بلوچستان ءَ گوستگیں بیست ءُ چار ساھتانی تہ ءَ چار کس بیگواہ بیتگ اَنت

بلوچستان ءَ یک نیمگے ءَ مردم یل کنگ بیگ ءَ اَنت ءُ دومی نیمگ ءَ مردمانی آوار جنگ ءُ بیگواہ کنگ ترندی ءَ گندگ ءَ آیگ ءَ اَنت –

بلوچستان ءِ جتا جتائیں جاھاں گوستگیں بیست ءُ چار ادارانی تہ ءَ چار کس آوار جنی ءَ پد بیگواہ کنگ بیتگ اَنت –

آوار جنگ بیتگیں مردمانی پجار سعد اللہ ء ھاجی ھمید جھمنند پنجگور گرمکان، شھمیر ء بدل جھمنند تربت ھیرونک، ھبدہ سالی ئیں جواد بلوچ جھمنند مستونگ ءَ بابل بلوچ جھمنند مستونگ ءِ ناماں زانگ بیتگ اَنت –

اشانی تہ ءَ سعد اللہ گوستگیں شپ ءِ بامسار ساھت پنچ ءَ گرمکان ءَ پاکستانی پوج ءُ چیریں ادارھانی کارمنداں چہ لوگ ءَ آوار جتگ ءُ برتگ –

شھمیر ء بدل گوستگیں شپ ءِ ساھت یک ءَ تربت ھیرونک ءَ پاکستانی پوج ءُ چیریں ادارھانی کارمنداں چہ لوگ ءَ آوار جتگ ءُ برتگ، کہ شھمیر ءِ ھواری ءَ دگہ دو کس ھم برگ بیتگ اَنت کہ آیانی نام نزیر ءُ آئی ءِ یازدہ سالی ئیں زھگ ھوار اَنت –

ھمے وڑ مستونگ ءَ ھبدہ سالی ئیں جواد بلوچ ھم پاکستانی پوج ءَ آوار جتگ ءُ برتگ کہ چریشی ءَ پیسر جواد ءِ ناکو زھگ بابل بلوچ ھم پاکستانی پوج ءَ آوار جتگ ءُ برتگ –

بیگواھیں راشد ھسین ءِ گوھار فریدہ بلوچ ءَ ٹوئٹر ءَ بابل بلوچ ءِ اکس شنگ ءُ نبشتگ کرتگ کہ بیگواھیں مردمانی لَڑاں یکے گیش بیتگ –

فریدہ بلوچ نبشتگ کنت کہ بلوچستان ءَ ورنا گچین کنگ ءُ برگ بیگ ءَ اَنت کہ اے بلوچانی نسل ءِ گاری ءِ پژدر اِنت –

ھمے وڑ اسرار بلوچ ءَ ٹوئٹر ءَ نبشتگ کرتگ کہ منی ناکو زھگ بابل بلوچ ءُ منی ورنائیں برات جواد بلوچ پاکستانی پوج ءُ چیریں ادارھاں آوار جتگ ءُ برتگ اَنت –

ھمے وڑ بلوچستان ءَ گار ءُ بیگواھیں مردمانی واستا توار چِست کنوکیں گل وائس فار بلوچ مسنگ پرسنز ءَ پیس بک ءَ نبشتگ کرتگ کہ باید سرکار چاردہ اگست ءَ سرجمیں بندیگیں بلوچاں یل بہ کنت ءُ گمزدگیں کھولاں وشھال بہ کنت –

بلوچستان ءَ گار ءُ بیگواھیانی درچ یک نہ کُٹوکیں وھدے ءَ برجاہ اَنت ءُ تنی وھدی ھزارانی کچ ءَ مھلوک گار ءُ بیگواہ اَنت-

گار ءُ بیگواھیں مردمانی کھول یکشل ءَ پریس کلبانی دیم ءَ زھرشانیاں گندگ ءَ آیگ ءَ اَنت –

ھمے وڑ گوستگیں وھداں بیگواھیں مردمانی کھولاں پاکستان ءِ بنجاھی شھر اسلام آباد ءَ بازیں روچاں نندانکی زھرشانی کرتگ اَت –