بید ء دوستیگیں مردماں شادمانی کرت نہ کن ایں، ائید ءِ روچ ءَ شال ءَ زھرشانی کن ایں -ماما قدیر
بلوچستان ءِ بنجاھی شھر شال ءَ وائس فار بلوچ مسنگ پرسنز ءِ زھرشانی برجاہ، زھرشانی ءَ چار ءُ ھزار سَے سد ءُ ھشتاد ءُ دو روچ سرجم بوتگ – مروچی اے این پی زیارت ءِ جنرل سیکٹری عبدالخالق دمڑ، صلاح الدین اچکزئی، چمن ءَ چہ قیوم کاکڑ ءَ بنجل ءِ تر ءُ تاب کرتگ ءُ بیگواھیں مردمانی کھولانی گوم ءَ دلپدردی درشان اتگ – ھمے وھد ءَ بیگواھیں نودربر رھشون زاکر مجید بلوچ ءِ مات ءَ ھم بنجل ءَ اتکگ ءُ زھرشانی نبشتہ کنائینتگ –
وی بی ایم پی ءِ رھشون ماما قدیر بلوچ ءَ اتکگیں مردمانی میان ءَ تران کنان ءَ گوشتگ کہ ائید عالم اسلام ءِ تہ ءَ ھنچیں دودے کہ درسیں مردم وتی زھری نارازی ءُ دلچلی ءَ ھلاس کن انت زند ءَ نوکیں وڑے ءَ بندات کناں یک ءِ دومی ءِ ارساں ساپ کن انت وشیانی تہ ءَ بدل کناں بلے اسلامی ریاست پاکستان ءَ گوستگیں بازیں سالاں بلوچ مات ءُ گوھاراں چہ اے وشی ءِ روچ پچ گپتگ بلوچ مات ءُ گوھار اے شادمانی روچ ءَ وتی دوستیگیں مردمانی ھاتر ءَ زھرشانی کن انت وتی دوستیگیں مردمانی یل کنگ ءِ لوٹ ءَ کن انت گوستگیں بازیں سالاں پاکستان ءِ زلم زوراکی ءِ سوب ءَ بلوچ اے دود ءِ دارگ ءَ چہ زبھر انت، بلوچ ھر وھد ءَ وتی دوستیگیں مردمانی راہ ءَ شوھاز انت –
ماما قدیر بلوچ ءِ گوشگ ات کہ ھر سال ءِ وڑ ءَ اے سال ءَ ھم ائید ءِ روچ ءَ بیست ءُ یک جولائی ءَ بیگواھیں مردمانی یل کنائینگ ءِ ھاتر ءَ زھرشانی کنگ بیت انت ءُ نیم بیل ءِ ادار دو ءَ شال پریس کلب ءِ دیم ءَ یک پُر ایمنیں زھرشانی کنگ بیت من درسیں پاٹی ءُ نودربر گل ءُ درسیں پڑاں گوں سیادی داروکیں مردماں چہ لوٹ کناں کہ بیا انت ءُ زھرشانی ھوار بہ بنت ایردستیں مات ءُ گوھارانی توار جوڑ بہ بنت –