نبشتانک آزمانک: منی واب ءِ لچہ کار ءُ سرمچار
آزمانکار:شاری لال
دی بلوچستان پوسٹ
من جوڑ کتگ مشین ئِے مشین ھنچیں مشین ئِے گوش ئے نیم ھُدا اِنت چو ھُدا ءَ ھرک سی دل ءِ ھال ءَ سرپد اِنت کسے کہ دل ءَ چے بہ جیڑ اِیت آ پھم اِت کنت کسے لوگے ءِ تہ ءَ بہ بیت ءُ آ مشین ڈنّ ءَ بہ بیت انگت آ لوگ ءِ مردم ءِ ھال ءَ سرپد بیت گوستگیں اھد ءِ ندارگ ءَ پیش دار اِیت من نہ زاناں وتی جوڑ کتگیں مشین ءَ کجام نام ءَ بہ دیاں من گوش آں نیم ھدا ءِ نام ءَ بدیان ئِے، بلے وھدے من کٹِک دین دوستیں مردمانی تْرانگ ءَ کپ آں گڑا چہ اے نام ءَ بجّ آں بازیں جیڑگ ءَ پد من وتی مشین ءِ نام ءَ رازپاشک کتگ۔
مروچی سھب ءَ کینٹین ءَ نھاری ءِ ورگ ءَ پد من ھاسٹل ءِ کوٹی ءَ تھنا نندوک اَت آں وتی مشین ءِ رازپاشک ءَ را بال دات رازپاشک ءَ بال کت من لوٹ اِت رازپاشک بہ روت کوچگ ءَ مچکدگ ءُ ڈگارانی ندارگ ءَ را من ءَ پیش بہ دار اِیت رازپاشک ھما سھت ءَ شُت کوچگ ءَ ڈگارے ءِ تہ ءَ چہ گْوزوکیں پیرمردے ءِ ندارگ ءَ من ءَ پیشدارگ ءَ بنا بوت۔
پیر مرد ءَ ھسایے دست ءَ اَت زمین ءَ جِکّ جنان ڈگارے ءِ تہ ءَ چہ روان اَت پیرمرد وتی ترکّ اِتگیں پادگ ءُ رُوس اِتگیں سواساں گوں کُنٹ گامی ءَ پلاراناں لگت دیان ءُ روان اَت آ پلارانی لگت دیگ ءَ گوں آ ترانگ ءَ کپتگ اَت کہ کسانی ءَ ھمے ڈگارانی سر ءَ پلاراناں لگت داتگ ءُ ھمیشانی سر ءَ تْردّ اِتگ، لگت دیگ ءَ گوں پلاراں ژِرت ژِرت کتگ ءُ آئی ءَ اے ژرت ژرت ءِ توار ءَ اجبیں تاھیرے داتگ اَت آ روان اَت کہ آئی ءَ سھب ءِ گوریچ ءِ نوک بندات بوکیں گْوات ءَ را مار اِت کہ پلارانی سر ءَ لھم لھم ءَ کشان ءُ پلار ھُنژ ھُنژ کنان اِت اَنت دُرچک ءُ جنگلانی چِری چِری ءِ توار اَت ھمے کوش ءُ مرگانی توار ءَ چے پیرمرد ءَ وتی جوانی ءِ نوبت گیر آتک اَنت کہ آ وھد ءَ پیر مرد ءِ چمّاں روک مان اَت کہ بانگواھانی وھد ءَ ھمے دروچک ءُ شانتلانی شکار ءَ شتگ ات، بلے اے وھد ءَ پیر مرد ءِ چمانی روکاں دروہ اِتگ اَت کہ دروچک ءُ جنگلانی ندارگ ءُ شکار ءَ بہ کنت ھور ءِ ترمپ زمین ءِ سر ءَ نرم نرم ءَ کپان بوت اَنت ھور ءِ نرمی کمو گیش بوت۔ اے نرمیں ھور پیرمرد ءَ بے کساس تاھیر دیگ ءَ ات آئی ءَ وتی ھسا زمین ءِ سر ءَ ایر کت ءُ وتی دوئیں دست ٹال کت اَنت آئی ءَ وت ءَ چو مھتر ایسا ءِ سلیب ءَ کت ءُ ھور ءِ اجام بکشیں ترمپانی مارگ ءَ لگ اِت-
ڈگار ءِ دیمی نیمگ ءَ کمو دُور کسانیں ھلکے ھست اَت من رازپاشک ءَ را ھمانگو بُرت رازپاشک شُت ھلک ءِ یک کاپرے ءِ کش ءَ اوشتات۔ کاپر ءِ چیر ءَ یک جنکے پوستے ءِ رَجگ ءَ اَت جنک ءِ گندگ ءَ گوں من ءَ بلوچ ءِ کوھنیں دود گندگ ءَ آتک اَنت بلے اے ھلک ءَ ھور نہ اَت بلے جمبر ءَ بستگ اَت من لھتے توار اِشکت، “چونیں توارے؟” من رازپاشک ءَ جست کت “لھتے گونڈوانی توار اِنت” من گوشت برو ھمایانی کر ءَ من ءَ گونڈواں پیش بہ دار آ شُت من ءَ لھتے جنک ءُ بچکک گندگ ءَ اَت کہ دراہ چکّرگ ءَ ات اَنت ءُ گوشگ ءَ اِت اَنت-
“ھورو ھورو ایر دئے
بُلک ءِ چُکّاں چیر دئے”
گونڈوانی سوت ءِ اشکنگ ءَ گوں من ءَ وتی کسانی گیر آتک کہ وھدے جمبر ءَ گْرند اِتگ من گرندانی بیم ءَ چہ لوگ ءَ در نہ یتکگ آں۔
اے ندارگ ءِ گِندگ ءَ پد من دلجم اِت آں کہ منی جوڑ کتگیں مشین برابر اِنت من رازپاشک ءَ را دگہ چکّاسے ءَ بُرت بزاں گْوست ءِ جاورانی نیمگ ءَ برگ لوٹ اِت، من آئی ءَ را نُھ سال پُشت ءَ بُرت، بزاں 2012 ءِ سال ءَ بُرت کہ اے سال ءَ من باز نوکین ءُ اجبیں مردم ءِ ھال اشکتگ اَت بلے چم ء وت نہ دیستگ ات اَنت کہ من ھمے مردماناں چم ء وت گندگ لوٹ اِت ءُ اے سال ھما سال اَت کہ یک نیمگے روانک، ڈوک شانی، ھڑتال جلسہ ءُ جلوس اَت، ءُ دومی نیمگ ءَ ٹوپ ءُ بمبانی توار اَت من ءَ ھمے سال ءَ باز سانجت کتگ اَت رازپاشک ھما دمان ءَ من ءَ 2012 ءِ سال ءَ مئے میتگ ءَ شُت ءُ ھما ندارگ ءَ را پیشدارگ ءَ بنا بوت۔
رازپاشک پیشدارگ ءَ اَت وھد روزرد اَت چہ میتگ ءِ پُشت ءَ کوچگ ءِ نیمگ ءَ چے اسرار ءُ امجد پیداک اَنت ھردوئیناں وت ءَ را بزیں چادرے مانپوش اتگ اے دوئیناں وت ءَ را چادر ھمے ھاتر ءَ مانپوش اِتگ کہ کسے کہ مارا گِند اِیت آ مئے سر ءَ گمان بہ کنت مئے چادرانی چیر ءَ تُپنگ ھست اِنت، ءُ مارا سرمچار بہ پھم اَنت بلے اسل ءَ آھانی چادر ءِ چیر ءَ ھچ نیست اِنت۔
دومی نیمگ ءَ ندارگے من دیست کہ منی ارواہ جکس اِت جھان ءِ تہ ءَ چشیں مردم ھم ھست کہ وتی سنگتانی مرگ ءِ ودار ءَ کسے بہ نِند اِیت من ءَ رازپاشک ءَ پیشداشت کہ پنامی لچہ کار میراس بندنی وتی لوگ ءِ راستیں نیمگ ءِ کُنج ءَ نشتگ، آئی ءِ دیم ءَ یک ندے ءُ دپترے ایر اِنت، دپتر ءِ لھتیں تاک آئی ءَ وتی کش ءِ چِلدان ءِ تہ ءَ دِرّتگ ءُ دَور داتگ اَنت کہ لھتیں تاکانی سر ءَ دستونک نبشتہ ءُ لھتیں تاکانی سر ءَ لچہ نبشتہ اِنت بلے چہ دستونک ءَ جھل دیم ءَ نبشتہ کتگیناں بِلّ کہ کڑے بڑے اَنت آئی ءِ دیم ءَ کہ دپتر اِنت دپتر ءِ تہ ءَ یک نوکیں دستونکے جریدگ اِنت پہ شِنگ کنگ ءَ، بلے میراس بندنی ءَ سے روچ اِنت کہ گندگُش ءُ رسانکدر ءَ چار ءُ گند کنگ ءَ اِنت کہ باریں سرمچارے شھید بوتگ یانا، اگاں کسے شھید بوتگ گڑا آ وتی پربستگیں دستونک ءَ نوک شھید بوتگیں مردمے ءِ سر ءَ ندر بہ کنت ءُ شنگ ئِے بہ کنت بلے آ انو ودار ءَ اِنت دنیگتا کس شھید نہ بوتگ۔
اے ندارگ ءِ گندگ ءَ گوں من ءَ ایشی ءِ چارگ ءِ برداشت نہ بوت من آئی ءَ دگہ نیمگے بُرت اود ءَ کہ رازپاشک شُت اود ءَ ھم ھمے جاور اَت، کہ میتگ ءِ رودراتکی نیمگ ءِ پَٹّ ءِ سر ءَ بچک پٹبالی لیب ءَ اِت اَنت پَٹّ ءِ کش ءَ بشام نشتگ اَت، گوں وتی کوھنیں سنگتاں بشام ءَ سالے ءَ گیش بوتگ گار بوتگ ات آئی ءِ جند ءِ گوشگ ءَ آ جیونی ءَ ماھی ءِ کار ءَ بوتگ، بلے من رند ءَ سرپد بوت آں کہ آ اسل ءَ کوہ ءَ بوتگ اے گپ آئی ءَ وت گوں وتی جن ءَ پاشک کتگ اَت بشام پَٹّ ءِ سر ءَ وھدے گوں سنگتاں نندوک ات، آئی ءِ سنگتاں ھم باور اَت کہ بشام جیونی ءَ کار ءَ بوتگ، کس ءَ گمان نیست اَت کہ بشام کوہ ءَ بوتگ بلے بشام ءَ لوٹ اِت کہ منی سنگت بہ زان اَنت من اسل ءَ کوہ ءَ بوتگ آں جنگ ءَ، بلے آ کوہ ءِ رھبندانی گرپتار اَت کہ پہ دپ ء وت اے ھبر ءَ گْوشت ئِے نہ کت بشّام ءَ وھدے کہ اد ءَ پٹّ ءِ سر ءَ آیگی اَت، آئی ءَ آیگ ءَ پیسر چہ لوگ ءَ وتی کوہ ءِ پوجی بوٹ ءُ وتی وتاس لانک ءَ کتگ ءُ آتکگ اَت آئی ءَ بوٹ پاد ءَ کتگ اَنت کہ من ءَ کسے گِند اِیت آ منی سر ءَ گمان کت بہ کنت کہ من ءَ پرچا چشیں بوٹ پاد ءَ؟ چے ءَ کہ چشیں بوٹ تھنا کوہ ءِ مردم پاد ءَ کن اَنت، کسے کہ منی بُٹاں گند اِیت آ وت پھم اِیت کہ من کوہ ءَ بوتگ آں، منی گُشگ ءِ ھچ زلورت نہ اِنت وھدے کہ بشام دیوان ءَ نِندوک اَت، آئی ءَ دم پہ ساھت وتی دست وتاس ءِ نیمگ ءَ برت پہ ھمے نیّت ءَ کسے بہ پھم اِیت من ءَ وتاسے ھم گون رازپاشک بشام ءِ دل ءِ ھالاں شرّی ءِ سر ءَ زانگ ءَ اَت کہ بشام پگری مردمے نہ ئِے آ اسل ءَ پہ وتی ناماوری ءَ کوہ ءَ شتگ-
من رازپاشک ءِ پیشداشتگیں ندارگاں چارگ ءَ اِت آں کہ منی گوانکو ءَ ٹیلینگگے جت من گوانکو چار اِت کہ یک شرگداری نبشتانکے آتکگ اَت نبشتہ کار سپر مری ئیگ اَت کہ ھمک وھد ءَ آئی ءِ نبشتانک کاینت کسے ءِ سر ءَ الّم آ شرگداری کنت اے شرگداری نبشتانک دو روچ پیسر ءِ جنگ ءِ بابت ءَ اَت کہ نبشتہ کار ءَ نویس اِتگ اَت کہ اے جنگ باید اے وڑ ءَ مہ بوتین ءُ آ وڑ ءَ بہ بوتیں بلے من ھچ زانت نہ کت کہ جنگ چے وڑ ءَ بہ بوتیں، من ءَ وَ چونائی ءَ گوں جنگ ءُ جدلاں دست ءُ دوایے نیست من ھچ زانت نہ کت کے راست گشگ ءَ اِنت من نبشتانک زرت رازپاشک ءَ را دات کہ جیڑہ ءَ تو گیش گیوار بہ کن آئی ءَ وھدے نبشتانک دیست ھما دمان ءَ گْوشت ئِے جیڑہ چہ نبشتانک ءَ نہ اِنت جیڑہ چہ نبشتہ کار ءَ اِنت کہ نبشتہ کار دمبرتگیں جنگولے نی چہ جنگ ءَ گِستا نشتگ ءُ دگرانی سر ءَ شرگداری کنت ایشی ءَ سوچ لگورے۔
من رازپاشک لوگ ءَ آرگ لوٹ اِت تنا وھدی مئے میتگ ءِ مردم سرپد بوتگ ات انت کہ من ءَ چشیں مشین ئِے ھست مردم ءِ دل ءِ ھال ءَ سرپد بیت دراھیں میتگ ءِ مردم منی دمب ءَ کپتگ اِت اَنت، منی تچگ لوٹ اِت بلے من تتک نہ کت گش ئے کسے ءَ منی پاد داشتگ ات اَنت، دیر نہ گوست کہ مردماں من ءَ رسینت ءُ چہ من ءَ منی رازپاشک اِش زِنگ لوٹ اِت کہ من چہ واب ءَ جھ سر اِت آں، چہ واب ءَ پاد آیگ ءَ پد من نئیکہ مشین دیست نیکہ مردم –
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔