روکپتی بلوچستان ءِ بازیں جاھاں شریں نادراہ جاہ ءِ نہ بوگ ءَ کرونا ویروس ءَ مھلوک تکانسر

روکپتی بلوچستان ءَ سر بیتگیں ھالانی رد ءَ جھانی وبا کرونا ویروس ءِ نادراھی ءَ بازیں مردمے مرگ ءِ دیمپان بیتگ اَنت کہ اشانی گیشتریں سبب روکپتی بلوچستان ءَ بندوکیں چاردہ شھراں جوانیں نادراہ جاہ ءِ نہ بوگ ءِ سبب گوشگ بیگ ءَ اِنت –

ھالانی تہ ءَ گوشگ بیتگ کہ ھما شھراں اگاں کمے کساس نادراہ جاہ ھست اَنت گڑا اود ءَ ڈاکٹر ءُ درمان کنوک گیش ھما جاھانی مھلوک ءَ نہ رس اَنت گوں –

ھالانی تہ ءَ گوشگ بیتگ کہ دزاپ، واش، شستون، پھرہ، نصر آباد، چھبار ءُ میناب ءِ نادراھجاھانی جاور نگیگ اَنت کہ چریشی ءَ اود ءَ مھلوک ءِ ھمپان ءَ اَنت –

آیانء گوشگ اِنت ھمے جاھاں کمے ڈاکٹرانی سبب ءَ بازیں مھلوکے مرگ ءَ وتی ارجان جتگ اَنت –

ھمے وڑ ءَ چاگردی مھلوک ءَ گُشتگ کہ روکپتی بلوچستان ءَ اگاں کرونا ویروس ءِ گیش تالان بیگ ءِ سبب ایش اِنت کہ اد ءَ چاردہ شھراں نادراہ ءِ نہ بوگ ءِ بروبری اِنت کہ چریشی ءَ مھلوک بازیں اڑ ءُ جنجالانی دیمپان اَنت –

آیانی گوشگ اِنت باید سرکار مھلوک ءِ سر ءَ دلگوش بہ کنت ءُ اے دمگاں کہ نادراہ جاہ ءُ درمانی نیست باید اے جاھاں نادراھجاھانی واستا بکس ءُ بند ءَ بہ کنت –

آیانی گوشگ اِنت کہ اگاں اے جاور بلوچستان ءَ بیت اَنت گڑا اد ءَ جھمنندیں مھلوک گیش تکانسر بیت کُت کنت –