نمدی یے پہ نجیب جان ءَ- مقبول ساچ

نبشتانک: نمدی یے پہ نجیب جان ءَ

نبشتہ کار: مقبول ساچ

دی بلوچستان پوسٹ

دروت: تو ھر جاہ ءَ ئے امیت اِنت جوڑ ءُ وش ئے مدام تئی وش ءُ سلامتی ءَ لوٹ آں منی مھروانیں ھمبل تو مرچی پد ءَ گیر اتک ئے ءُ تنیگت ءَ تئی پادانی پد گار نہ اِت اَنت کہ تئی گاری ءِ ھال شنگ اتگ اَت ھمبل تو چو سرپد ئے کہ مات ترا مُدام یات کنت یار مردم گوں مردم ءَ چوں نہ کنت کہ تو کُت بلے چی بہ گوش آں تو درمُلک ءَ پہ بے وسی درکپت ئے کہ منی پس ءَ چُنت سال انت کہ بیگواہ اِنت ءُ منی گِس ءِ لاپ دیوک بس من آں ءُ مات بے وس ءُ آجز اِنت ءُ مات ءِ چم من ءَ سک اَنت-

نجیب یار تئی بیگواھی ءِ ھال من ءَ سر بوت من نہ زانت کہ من کُجا آں اے روچ گُش ئے پمن کیامت ءَ چہ کم تر نہ اَت ءُ دومی مات ءِ ارس چو ھور ءِ پیم ءَ شلگ ءَ اِت اَنت ءُ اے ساھت ءَ من وت نہ زانت چی بکن آں دومی نیمگ ءَ من وت ءَ تسلّا دات نہ کنگ ءَ اِت آں ءُ دومی مات ءَ چِہ پیم !؟ نجیب یار وتی آجزیں مات کمو بچار اَتیں تو ھچبر چو بے مھر نہ بوتگ ئے تو مئے دیوان ءِ روکیں چراگ ءِ شھم بوتگ ئے کہ کدی بُجگ نزانتگ ءُ دومی نیمگ ءَ چوناھی ءَ تو وت یک نادراھیں مردمے ئے پد ءَ ترا رھسترانی لٹ ءُ کُٹ ءُ اے تھاریں کوٹیانی باھوٹ کنگ نزاناں تئی ھال چِہ پیم بیت نجیب جان منی چمانی چراگ واتر کن ءُ من دگہ ھچ نہ لوٹ آں بس تئی آجوئی ءَ لوٹ آں مرچاں مئے گِس گُش ئے یک زندانے جوڑ بیتگ مئے گِس ءِ روژنائی گوں ترا بندوک اَت اَنت تئی مھر ءُ مشکرا کندگ تنینگت ءَ من ءَ گیر کاینت-

من ءَ یات اِنت کہ بیگاہ ءِ ساھت پنچ اَت ءُ من نشتگ اَتآں کہ اناگت ءَ گوانکو ءِ توار منی گوشاں کپت تنا وھدی من چار اِت داں تئی لمبر اَت گُڑا من رِنگ چِست کُت ھلو کُت تو ھم گوشت ءُ گپ گپ ءِ سر ءَ اناگاہ گریوگ بنا کُت ءُ منی چمانی ارس شَل بوت اَنت ءُ ارس ءِ شَل بوگ ءِ ساھتاں تو گُش ئے منی دیم ءِ اوشتاتگ ئے ھمے ساھت ءَ تو اے ھم گْوشت کہ شُمئے چندن شُمئے باھوٹ اِنت-

نجیبُک ترا ھرچی مھر بہ دنت بَلے تئی مھرانی مٹ نیست چیاکہ تئی انچیں مھر بوتگ اَنت کہ آھانی ستا کنگ ءِ منی گورا چُشیں لبز نیست کہ من نبشتہ اِش بہ کن آں ھمبل من ءَ بَکش کہ من تئی واستا جوانیں نمدی یے ھم نبشتہ کُت نہ کُت بس گُڈسر ءَ ھمے گوشگ لوٹ آں
یار نجیب جان ترا پیریں مات ءِ مھرانی سر اِنت کہ تو واتر کن ءُ من ھم مُدام تئی آجوئی ءِ دُوا ءَ لوٹ آں کہ تو واتر بات ئے-

بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔