نبشتانک: ھُردلُک ءِ وش لسانیں ندارہ
نبشتہ کار: نئیم مؔومن
دی بلوچستان پوسٹ
چو مُدامی ءِ ڈول ءَ یک روچے من شُت آں پہ زر ءِ سَیل ءَ ءُ من نشت آن ءُ نِیلین زِر ءِ ندارہ ءَ چارگ ءَ ات آں نِلیں زر سک براھدار ءُ سَبز اَت چول چو گُلام ءِ پیم ءَ بندیگ اَت اَنت کہ وتی ھَد ءَ چَہ دیم آیاں ءَ روگ ءِ موکل نیست اَت ءُ ھمک چول ءِ جْھد ھمیش اَت کہ من دیم ءَ برو آں ۔
سُھب ءِ مھالہ اَت دگہ کس نیست اَت تیوگیں چاگرد ابیتک اَت ، اود ءَ من ات آں ءُ نِیلیں زر اَت گُڑا ھمے دمان ءَ منی چمانی دیم ءَ دُور یک مردمے دَرا بوت ءُ گوں وتی دزگْوھاراں ماں دریا ءِ کرّا تَرّ ءُ تاب کنان ءُ پیداک اَت اَنت ، زر ءِ چولانی توار ءَ ھوار آئی کندگانی چڑکہ منی گُوشان کپت اَنت ءُ دل تاھیر گران بوت آ پہ کھیبے لُڈان ءُ دریا ءِ چولاں گْوازی کناں اَت گوں وتی مھروانیں دزگْوھاراں دریا ءِ چول چو گنوک ءِ داب ءَ آئی پادانی تام ءَ چُکّان اَت اَنت بلے آ را سَما نیست اَت کہ دریا من ءَ سُجدہ کنگ ءَ اِنت ءُ دریا ءِ ھمک چول پہ آئی دْروشم ءِ چارگ ءَ کتار اَت اَنت، من ھمے مار اِت کہ گوں من ءَ ھوار چَپ ءُ چاگرد ءِ دْرستیں چیز ھما را دیدار کنگ ءَ اَنت سُھب ءِ وھد اَت ءُ زِر نوک جَوان اَت سُھب سمین ءِ کَوش ژپ ژپ ءَ گوں آئی شِپار ءُ سْیائیں ملگوراں لیب کناں اَت ءُ سْیائیں ملگور کُوپگانی سر ءَ شیپ گِران اَت اَنت ھردلُک ءَ گُل ءُ کانٹلیں گُشان کُوپگ ءَ اَت سُھب ءِ سْیاہ دیمیں نود چو شے مرید ءِ وڑ ءَ اوشتاتگ ءُ آئی ءِ بالاد ءَ ندارہ کنگ ءَ اَت اَنت ۔
گوں وش لسانیں دْروشم ءِ چارگ ءَ من ھم لھم لھم ءَ بےچاڑ بُوان اَت آں ءُ پہ منی نِزّ ءَ تیوگیں دریا آئی ءِ دیم ءَ یک ٹِکے ءِ داب ءَ اَت ءُ چَہ آئی ءِ دْروشم ءِ زیبائی ءَ منی چمانی دیم ءَ تھاری یے مانشانگ ءَ اَت ءُ من گنوک ءِ پیم ءَ ریکانی تہ ءَ کپتگ اَت آں دل آئی ءِ ھیالانی لَداں گار بُوان ات آ لھم لھم ءَ داب کناں منی نیمگ ءَ پیداک ات ، وھدیکہ آ اتک ءُ چَہ من ءَ کمو دُور نشت گوں دزگْوھاراں ءُ دریا ءِ ندارھے چارگ ءَ لَگ اِت، گوں آئی ءِ ٹھکانی توار من مَلار بُوان اَت آں ءُ منی زِرد گوں ھیالاں ھمگرنچ بوت ۔
بارگیں بالاد ، کُبلیں بُروان ءُ کُماریں دیدگاں ئِے منی زرد چو کاٹار ئیگ ءَ زدگ کُت من ھنچو مار اِت کہ من اے کُوڑھیں امروز ءَ جنّتی ھورے گِندگ ءَ آں دل ءَ گْوشت مُدام بہ نند آئی ءِ پیشانی ءَ ندارہ کن ھمے وڑ ءَ من ھیالی دگنیا ءَ گار بوت آں ھردلُک گوں وتی دزگوھاراں چَہ منی دیم ءَ پاد اَتک ءُ رواں بوت-
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔