مشکہ ءَ پبلک لائبریری کمیٹی ءِ نیمگ ءَ کتاب فیسٹیول دارگ بیتگ

مشکہ بلوچستان ءِ ھما دمگانی تہ ءَ ھوار اِنت کہ اود ءَ جنگانی پژدر ءَ زند ءِ گوازینگ یک مزنیں جنجالے مشکہ ءِ بارو ءَ گوشگ بیت کہ اود ءَ بلوچستان ءِ جنگ زدگیں دمگانی تہ ءَ یک ھلکے زانگ بیت اِنت مشکہ ءِ بارو ءَ گوشگ بیت اِنت کہ اود ءَ گیشتریں وانگ جاہ بلوچستان ءِ دگہ جنگ آماچیں ھلکانی وڑ ءَ پوجی بنجلانی تہ ءَ مٹ کنگ بیتگ اَنت –

اے اولی رند اِنت کہ مشکہ ءِ وڑیں جاھے ءَ کتابی مُچیں ندارگ گندگ ءَ آیگ ءَ اَنت گمان چوشیں باز کم بیتگ اَنت بلے بلوچستان ءِ آ دگہ جاھانی وڑ ءَ ھم مشکہ ءِ سَے روچی کتابی فیسٹیولے برجم دارگ بیتگ –

کتابی فیسٹیول مشکہ پبلک لائبریری کمیٹی ءِ نیمگ ءَ برجم دارگ بیتگ کہ مروچی فیسٹیول ءِ دومی روچ بیتگ –

لائبریری کمیٹی ءِ گوشگ اِنت کہ کتابی فیسٹیول ءِ مول ءُ مراد ھمیش اِنت کہ دراھیں سرکاری وانگی ادارہ، جنک ءُ بچکیں نودربرانی دلگوش گوں کتابانی نیمگ ءَ ترینگ اِنت –

مشکہ ءَ برجم داشتگیں کتابی فیسٹیول ءَ بازیں کچے ءَ مردماں بھر زرتگ ءُ کتاب بھا گپتگ اَنت –

پبلک لائبریری کمیٹی ءِ گوشگ اِنت کہ مشکہ ءِ وڑیں دوریں ھندے ءَ پشکپتگیں جاھے ءَ کتابانی یکجاہ ءَ مُچ کنگ ءُ مھلوک ءِ کتابانی نیمگ ءَ ترینگ یک سوبمندی ءِ ما پہ وت ءَ زان ایں کہ اد ءَ بازیں وھداں چوشیں کتابی مُچی برجم دارگ نہ بیتگ اَنت –

آیاں گوشت کہ اے وڑ ءَ وانگی گامگیجانی سر ءَ دمگ ءِ زھگانی زھنانی ءَ گیش وانگ ءِ ریشگ جاہ جن اَنت ءُ آ ردیں راھانی روگ ءَ وت ءَ پھریز کُت کن اَنت ءُ وت ءَ وتی راج ءِ باندات ءَ جوانیں کرد پیلو کُرت کن اَنت –

آیاں گوشت کہ اے گپ الم ءَ پدر اِنت کہ دنیا ءِ چِست بیتگیں چیلنجزانی دیم ءَ بس وانگ ءَ ابید دگہ ھچ داشت کُت نہ کنت –

آیاں گوشت کہ بلوچ ورنا باید کتاب ءُ وانگ ءِ نیمگ ءَ وتی دلگوش ءَ بہ دے اَنت ءُ وانگی تکاں مھکم بہ کن اَنت –

آیاں گوشت کہ اے وڑیں کارانی واستا باید سرکاری تک گامگیج بہ زور اَنت بلے بد بھتی ءَ سرکار ءِ نیمگ ءَ ھچ چوشیں چیز نیست اَنت –

آیاں گوشت کہ بلوچستان ءِ ورنا وتی کمک ءَ وت بلوچستان ءَ کتاب ءِ چراگ ءَ برز کنان اَنت ءُ اگاں اے وڑیں گامگیج بہ بنت گڑا بلوچستان ءَ پشکپتگیں مردم زوت دیم ءَ اتک کن اَنت –