نبشتانک: گُلزمین ءُ سَمّو
نبشتہ کار: مھم جان گُل
دی بلوچستان پوسٹ
سَمّو! من ءَ تو ءُ گُلزمین ھردو چہ ساہ ءَ دوستر اِت ئے ، تو منی زند ءِ ھر واھِشت ءُ تماھانی یک زیبائیں ھمراھے ءُ زمین منی مات اِنت کہ آئی ءِ مھر ءُ آئی ءِ سارتیں امباز من ءَ نوکیں زندے بکشا اَنت ءُ من ءَ گیش وتی پھازگ ءِ سکین ءَ دنت کہ بدواھاں گوں وتی زُلم ءُ زُوراکاں منی ڈیھ چہ من ءَ پُل اِتگ ءُ منی سارت ءُ ساکمیں سرجاہ چہ منی سر ءِ چیر ءَ چہ پَچ گِپتگ، بِہ گْوش! گُڑا چوش من کُجا وش واب بَہ آں؟ بلے من ءَ اے مارِشت اَچ درکسانی ءَ بیتگ ءُ من جیڑ اِتگ وھدے کہ من رُدان ءُ ورنا بَہ آں گُڑا اے رستریں بدواھاں گوں راھے رواں کہ منی مات پہ زُورانسری وتی گُلام کُرتگ۔
پمیشکا من ھما کاروان ءِ سِپاھیگ بَہ آں کہ آ پہ وتی مات ءِ رکّینگ ءَ کُربان بیتگ اَنت ءُ من اھد کُتگ کہ من ھمے کاروان ءَ گوں ھوار بَہ آں ءُ جُنزان کناں کہ ھزاراں زمین زادگ جُنزان اَنت نوں من رُستگ ءُ مزن بیتگ آں ءُ ھمے کاروان ءِ سِپاھیگے آں کہ وتی مات ءِ پھازگ ءَ گوں بدواہ ءَ مِڑگ ءَ آں ءُ دُژمن سرین پُروش کُرتگ۔
بلے سَمّو! چہ تئی امبازاں من ءَ گیش گُلزمین ءِ امباز وشتر بِہ اَنت ، پرچا کہ وھدے گُلزمین وتی امبازاں پچ کنت ءُ من ءَ توار پِر جنت گُڑا تئی اَمبازانی بوہ ءُ باس ھمود ءَ پَش کَپ اَنت ءُ منی پُرشتگیں بانزُل وتی ھُونی ئیں بالاں چنڈان کنت ءُ گُلزمین ءِ اَمبازاں روت ءُ وت ءَ وتی مُدامی ئیں جاہ ءَ سر کنت کہ اُود ءَ منی مَرگ ءُ زند ءِ ھردوئینانی جاہ اِنت نہ کہ آ من ءَ کشّ اِیت چہ وتی امبازاں ءُ نہ کہ من دَر کا آں، چوشیں پُرمھریں سارتیں چہ اَمبازاں دل نہ گْوش اِیت کہ دَر بیا۔
ترا گْوشاں سَمّو! من ھر وھد ءَ کہ سپر ءَ بَہ آں گُڑا من شُمارا ھردُکاں جیڑاں ءُ جُنزان بَہ آں، پرچا کہ تو منی ودارانی راہ سر ءَ مُدامی نِشتگ ئے ءُ منی راھچاری کُتگ کہ من کدی واتر کناں ءُ تئی چَم من ءَ کپاں ءُ منی دیدار ءَ کلھے بِہ کن ئے ، ءُ من پَمیشکا ترا وتی گِیراں کاراں ءُ ترا جیڑاں پد ءَ زمین ءَ دیم ءَ کناں ءُ ترا چاراں ، پرچا کہ زمین تئی رنگ ءَ جنت ءُ منی نِزُوریں ڈیل ءَ توکل بکشا اِیت ءُ پہ جُنزگ ءَ سکین دنت کہ بِہ جُنز ترا جُنزگی اِنت، گُڑا من سپر ءَ وتی بِنا کناں ءُ جنزاں۔
وھدے من کہ آدمی رستراں گوں ڈیک وراں گُڑا جنگ دے آں ءُ مات ءِ پھازگ ءَ باریں چُنت تیر سینگ ءَ پیوست کناں وتی بلے دست ءِ تُپنگ ھر وھد ءَ دُژمن ءِ دیم ءَ تیراں چنڈان بیت ءُ سر سُجدگ ءَ کدی نہ روت ، پرچا کہ مات ءِ گیرت ءُ ننگ پادمالیں زمین کدی ھم من ءَ پہ دُژمن ءِ دیم ءَ سرجھلی ءَ نیل اَنت چی ءَ کہ داں گُڈّی ساہ ءِ دم کشّگ ءَ مات ءِ پُرمھریں امباز ھر وھد پَچ اَنت پہ وتی مزاریں بچّاں کہ بیا اِت منی کُنگراں پھریز اِت وتی مات ءَ کہ بوٹ پادیں سِپاھیگانی دیمپان اِنت۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔