شال ءَ بیگواھیں مردمانی ھاتر ءَ زھرشانی برجاہ

بلوچستان ءِ بنجاھی شھر شال ءَ پریس کلب ءِ دیم ءَ وائس فار بلوچ مسنگ پرسنز ءِ زھرشانی برجاہ، زھرشانی ءَ مروچی چار ھزار ءُ سَے سد ءُ ھشتاد ءُ نُھ روچ سرجم بوتگ – سیاسی ءُ چاگردی باسک ریاض بلوچ، نزیر بلوچ ءُ دگہ پگرانی منوگراں بنجل ءِ تر ءُ تاب کرتگ ءُ بیگواھیں مردمانی کھولانی گون ءَ دلپدردی درشان اتگ –

ھمے وھد ءَ وائس فار بلوچ مسنگ پرسنز ءِ رھشون ماما قدیر بلوچ ءَ اتکگیں مردمانی میان ءَ تران کنان ءَ گوشتگ کہ سال دوھزار ءَ چہ بندات بوتگیں لشکر کشی روچ ء مروچی یکشل ءَ برجاہ انت ءُ ھمک روچ آئی ءِ تہ ءَ گیشی آرگ بوگ ءَ انت ءُ بلوچستان ءَ راجکاری ءِ سر ءَ بندش جنگ بوتگ کہ اود ءَ سیاسی باسکاں پاکستانی پوج آوار جنت ءُ وتی زنداناں بندیگ کنت –

ماما قدیر بلوچ ءِ گوشگ ات کہ اے زوراکی ءَ ناکہ تھنا مردین نشانگ بوگ ءَ انت بلکیں اے زلم ءُ زوراکیاں چُک ءُ زالبول ھم نہ بچ اِتگ انت گوستگیں روچ ءَ پاکستانی پوج ءَ کیچ گومازی ءَ لشکر کشی ءِ میان ءَبانک کیگد شھید کرتگ اشی ءَ پیش ھم پنجگور، کیچ ءُ بلوچستان ءِ جتاجتائیں دمگاں ھمے وڑ زالبول ءُ چُک پوج ءِ زلم ءُ زوراکیانی دیمپان انت –

ماما قدیر بلوچ ءِ گوشگ ات کہ میان استمانی ادارھانی پرز انت کہ آ چہ پاکستان ءَ بلوچستان ءِ تہ ءَ بیوکیں زلم ءُ زوراکیانی پسّو ءَ بہ لوٹ ایت ءُ بلوچاں وتی سرڈگار ءِ سر ءَ نندگ ءِ آزاتی دیگ بہ بیت کہ ھر یک انسانے ءِ بُنکی ھک انت –

ماما قدیر بلوچ ءَ دگہ یک تامری درشانے ءَ گوشتگ کہ پی ٹی ایم ءِ رھشون علی وزیر پشتونانی ھکانی توار چست کنگ ءِ ھاتر ءَ آوار جنگ ءُ بندیگ کنگ بوتگ کہ آئی ءِ تب ناجوڑ انت ءُ جیل ءِ تہ ءَ آئی ءَ ھچ وڑیں چیز دیگ بوگ ءَ نہ انت آئی ءَ گوشتگ کہ من وی بی ایم پی ءِ رھشون ءِ بستار ءَ پشتون راج ءِ گون ءَ دلپدردی درشان کناں –

آئی ءَ گوشتگ کہ راجی سلامتی ءِ اجلاس ءَ آرمی چیف ءَ اے گپ ءِ پدّرائی کتگ کہ تاں ھما وھد ءَ علی وزیر پھلی نہ لوٹ ایت آ پھل کنگ نہ بیت اشی ءَ چہ پدّر انت کہ اد ءَ آمیدگس پہ نام انت ادے درسیں پیسلھاں آرمی کنت –