بلوچستان ءَ جتا جتائیں جاھاں دگ ءِ وئیلاں شش مردم بیران، چُک ءُ زالبولاں ھوار چاردہ مردم زدگ

سر بیتگیں ھالانی رد ءَ بلوچستان ءِ دمگ ھزدار ءِ ھند وھیر ءَ مدرسہ الحرمین ءِ نزیک ءَ بس ءُ یک پک اپ گاڑی ءَ ٹکر وارتگ،چریشی ءَ سَگ مردم بیران ءُ چار زدگ بیتگ اَنت –

گیشیں ھالانی رد ءَ چہ شال ءَ دیم پہ کراچی ءَ رؤکیں العزیر کوچ چہ وڈھ ءَ ھزدار ءَ رؤکیں پک اپ گاڑی ءِ گون ءَ ٹکر اش وارتگ –

وئیل وھیر ءَ بیتگ کہ چریشی ءِ سبب ءَ سَے مردم عبسالواحد انیس الرحمان، جان مھمد جھمنند دراکھالہ بیران بیتگ اَنت ءُ چار زدگ بیتگ اَنت –

لیویز بنشون ءِ گوشگ اِنت وئیل پک اپ گاڑی ءِ ترکگ ءِ سبب ءَ پیش اتکگ ءُ لیویز کارمنداں لاش ءُ زدگ بیتگیں مردم ھزدار ءِ نادراہ جاہ ءَ سر کرتگ اَنت-

بلوچستان ءَ دگ ءِ وئیل نہ کُٹوکیں وئیلاں بازیں کچے ءَ ھمک روچ مردم بیران ءُ زدگ بیگ ءَ اَنت –

ھمے وڑ ءَ کلات ءِ دمگ بینچہ ءَ لیویز چوکی ءِ نزیک ءَ چہ شال ءَ دیم پہ کراچی ءَ رؤکیں ایکس مرک گاڑی دگ ءِ وئیل ءِ آماچ بیتگ ٹ

لیویز بنشون ءِ رد ءَ وئیل ترند روگ ءِ سبب ءَ پیش اتکگ کہ گاڑی ءِ ڈرائیور ءِ دست ءَ لگوشتگ ءُ پھل ءَ لگ اِتگ ءُ چریشی ءَ دو زالبولاں ھوار چار مردم زدگ بیتگ اَنت –

زدگ بیتگیں مردم لیویز ءَ چِست کرتگ ءُ کلات ءَ برتگ اَنت کہ اود ءَ یک زالبولے ءَ وتی ساہ داتگ اَنت ءُ آ دگہ مردمانی جاور نگیگ گوشگ بیتگ اَنت –

ھمے وڑ ءَ واشک ءَ صرف گاڑی ءُ پرپٹے ءَ ٹکر وارتگ ءُ چریشی ءَ پِت ءُ چُک بیران بیتگ اَنت –

وئیل واشک ءِ دمگ ناگ ءَ پیش اتکگ کہ اود ءَ صرف گاڑی ءُ پُرپٹے ءَ ٹکر وارتگ ءُ چریشی ءَ پِت ءُ چک بیران ءُ زالبول ءُ چکاں ھوار ھشت مردم زدگ بیتگ اَنت –

زدگ بیتگیں مردمانی تہ ءَ دو زالبول ءُ یک پنچ سالی ئیں زھگے ءِ جاور نگیگ گوشگ بیتگ اَنت ءُ درمانی ءَ شال ءَ برگ بیتگ اَنت –