شال ءَ بیگواھیں مردمانی ھاتر ءَ زھرشانی برجاہ

چہ تاکت ءُ زوراکیاں مردماں آھانی راجی ھکانی جھد ءَ دسکش کنگ ناممکن انت – ماما قدیر بلوچ

بلوچستان ءِ بنجاھی شھر شال ءَ بیگواھیں مردمانی یل کنائینگ ءِ ھاتر ءَ وائس فار بلوچ مسنگ پرسنز ءِ زھرشانی برجاہ، زھرشانی ءَ مروچی چار ھزار ءُ چار سد ءُ شش روچ سرجم بوتگ، زھرشانی بنجل ءَ مروچی سیاسی ءُ چاگردی باسک عبدالمجید دشتی، ایڈوکیٹ اسرار شوھاز، زیور خان بلوچ ءُ دگہ مردماں اتکگ ءُ دلپدردی درشان اتگ-

ھمے وھد ءَ وائس فار بلوچ مسنگ پرسنز ءِ رھشون ماما قدیر بلوچ ءَ اتکگیں مردمانی گوم ءَ تران کنان ءَ گوشتگ کہ بیگواھیں مردمانی ھاتر ءَ پُرایمنیں جُھد مدامی برجاہ دارگ بیت اِنت ءُ بیگواھیں مردم ءُ آھانی کھولاں گوں ھمدردی داروکیں مردم اے جھد ءَ مئے ھمراہ داری ءَ بہ کن انت –

آئی ءِ گوشگ ات کہ اے وھدی بلوچستان ءِ تہ ءَ بیگواھیں مردمانی جیڑہ گیش ھراب تر بوان انت –

آئی ءِ گوشگ ات کہ پاکستانی آمیدگس ءِ بیگواھیں مردمانی درگت ءَ پیشی ءُ ارزی بس یک ڈرامھے بوتگ پرچاکہ بے رھبند ءُ بے کانون ءَ آوار جنی وئیلانی تہ ءَ گیشتری اتکگ –

آئی ءِ گوشگ ات کہ آمیدگس چہ بیگواھیں مردمانی یل بوگ ءِ ھکم دیگ بیت اِنت بلے مردم یل نہ بنت بلکہ اھانی زانگولیں جون دست کپ انت –

آئی ءِ گوشگ ات بیگواھیں مردمانی جیڑہ انسانی بنیاداں گیش ءُ گیوار کنگ ءِ زلورت انت-

تاکت ءُ زوراکی ءَ چہ مردماں آھانی راجی ھکانی جھد ءَ دسکش کنگ ناممکن انت –

دومی نیمگ ءَ وائس فار بلوچ مسنگ پرسنز ءَ وتی دگہ جار ءَ مردماں چہ لوٹ کتگ کہ سرکار ءَ چہ گل ءَ بیگواھیں مردمانی لڑ ءِ لوٹ کرتگ ھما بیگواھین مردمانی کھولاں وتی دوستیگیں مردمانی کیس گل ءَ سر نہ کرتگ اَنت گڑا آ زوتاں زوت گل ءَ کیس ءَ بہ دے اَنت تانکہ آ کیس سرکار ءِ کرا نبشتہ کنائینگ بہ بنت –

وائس فار بلوچ مسنگ پرسنز ءِ سرکماش نصراللہ بلوچ ءَ بیگواھیں مردمانی کھولاں چہ لوٹ کتگ کہ آ بنجل ءَ بیا انت وتی دوستگیں مردمانی کیس ءَ نبشتہ بکنائین انت-