گیس ءِ نھاد ءَ چاردہ درسد ءِ منّگ

ھالانی رِد ءَ آئل ءُ گیس ریگولیٹری اتھارٹی (اوگرا) ءَ پاکستان ءِ تہ ءَ گیس ءِ نھاد ءَ چاردہ درسد ءِ گیشی ءِ منزوری داتگ –

اوگرا ءِ نیمگ ءَ چہ سوئی ناردرن ءُ سوئی سدرن ءِ ھمے سال ءِ مالی لوٹانی ھاتر ءَ وتی پیسلہ داتگ –

پیسلہ ءَ سوئی نادرن ءِ گیس ءِ نھاد ءَ چاردہ درسد گیش کنگ ءِ منزوری داتگ، گیس ءِ یک ایم ایم بی ٹی یو ءِ نھاد ءَ ھشتاد ءُ شش کلدار نود ءُ سَے پیسہ ءِ گیش کنگ ءَ آئی ءِ نھاد شش سد ءُ ھشتاد ءُ شش کلدار ءُ ھپتاد ءُ ھپت پیسہ ایر کنگ بوتگ-

اوگرا ءَ سوئی ناردرن ءَ گوستگیں سال ءِ بچتگیں دو سد ءُ پنجاہ ءُ چار ارب کلدارانی گرگ ءِ موکل نداتگ ءُ اے درگت ءَ چہ وفاقی ھکومت ءَ رایہ لوٹ اتگ – اشی ءَ ابید ریگیولیٹری اتھارٹی ءَ سوئی سدرن ءِ نھاد ءَ ھپت درسد ءِ گیش کنگ ءِ منزوری داتگ نھاد ءَ پنجاہ ءُ چار کلدار ءُ چل ءُ ھپت پیسہ ءِ گیش کنگ ءَ پد یک ایم ایم بی ٹی یو ءِ نھاد ھپت سد ءُ ھپتاد ءُ نھ کلدار ءُ ھشتاد ءُ ھشت پیسہ ایر کنگ بوتگ –

اوگرا ءِ رِد ءَ ھمے مالی سال ءِ ھاتر ءَ گیس ءِ نھاد گیش کنگ بوتگ بلے اے گڈی پیسلہ نہ انت گیش کنگ ءِ گڈی پیسلہ وفاقی ھکومت ءِ منزوری ءَ پد کنگ بیت انت –