بلوچستان ءَ بیتگیں تیرگواری وئیلاں زھگے ءَ ھوار چار کس بیران

بلوچستان ءِ بنجاھی شھر شال ءَ تیرگواری وئیلے ءَ دو کس بیران، کرنٹ ءِ لگگ ءَ دَہ سالی زھگے بیران، مستونگ ءَ تیرگواری ءَ یک مردمے بیران –

سر بیتگیں ھالانی رد ءَ بلوچستان ءِ بنجاھی شھر شال ءَ ناشناسیں مردمانی تیرگواری ءَ دو کس بیران بیتگ اَنت –

گیشیں ھالانی رد ءَ تیرگواری وئیل سَے شمبے ءِ روچ ءَ بالی پَٹ دگ ءَ شان ھوٹل پیش اَتکگ –

تیرگواری وئیل ءَ بیران بیتگیں مردمانی پجار وڈیرہ سلطان الدین ء امیر جان ءُ رضا مھمد ء اصغر شاہ ءِ ناماں زانگ بیتگ اَنت –

پولیس ءَ جون چِست کتگ ءُ اژدری چار ءُ ٹپاس ءَ پد کھولانی گور ءَ رسینتگ اَنت ءُ وئیل ءِ بارو ءَ گیشیں سرپدی نہ بیتگ –

ھمے وڑ ءَ شال ءِ دمگ سریاب ءَ کرنٹ ءِ لگ ءَ دَہ سالی ئیں زھگے بیران بیتگ-

گیشیں ھالانی رد ءَ گوستگیں روچ ءَ سریاب ءِ ھند موسیٰ کالونی ءَ بجلی ءِ کرنٹ ءِ لگگ ءَ دہ سالی ئیں یاسر ء اختر مھمد کاکڑ بیران بیتگ –

ھمے وڑ مستونگ ءَ سادات ءَ پسانی پِڑی ءَ تیرگواری ءَ یک مردمے بیران بیتگ –

سادات ءَ پسانی پِڑی ءَ ناکو زتکانی زمین ءِ جیڑہ ءِ سر ءَ تیرگواری بیتگ ءُ چریشی ءَ مھمد اسلم شیخ بیران بیتگ –

پولیس ءَ جون چِست کرتگ ءُ نادراہ جاہ ءَ سر کرتگ ءُ اود ءَ اژدری چار ءُ ٹپاس ءَ پد جون کھول ءِ ھوالگ ءَ کنگ بیتگ –