بلوچستان ءِ سَے جتاجتائیں دمگاں پاکستانی فوج ءِ سر ءَ ناشناسیں سلاہ بنداں اُرش کتگ

اُرش پنجگور، ھرنائی ءُ کیچ ءَ پاکستانی فوج ءِ سر ءَ ناشناسیں سلاہ بندیں مردماں اُرش کتگ-

سر بیتگیں ھالانی رد ءَ پنجگور ءِ دمگ پنجگور ءِ دمگ وشبود ءَ کسٹم ءِ ھند ءَ سی پیک دگ ءِ سر ءَ تر ءُ تاب کنوکیں پوجی کارمندانی سر ءَ سلاہ بندیں مردماں اُرش کرتگ –

دمگی مردمانی رد ءَ اُرش ھما وھد ءَ کنگ بیتگ کہ پوجی گاڑی تر ءُ تاب ءَ بیتگ کہ ناشناسیں مردماں گاڑی چیر کرتگیں بمب ءِ نشانگ کرتگ –

ھمے وڑ ھرنائی ءِ دمگ شاھرگ ءَ پاکستانی فوج ءِ پرپٹ سواریں کارندھانی سر ءَ زردآلو ءِ راہ ءِ سر ءَ چیرکتگیں شورواں گوں نشانگ کتگ اَنت چریشی ءِ آسر ءَ فوج ءِ کارندھاں جانی تاوان ءِ گمان اِنت-

اُرش ھما وھد ءَ کنگ ءَ بوتگ کہ فوج ءِ کارندہ زرد آلو ءِ نزیکیں چیک پوسٹ ءَ چہ درتکگ اَنت-

وھدیکہ دومی اُرش گوستگیں شپ ءَ بلوچستان ضلع کیچ ءِ تھسیل تمپ ءِ دمگ تگران آباد چوکی ءِ سر ءَ ناشناسیں سلاہ بندیں مردماں جتاجتائیں سلاھاں گوں اُرش کتگ ءُ چریشی ءِ آسر ءَ تیرگواری ءُ تراکانی توار دیر دیر ءَ اِش کنگ بوتگ اَنت-

سرکاری بنشون ءِ نیمگ ءَ اے اُرشانی بوتگیں تاوانانی گپ دیم نیتکگ-

زانگ بہ بیت بلوچستان ءِ اے دمگاں گیشتر بلوچ آجوئی لوٹوکیں سلاہ بندیں گلاں زمہ واری زرتگ اَنت ءُ انگت اے دوئیں اُرشانی زمہ واری انگت ھچ گل ءَ نہ زرتگ اَنت-