وشیانی ائید کدی پما زر اَنت شال ءُ کراچی ءَ زھرشانی کنگ بیت اِنت – بیگواھیں مردمانی کھول

انسانی جاورانی تہ ءَ بیگواھی یک ازاب ناکیں دردے ءِ دروشم ءَ زانگ بیت اِنت اے گپ تچک اِنت ھمود ءَ انسانانی یک کسانیں چیزے بیگواہ بیت اِنت آئی ءِ زمین ءُ آسمان سر ءَ کپتوک بنت ھمے جاورھالاں بلوچستان وتی تہ ءَ مانپتاتگ ءُ بلوچستان ءَ یک ناوش ءَ دلسودیں درد کھولانی نیمگ ءَ گندگ ءَ کاینت اِنت –

شال ءُ کراچی ءَ وائس فار بلوچ مسنگ پرسنز ءِ چیردستی ءَ بیگواھیں مردمانی کھول ءِ نیمگ ءَ شال ءُ کراچی ءِ پریس کلب دیم ءَ زھرشانی ءُ روانک کشگ ءِ جار پرینگ بوتگ ءُ مھلوک ءَ چہ لوٹ کتگ کہ زھرشانی ءَ بھر بہ زور انت –

زھرشانی ءِ درگت ءَ پنچ سالاں چہ بیگواھیں بلوچ نودربر رھشون شبیر بلوچ ءِ گوھار سیما بلوچ ءَ چاگردی ترامجاہ ٹویٹر ءَ وتی شنگ کرتگیں تامر ءِ تہ ءَ گوشتگ کہ پنچ سالاں چہ ھما انت کہ منی برات بیگواہ انت ما نزانیں کہ ائید چی یے؟ ائید ءِ وشی چی انت ؟ مھلوک ائید ءِ تیاری ءَ مشگول انت بلے ما گیشتر گمزدگ بہ ایں کہ مئے دوستگیں مردم باریں کجام جاور ھالانی تہ ءَ انت – کجا انت کدی کائینت؟ کائینت اگاں ناں؟ ھمے ھیال کنیں چد ءُ گیشتر چہ وتی تہ ءَ پُرشیں – ما نزانیں کہ چی بکن ایں؟ کجا بُریں؟ مئے ائید کدی کراچی پریس کلب ءُ کدی شال پریس کلب دیم ءَ گوز انت ءُ کدی وتی کھول ءِ مردمانی ارسانی ساپ کنان ءَ گوز انت –

آھاں گوشتگ کہ ما اے ائید ءَ کراچی پریس کلب ءِ دیم ءَ سھب ءِ دہ ءَ بگر تاں بیگاہ ءِ شش ءَ زھرشانی کن ایں چہ مھلوک ءَ لوٹ کن ایں کہ وتی وشیاں چہ مار کمے وھد بہ کش ایت مئے ھمراہ داری ءَ بکن ایت مئے توار جوڑ بہ بنت تانکہ کر ءُ کوریں ھاکم مئے توار اش بہ کن انت –

ھمے درگت ءَ بلوچ نیشنل مومنٹ ءِ رھشون ڈاکٹر دین محمد بلوچ ءِ زھگ سمی دین بلوچ ءَ ٹویٹر ءَ وتی شنگ کرتگیں تامر ءِ تہ ءَ گوشتگ کہ انسان ءَ وھدے تھزیب ءِ دامن گپتگ گڑا درساں پیش کانود ءُ آمیدگس ءِ نزام آؤرتگ تانکہ ملزم کتکار سابت کنگ بہ بیت ءُ ھما کہ کتکار انت بس ھما شزا دیگ بہ بیت – بلے اے جمھوری ءُ اسلامی ریاست ءِ پاکستان ءَ بید کتکاریں مردمانی بگیری ءَ ناکہ تھنا آئی ءِ جند ءَ بکیں درسیں کھول ءَ شزا دیگ بیت انت – ایندگہ کانودانی وڑ ءَ اشی ءِ تہ ءَ ھم برابری نیست انت اے کانود ھم بس مئے وڑیں ایردستانی ھاتر ءَ جوڑ کرتگ – ھنچوش کہ ما شما کل سرپدیں یک روچے ءَ پد ائید انت اے روچ مزن مزنیں کتکاراں ریایت رس ایت اھاں وشیں ورگ دیگ بیت، آھانی کھولانی گوما دچار کپائین انت آھاں نوکیں گُد پوشاک برگ ءِ موکل دیگ بیت بلے یکے ما انت کہ اے وشی ءِ روچ ءَ وتی دوستیگیں مردمانی عکس دست انت ءُ آھانی وش ءُ سلامتی ھال پرسی ھاتر ءَ کراچی پریس کلب ءِ دیم ءَ نندانک جنگ ءَ ایں – اے روچ ءَ من درسیں انسانیت ءِ منوگران چہ لوٹ کنیں کہ وتی درشان ءُ پریس کانپرنس ءَ کنگ ءُ وتی آرامجاھاں در بیا انت مئے ھمراہ داری ءَ بکن انت –

ھمے وڑ دو نیم سال گیش متحدہ عرب امارات ءَ پاکستانی چیریں ادارھانی دست ءَ زورانسری آوار جنگ بوتگیں انسانی ھکانی گل ءِ باسک راشد ھسین ءِ بیگواھی درگت ءَ آئی مات ءَ ٹوئیٹر ءَ وتی شنگ کرتگیں تامر تہ ءَ گوشتگ کہ ما بازیں جھد ءُ کوشست کتگ بلے بید چہ نا امیتی دگہ ھچ نہ رس اتگ –