نبشتانک: ماتی
نبشتہ کار: میرین زھری
دی بلوچستان پوسٹ
مات ءِ نام ءَ کہ آئی ءِ پُر مِھریں سکیناں من ءَ گوں زمین ،جھان ، انسانیت ءُ دنیا ءِ درائیں چیزاں گوں مھر کنگ سوج داتگ، آئی ءَ منی لنکُک گپتگ ءُ من ءَ گام جنگ ءِ سکین ءِ داتگ۔
آ منی زند ءِ آدینک اِنت چی ءَ کہ آدینک ھجبر دروگ نہ بند ایت مات ھما ھمراہ اِنت کہ بے متلب ءَ گوں تو زندگی ءِ درائیں تکاں ھمراہ داری کتگ۔
من ءَ یات اِنت برے برے ما شپ ءَ بے وھد ءَ گِس ءَ واتر بوتگیں تاں بے تواری ءَ پُترتگ اِنت کہ مئے چمپل توار مہ کن اَنت کہ بلکیں مات مئے مات چرے کارپد ءَ نہ وش بہ بیت بلے پُترگ ءَ گوں دیستگ کہ آ تاں انگت ھاگاہ اِنت، نہ وپتگ، منی ودار ءَ نِشتگ۔
آ ھما ھستی اِنت کہ من ءَ اولی رند ءَ جنگ کنگ ئِے سکینے داتگ پہ وتی ھک ءَ جنگ کنگ ، پہ کوریں چاگرد ءَ جنگ کنگ ءُ وتی کَش ءُ کِرے ھرابیانی ھلاپ ءَ جنگ کنگ آئی ءَ من ءَ مدام گُشتگ ناں تو دگرے ھک ءَ بہ وَر ءُ ناں وتی ھک ءَ دگر ءَ بہ دے- اگاں کسے تئی ھک ءِ ورگ ءِ جھد ءَ کنت آئی ءَ بہ کُش ءُ اگاں زرورت کپت وت ءَ ھم بہ کُشارین بلے وتی ھک ءَ ھجبر یلہ مہ دے-
منی باجنیں مات ھروچ جنگ ءَ اِنت گوں کوریں چاگرد ءَ کرّیں پدریچ ءَ گوں گُنگیں اھد ءِ زوراکاں تاں انگت دم نہ برتگ۔
مدام جھد ءُ جھد ءَ اِنت گھگیری کنگ ءَ اِنت برے شال ءِ سارت ءُ برپ بادیں پھنات ءَ، برے کراچی ءِ روکیں دگانی سر ءَ سپر جنگ ءَ اِنت کُکار ءَ اِنت توار پِر جنگ ءَ اِنت کہ مدتے بیت منی برات زندان ءَ بندیگ اِنت۔
تھنا برات بندیگ نہ اِنت بلکیں مئے گِس ءِ دْراھیں وشی زنداناں بندیگ اَنت تھنا مئے چمانی چراگ بیگواہ نہ اِنت بلکیں مات ءِ لُنٹانی سر ءِ شیرکنیں بچکندگ گوھارانی لاڑکیں واھشت زھگانی کودکیں ارمان بیگواہ اَنت۔
ھما مات ءِ لُنٹانی سر ءَ من بچکنداں اَبید دگہ ھچ نہ دیستگ بلے نوں سک دیر اِنت کہ آئی ءِ چمانی ارس چو ھور ءَ شنزان ءُ مسکیں زمین ءِ دلبند ءَ رِچان اَنت۔
بلے من دلجماں اے ارس ءُ اندوہ ءُ درد ءُ کولنج منی مات ءَ نزور نہ کن اَنت آ یک مھکمیں انسانے آ ھزار درد ءُ دوراں اَبید ھم مارا تسلہ دیگ ءَ اِنت کہ اے کھریں ازابانی روچ گوز انت الم ءَ یک پُر ایمنیں سھبے ماں مئے گیدی ءِ دلبند ءِ سر ءَ کشّ ایت۔
ماتی جان من اشی ءَ ھم زاناں کہ تو شھر پہ شھر، دگ پہ دگ گِنداں من وتی ھستی ءَ چہ ھلاس باں ھما مات کہ من ءَ چم ءِ چارگ ءَ دل نہ بیتگ آ سرجمیں شپ مُسلہ ءِ سر ءَ نشتگ ءُ پریات کنت آئی ءِ چیھانٹاں ارشے سر ءَ زُرتگ منی سینگ ءَ دردانی چیھانٹ رُدَنت، نزور تَرّاں، بلے پد ءَ کہ آئی ءِ توکل ءُ توان ءَ گنداں کہ ھَمُک جاور ءِ دیم ءَ پہ تمردی اوشتاتگ تاں من گیش دلجم ءُ مھکم باں۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔