اوگانستان ءَ برجاھیں جنگ تالبیان ءُ اوگان لشکر ءِ جنگ بازیں جاھاں برجاہ اَنت چرے جنگانی پژدر ءَ مروچی اوگان ءِ لشکر ءِ نوکیں سروک ءُ کماندار گچین کنگ بیتگ اَنت-
اوگان دیمپانی کارگس ءِ رِد ءَ اوگان راجی لشکر ءِ سرکماش ولی مھمد اھمزی ءَ ھوار دگہ بازیں جنگی کماندارانی اُگدہ بدل کنگ بیتگ اَنت۔ راجی لشکر ءِ اُگدھدارانی بدلی ءُ نوکیں جنگی کماندارانی دیم ءَ آرگ میریٹ بیسڈ ءُ تالبان ءِ ھلاپ ءَ جنگی تب ءِ بدلی ءَ ھژدری اَنت۔ اے درگت ءَ اوگان دیمپانی وزیر بسم اِلہ مھمدی ءِ پاگواجھی ءَ راجی لشکر ءِ مستریں بُنجاہ(ھیڈکوارٹر) ءَ یک مراگشے ھم اڈ دیگ بیتگ کہ آئی ءِ مھمان اوگانستان ءِ راجی پھزگ ءِ سوجکار ھمد اُلہ مُھب ءَ اَت۔
ماں اے مراگش ءَ جنرل ھبت اُلہ اَلیزی ءَ دیمروئی دیان ءَ اوگان راجی لشکر ءِ سرکماش ءُ اوگان راجی لشکر ءِ نامداریں جنگی کماندار جنرل سمی سھادت ءَ دیمروئی دیان ءَ اوگان کماندارانی سرکماشی ءِ اُگدہ دیگ بیتگ۔ ما اِے مراگش ءَ اوگان راجی لشکر ءِ نوکیں سرکماش جنرل ھبت اُلہ الیزی ءَ راج ءَ باوری دات ءُ گْوشت کہ اے جنگ ءَ ما الم ءَ باج بر ایں۔ ما ماں یک تْرُندیں رشتے ءَ جنگی ساز ءُ ساماناں پہ اُرشاں روان کنگ ءَ ایں، مئے گور ءَ جنگی بالیگراب، ٹینک، ٹوپ ءُ لشکر ھست ءُ ما گوں ھُدا ءِ ھُکم ءَ اے جنگ ءَ کٹ ایں۔
دیم ءَ گُشتانک ئِے دیان ءَ گْوشت ئِے کہ دژمن وتی اے کسانیں وھدے ءِ باج ءَ گل مہ بیت چی ءَ کہ ما پہ اسلامی راجمستری ، پہ وتی راجی بیرک ءُ کُران ءِ پھزگ ءَ گُڈی ساہ ءَ ھم ندر کن ایں۔
دومی نیمگ ءَ اوگان لشکر ءَ اوگانستان ءَ بیست ءُ چار ادارانی تہ ءَ 217 تالبان جنگول کُشگ ءُ 108 ٹپی کنگ ءِ ھال شنگ کرتگ اَنت –
اوگان راجی پھزگ ءَ وتی ھمروچی ئیں ٹیوٹر جاراں گْوشتگ کہ گْوستگیں بیست ءُ چار ادارانی تہ ءَ اوگان راجی لشکر ءَ وتی تْرُندیں جنگی اُرشاں 217 تالبان جنگول کُشتگ اَنت ءُ دِگہ 108 ٹپی کرتگ اَنت۔
راجی دیمپانی ءِ کارگس ءَ گیشتریں سرپدی دیان ءَ گْوشتگ کہ اوگان راجی لشکر ءَ اِے ٹوھیں جنگی اُرش ولایت نگرھار، گزنی، پراہ، ھِرات، پریاب، بلگ ھِلمند کندوز ءُ کاپیسا ءِ ھند ءُ دمگاں کرتگ اَنت۔
راجی دیمپانی ءَ وتی یکشلیں ٹیوٹر پیگاماں گیشتریں سرپدی یے دیان ءَ گْوشت کہ گوریچی ولایت بلگ ءِ چمتال ءُ ڈھدادی دمگاں اوگان راجی لشکر ءِ بالیگُراباں ارش کنان ءَ ناشرکاریں تالبان ءِ بلاھیں جنگی کماندار مُلا نبی پنام اکا تُرکی گوں دِگہ 18 جنگول ءَ کُشگ بیتگ ءُ دِگہ 4 زدگ کُتگ اَنت۔ اے اُرش ءَ ایشانی دست ءِ دْراہ سِلاہ ءُ اسراتی ھم تباہ بوتگ اَنت۔ ھمے پیم ءَ ولایت کندھار ءِ زَھرائی، دھمان ءُ ڈند ءِ دمگاں اوگان راجی لشکر ءِ جنگی بالیگُرابانی بمب گْواری ءُ راجی لشکر ءِ جنگی اُرشاں 121 ناشرکاریں تالبان جنگول کُشگ ءُ دِگہ 15 ٹپی بوتگ اَنت۔ اے اُرشانی آسر ءَ تالبان ءِ 2 موٹل،1 پرپٹ ءَ ھوار بازیں جنگی سلاہ ءِ کوت ھم تباہ کنگ بوت اَنت۔
ولایت ھِرات ءِ دمگاں ھم اوگان راجی لشکر ءُ راجی آشوبی سِلاھبندیں گلانی اُرشاں ناشرکاریں تالبان ءِ 21 جنگول کُشتگ ءُ دِگہ 13 زدگ کُتگ اَنت، اے اُرشاں تالبان جنگی ساز ءُ سامان ھم تباہ کنگ بوتگ اَنت۔
زانگ بہ بیت کہ چہ ایشی ءَ پیشی روچ ءَ اوگان ءِ راجی لشکر ءِ تْرُندیں جنگی اُرشاں 439 تالبان جنگول کُشگ ءُ 77 ٹپی بیتگ اِت اَنت۔ اوگان راجی لشکر ءَ ھمے جنگی اُرش ولایت نگرگار، لوگمان، لوگر، پکتیا، اُرزگان، زابُل، گوھر پراہ، بلگ ھِلمند، کاپیسا ءُ بلگان ءِ ھند ءُ دمگاں کرتگ اَت اَنت۔