بلوچستان ءَ ائید گوں سادگی ءَ گوازینگ بہ بیت – بلوچستان نیشنل پاٹی قائمقام صدر ملک عبدالولی کاکڑ

بلوچستان نیشنل پاٹی ءِ قائمقام صدر عبدالولی کاکڑ ءَ وتی شنگ کرتگیں درشانی ءَ گُشتگ ءُ دزبندی کرتگ کہ بی این پی ءِ باسک مزنیں ائید ءَ سادگی ءِ گون ءَ بہ گوازین اَنت –

آئی ءَ گُشتگ کہ بلوچستان ءِ مھلوک در پہ در، بیگواھی، امن ءُ ایمنی، اُستان ءَ مھلوک بازیں جیڑہ ءُ جنجالانی دیمپانی ءَ کنگ ءَ اَنت –

آئی ءَ گُشتگ کہ اُستان ءَ بے روزگاری، گرنھادی، بجلی، آپ ءُ زند ءِ دگہ پڑاں بندوکیں زلورتیاں زبھر اَنت ءُ چریشی ءَ مھلوک ءِ زند ءِ ناوشیں جاورانی دیمپان اَنت –

آئی ءَ گُشتگ کہ دومی نیمگ ءَ مئے ھمساھگیں ڈیھ اوگستان ءِ جاور ھنچش اَنت کہ اود ءَ ھونرچی بیگ ءَ اِنت ءُ اود ءَ مھلوک ءِ زگریں ھون رچگ ءَ اَنت ءُ چریشی ءَ بی این پی ءِ زمہ واری بیت کہ آ وتی باسکاں کڈن کنت ءُ اے گم ءُ سوکیگیں جاوراں ائید ءَ گوں رنج ءُ گماں گوازین اَنت –

آئی ءَ گُشتگ کہ اُستان ءُ اوگستان ءِ ناوشیں جاورھالاں ھما کچ ءَ پدر کن اَنت ءُ چریشی ءِ سر ءَ مارا سرپد بیگ لوٹ ایت کہ ھردوکیں دمگاں ھستیں ھونریچی ءِ دراھیں پھنات چارگ لوٹ اَنت ءُ ائید گوں سادگی ءَ دارگی اِنت-

آئی ءَ گُشتگ کہ بلوچستان ءَ ھر نیمگ ءَ مارا مردمانی آوار جنگ ءُ بیگواہ کنگ، کُشت ءُ کوش گندگ ءَ کاینت گڑا چوشیں جاور ائید ءِ وشیاں پجگر اَنت ءُ گمانی تہ ءَ ھوارین اَنت –

آئی ءَ گُشتگ کہ اے روچانی تہ ءَ عوامی نیشنل پاٹی ءِ باسج عبید اللہ کاسی بیگواہ اِنت ءُ ڈیھ ءِ کانوندار انگت ءَ آئی ءِ شوھازگ ءَ بے سوب بیتگ اَنت ءُ مئے ھمساھگیں ڈیھ اوگستان ءِ جاور ھال درستانی دیم ءَ اَنت ءُ کہ اود ءَ کجام ھساب ءَ ھونریچی بیگ ءَ اِنت ءُ چریشی ءِ اسر بلوچستان ءَ کپت کن اَنت –

آئی ءَ گُشتگ کہ بلوچستان نیشنل پاٹی بلوچ ءُ پشتوناں ھوار دگہ سیاسی باسکاں گوں کڈن کنت کہ آ زمہ وار بہ بنت ءُ جاورھالانی ٹپاسی ءِ ھواری ءَ ائید ءَ سادگی ءَ گوں بہ گوازین اَنت –