نبشتانک: گُڈّی دیدار
نبشتہ کار: ڈاکٹر شکیل بلوچ
دی بلوچستان پوسٹ
آئی ءَ گْوشت کہ من ترا رُکست نہ کن آں پرچا کہ تو منی ارواہ ءَ گوں بندوک ئے، بہ گند ئے اِے منی ءُ تئی گُڈّی دیدار اِنت، باندات ءِ روچ ءَ بِہ گند ئے من ءُ تو دوچار مہ کپ اَنت، بلے منی ءُ تئی میان ءَ بازیں ھیال، ترانگ، یات، زھیر ءُ مِھر پشکپتگ اَنت-
مِھروان! وھدے کہ من ایوک بہ آں گُڑا تئی ھمے پشکپتگیں ھیال، یات، ترانگ ءُ زھیر من ءَ بے تاھیر کن اَنت ءُ بے کساس من تئی ترانگاں کپ این اَنت، اِے ساھتاں منی ارواہ سرجم ءَ تئی باتِن ءَ ایر کپ اِیت ءُ منی ارواہ نپَس بند بِیت ءُ دل درد کنت بلے منی جان ءِ کُجام درد ءُ اندوہ، منی ژانگولیں ارواہ ءِ اِے نپَس بندی کہ گْوں ترا بندوک اَنت من ءَ ھم چہ وت ءَ دوستر اَنت من ءَ تئی داتگیں درد ھم چہ وت ءَ دوستر اَنت پرچا کہ تو منی زندمان ءِ اولی ءُ گُڈّی مِھر ئے، چہ تئی مِھراں من زندمان ءِ زگریں بِزانت پَھم اِتگ، چہ تئی داتگیں درداں من کازماس ءِ زیبائی ءَ را چْو کوہ مراد ءَ زیارت کرتگ-
بلے تو گپّے زان ئے تئی داتگیں درد من ءَ چو پیر ءُ آجزیں زالے ءِ سریگی ڈکّے ءِ پیم ءَ وتی زِرد ءِ گُشان ءَ ڈکّ داتگ ءُ ھر جاہ، ھر دمان ءُ دل ءِ ھر دِریکگ ءَ گْوں من ءَ گْون اَنت۔
مِھروان من ترا گْوشگ لوٹ آں کہ تو انچش گْوں من ءَ بندوک ئے ءُ انچش منی جان ءِ رگ رگاں ایر کپتگ ئے کہ تو منی ساہ ءِ کشّگ ءَ ھم گْوں من ءَ گْون ئے گْوں۔
مِھروان من وتی زِندمان ءِ گْرانتریں کِسّھے گْوں ترا مرچی درشان کنگ لْوٹ آں، مرچی سُھب ءِ سمین کشّگ ءَ اِنت ءُ من ءَ بے کساس تو یات پیداک ئے، من ترا پْیسر ءَ ھم اِے گپ گْوشتگ اَت کہ تو منی زندمان ءِ ھر پِڑ ءَ گْوں من ءَ بندوک ئے،
مِھروان گْوش بِہ دار، مرچی من ءَ وھدے کہ سُھب ءِ وش دابیں سمین ءَ تئی ترانگ ءَ گْیج اِت، اِے ساھت پہ من ءَ بھِشت ءِ ندارگاں چہ کمتر نہ اَنت، شال ءَ من ءَ وتی گرمیں زانسرانی سر ءَ واپینتگ، بلے من ءَ تو بے کساس یات پیداک اَت ئے، مرچی منی دل ءَ ھمے لْوٹ اِت کہ من چہ ترا بے ھیال بِہ باں ءُ منی ژانگْولیں جبین چہ تئی کُنٹگیں یات ءُ زھیراں ھْورک ءُ ھالیگ بِہ بیت۔
بوت کنت اِے منی کْوریں بھادری اَت کہ من لْوٹ اِت کہ تئی کوھیں زھیراں گْوں وتی نِزوریں کوپگاں بَڈ ءَ بہ کن آں ءُ چہ دل ءِ دیار ءَ در اِش بہ کن آں بلے وھدے من وتی اولی گام ایر کرت منی نپَس بند بُوت ءُ بے سماہ بوت آں، ساھتے ءَ پد وھدے کہ من سماہ کرت من چار آں تئی یات، زھیر ءُ ترانگ نوں پَھک ءَ گْوں منی ارواہ ءَ بندوک اَنت، وھدے کہ من تئی یاتاں چہ دل ءَ در کنگ بِہ لوٹ آں گُڑا منی ارواہ ھم بال کنت ءُ روت، ھشکیں جْوں پَشکپ اِیت۔
مھروان تئی گپ ءُ ھبَر، تئی دُرّیں دانکاں من کدی ھم بے ھیال کرت نہ کن آں، پرچے کہ من وتی ھیالانی دنیا ءِ سرجمیں کوہ ءُ کوچگ، زید، ھلک ءُ میتگ گْولتگ اَنت بلے من ھر چیز ءَ چار آں منی چمّانی دیم ءَ تئی اکس اِنت تو انچش منی باتن ءَ ایر کپتگ ئے کہ من چار آں ترا گِند آں وت ءَ، وھدے کہ من چاراں وت ءَ گِند آں ترا، بس من ءُ تو انچش ھمگرنچ اَنت کہ کدی جِتا بوت کرت نہ کن آں –
مِھروان ھما اِنت کہ تو رپتگ ئے، تئی ھما گپ ءُ تران، تئی کندگ ءُ مسکرا، من ءَ چو سِیپارگ ءَ یات اَنت تئی ھما گُڈّی بچکندگ کہ تو رھادگ بوت ئے چَک تر اَینت ءُ یک بچکندگے سوگات کرت، تئی اِے بچکند انگت منی چمّانی دیم ءَ نکش اِنت۔
مِھروان اِے گپ ءَ من ھم زان آں کہ تو چہ من ءَ دور رپت ءُ شت ءُ بلے منی دل اِے گپ ءِ منّگ ءَ کدی ھم تیار نہ اِنت کہ تو چہ من ءَ دور ئے۔
پمیشکا من ترا گْوشت کہ من ترا الوِداہ نہ کن آں پرچے کہ تو منی ارواہ ءَ گْوں بندوک ئے، بے ترا منی ارواہ یک شانتلے بیت ءُ زَھیر نالان کنت ءُ دردانی جنگل ءَ کُوکُو کنان کنت ءُ روت۔ بس منی گُڈّی ھبَر ایش اَنت کہ تو چہ من ءَ دور نہ ئے ءُ من چہ ترا جِتا نہ اوں۔ تئی یات، زھیر ، ترانگ، درد، بچکندگ گْوں منی ارواہ ءَ بندوک اَنت ءُ زندمان ءِ گُڈّی ساھتاں ھم تو من ءَ گیر کا ئے، تاں زندمان ءِ گُڈّی ساہ ءِ کشّگ ءَ من ءُ تو ھْوار آں۔ پمیشکا من ترا الوداہ نہ کرت پرچے کہ تو منی ارواہ ءَ گْوں بندوک ئے۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔