ شورو دست گپتگ انت – اے مردمانی سیادی سلاہ بندیں گلان انت –

سی ٹی ڈی ءَ ھپتیں مردمانی تہ ءَ چار مردمانی پجار گنی، سدام، میر جان ءُ اھمد ءِ ناماں کرتگ اَنت ءُ آدگہ مردمانی پجار نہ کرتگ اَنت –

گوست ءَ ھم سی ٹی ڈی ءَ جنگانی میان ءَ مردمانی کوش ءِ ھال شنگ کرتگ اَنت بلے سی ٹی ڈی ءِ جار ءَ کُشتگیں مردمانی کھولاں سی ٹی ڈی ءِ گپ رد کرتگ ءُ گُشتگ کہ مئے مردم پیسر ءَ آوار جنگ بیتگیں بیتگ اَنت –

زانگ بہ بیت یکرندے پد ءَ بلوچستان ءِ تہ ءَ زورانسری آوار جنگ ءُ بیگواہ بوتگیں مردم کُشگ ءُ چگل دیگ ءِ پالیسی تہ ءَ گیشی اتکگ ھمے ماہ ءِ اے سیمی رند ءَ دروگیں میڑ ءِ نام ءَ زورانسری آوار جتگیں مردم جنگ ءُ چگل دیگ بوگ ءَ انت ـ

شال چاگردی باسکے ءَ ٹی بی پی ءَ گوں گپ کنان ءَ نام پدر نہ کنگ ءِ سر ءَ گُشتگ کہ سی ٹی ڈی ءَ تنی وھدی بازیں مردمے کُشتگ ءُ چگل داتگ اَنت بلے تنی وھدی سی ٹی ڈی ءِ کوشانی پژدر ءَ مردم یک بے وسی درشانی ءَ گندگ بیگ ءَ اَنت –

آئی ءَ گُشتگ کہ اگاں سی ٹی ڈی ھمے رنگ ءَ شیکر بیت گڑا اے پہ بلوچ ورناہ ءُ بلوچ مھلوک ءَ بلاھیں کوشمان ءِ آورت کنت باید چاگردی گل ءُ مردم سی ٹی ڈی ءِ ھلاپ ءَ وتی توار ءَ برز بہ کن اَنت ءُ اے وڑیں ناھکیں کوشانی پژدر ءَ سی ٹی ڈی گرگ بہ بیت اِنت –