اھوالکارانی فونانی ھیک کنگ، پریس فریڈم ءِ ھلاپ اِنت – یو ایس اے جی ایم

امریکی میڈیا ادارہ یو ایس ایجنسی فار گلوبل میڈیا (یو ایس اے جی ایم) وتی شنگ کرتگیں درشان ءِ تہ ءَ گوشتگ کہ یک سد ءُ ھشتاد ھنچیں اھوالکار ھوار اَنت کہ آیانی تہ ءَ وائس آف امریکہ ءُ ریڈیو فری یورپ /ریڈیو لبرٹی ءِ اھوالکار ھم ھوار اَنت کہ لشکری تکاں یک نوکیں نگاہ ایرکنوکیں ایپ (سپائی ویئر) ءِ نشانگ کنگ بیتگ اَنت –

یو ایس اے جی ایم ءِ نیمگ ءَ شنگ بیتگیں درشانی ءِ رد ءَ ادارہ ءِ چیف ایگزیکٹو آفیسر کیلو چاؤ ءَ گوشتگ کہ اھوالکارانی گپ ءُ تراناں چیرکائی گوشدارگ ھچ رنگ ءَ سگگ نہ بیت اِنت ءُ آئی ءَ گُشتگ کہ اے ھلاپ ورزی الم ءَ دارگ بہ بیت اِنت ءُ اھوالکار پھریزگ المی اِنت ءُ المی کنگ بہ بیت اِنت –

میڈیا ادارھانی یک کنسورشیمے ءِ پَٹ ءُ پولے ءَ پد گوشگ بیتگ کہ سرکارانی واستا ناشرکارانی نام ءَ جوڑ کرتگیں اے سپا ویئر ‘پیگا سس پراجیکٹ ‘ اھوالکار، انسانی ھکانی پرکاریں باسک، کار ءُ باری مھلوک ءُ سرکاری آفیسرانی اسمارٹ فونزانی ھیک کنگ ءَ کارمرد کنگ بیتگ – اے سپائی ویئر یک اسرائیلی کمپنی این ایس او گروپے ءَ جوڑ کرتگ –

این ایس او گروپ اسرائیل ءَ کار کنوکیں یک سافٹ ویئر کمپنی ءِ کہ آئی ءِ بنیاد سال دوھزار ءُ دَہ ءَ ایر کنگ بیتگ –

اے کمپنی ءِ درستاں نامی ئیں سافٹ ویئر ’پیگاسس‘ اِنت کہ ایپل کمپنی ءِ آئی فون ءُ اینڈرائڈ فونزاں داں چیرکائی چاری گری کرت کنت –

کمپنی ءِ رد ءَ آیانی اے سپائی ویئر دنیا ءِ تہ ءَ چِل ملکاں شست سرکاری مردمانی کارمرد ءِ تہ ءَ اِنت – این ایس او کمپنی ءِ رد ءَ ھپت سد ءُ پنجاہ ءِ نزیک ءَ مردم کار کنگ ءَ اَنت ءُ گوستگیں سال ءَ اے کمپنی ءِ زرکاری سال ءِ تہ ءَ بیست ءُ چار کروڑ ڈالر ءَ چہ گیش بیتگ اَنت –

واشنگٹن ھالتاک ھم اے کنسورشیم ءِ بھر اِنت کہ آئی ءَ وتی رپورٹ ءِ تہ ءَ گُشتگ کہ ھما اھوالکار نشانگ کنگ بیتگ اَنت آیانی تہ ءَ لھتے ءِ سیادی وائس آف امریکہ ءَ اِنت –

اشاں ابید ھستیں جرم ءُ کرپشن ءِ بارو ءَ رپورٹنگ کنوکیں گروپ ‘آرگنائزر کرائم اینڈ کرپشن رپورٹنگ پراجیکٹ ‘ ءَ یک رپورٹے ءِ تہ ءَ گُشتگ کہ آذربائیجان ءِ سرکار ءَ اے سافٹ ویئر ءِ کمک ءَ سدانی کچ ءَ پرکاریں باسک ءُ اھوالکارانی چیرکائی گپ گوشداشتگ اَنت کہ چریشانی تہ ءَ ریڈیو فری پورپ / ریڈیو لبرٹی ءِ گوستگیں اھوالکار ھوار اَنت اشانی تہ ءَ آر ایف ای / آر ایل ءِ گوستگیں بیورو چیف خدیجہ اسماعلیہ ءُ دگہ یک مزن نامیں پَٹ ءُ پولکاریں اھوالکارے ءِ نام ھوار اِنت –

اے پَٹ ءُ پول ءَ پیرس ءَ برجاہ داشتگیں اھوالکاری ءِ بارو ءَ گیر ‘منافع بخش ‘ فاربیڈن اسٹوریز ‘ ءَ ایمنسٹی انٹرنیشنل ءِ سیکیورٹی لیب ءِ تکنیکی ءِ ھواری ءَ کمک کرتگ اَت –

یو ایس اے جی ایم ءِ سی ای او کیلو چاؤ ءَ گُشتگ کہ نوکیں ٹیکنالوجی اھوالکارانی کارانی تہ ءَ کمک بہ کنت ناکہ آیاں اشانی چاریگری کنگ ءُ ترسینگ ءَ بہ کنگ باید چوشیں کاراں آ مہ کنت اھوالکار ءُ دُزیں مردمانی پاشک کنگ ءَ کار کنگ ءَ اَنت –