ٹی بی پی ءِ چاگردی رسانکجاھانی اھوالکار ءِ رد ءَ گوستگیں روچ ءَ وھدے کہ ولایت ھرات شھر ءَ اوگان راجی لشکر ءُ آشوبی سِلاھبندیں گلاں اوگان تالبان ءِ جنگولاں پْروش دات گُڑا لس مھلوک پہ راجی لشکر ءِ دلبڈی ءُ مھر ءَ “مرگ بات پاکستان ءُ اللہ اُکبر” ءِ اوگاماں جنان ءَ چہ وتی گس ءَ درکپتگ اَنت ءُ شھر ءُ دمکاں روانک ءُ شاتکامی درشان کُتگ اِت۔
ھمے وڑ ءَ ھمے روانک ءُ اوگام چاگِردی رسانکدر ءَ شِنگ ءُ تالان بوتگ اَنت گُڑا ماں ساھتے ءَ ھمے اوگام راجی زرمبش ءُ اوگامے جوڑ بوتگ اِے “اللہ اکبر” اوگام چہ اوگانستان ءَ ڈّن ءَ ھم البار بیتگ اَنت۔ مُھسن داوڑ، ھوشھال کاکڑ ءُ منزور پشتین ءِ وڑیں دگہ بازیں پاکستان ءِ زیردستیں پشتو راجدوستیں گل ءُ رھشوناں ھم چاگِردی رسانکدراں “اللہ اکبر” ءِ اوگام ٹپال کُتگ اَنت۔
زانگ بہ بیت اے اوگام ھما وھد ءَ گیشتر تکشام کنگ بیتگ اَنت اوگان راجی پھزگی وزیر بسم اِلہ مھمدی ءِ گس ءَ وتکشی اُرشی بوت گُڑا کابُل، جلال آباد، مزار شریپ، بلگ، ھرات، زرنج، پنجشیر، بدکشان، نجراب، لشکرگاہ ءُ نورستان ءَ ھوار اوگانستان ءِ ھر شھر، میتگ، دمگ ءُ کوچاں “اللہ اکبر ءُ مرگ بات پاکستان” ءِ اوگام جنَگ بیتگ اَنت۔
کابُل شھر ءَ راجی کُمکّارمستر امر سالہ، تھی کارانی کُمکّار وزیر پواد امن، اوگان پارلیمنٹ ءِ باسک بانُک مریم سلیمانکیل ءُ رھمت الہ نبیل ءِ ڈولیں آزات ھیال، سرکاری اگدار ءُ دگہ راجدوستیں گلاں گوں اگان لس مھلوک ءَ مزنیں روانک کش اِت ءُ ھمے تْرُندیں اوگام جتگ اَنت۔
بانُک مریم سلیمان ءَ بلاھیں روانکے کش اِت ءُ ماں روانک ءَ “مرگ بات پاکستان ءُ مرگ بات تالب” اِے راجی اوگام جتگ اَنت۔ زانگ بہ بیت کہ ایشی ءَ پیسر اوگان راجی کارمستر اشرپ گنی ءَ وتی نِند ءُ نیادے ءَ گْوشتگ کہ اِے جنگ اوگانستان ءُ پنجابی ءِ میان ءَ اِنت ءُ اوگان پھربندیں راج ءَ پنجابی ءَ الم پْروش دیگی اِنت-
دومی نیمگ ءَ ھرات شھر ءَ راجدوستیں رھشون مھمد اسمائیل ھان ءَ وتی یک بیانے ءَ گْوشت کہ اِے جنگ اوگان راج ءُ تالبان ءِ میان ءَ نہ انت بلکیں اوگانستان ءُ پاکستان ءِ میان انت۔
اے وھد ءَ بازیں کچے ءَ چاگردی رسانکجاہ پیسبک ءُ ٹوئٹر ءَ “اللہ ءُ اکبر ” ءِ اوگام ءِ ھواری ءَ اکس ءُ تامر ھم جتا جتائیں پھناتاں بندوکیں مردم شنگ ءُ تالان کنگ ءَ اَنت –
ھالانی تہ ءَ گوشگ بیتگ کہ اے وھد ءَ اوگانستان ءِ بازیں جاھاں تالبان ءُ اوگان لشکر ءِ میان ءَ ترندیں جنگ ءُ چوپ برجاہ اَنت –
اوگان ءِ سلامتی ءِ واستا چاگردی رسانکجاھاں جتا جتائیں تکاں بندوکیں مردم ھم پلامزی کنگ ءَ اَنت –