پسنی ءَ پوج ءِ دست ءَ بلوچی زبان ءِ ورنائیں شائر بیگواہ

ائید ءِ روچ ءَ بیگواھیں مردمانی کھولانی نیمگ ءَ کراچی ءُ شال ءَ زھرشانی کنگ ءِ جار پِرینتگ اَنت –

بلوچستان ءَ یک دراجیں مُدتے ءَ بیگواھیانی درچ یکشل ءَ برجاہ اَنت کہ آیانی تہ ءَ نودربر، شائر، وکیل، ڈاکٹر، ٹیچر، سیاسی باسک ءُ ھمک تکاں بندوکیں مردم گار ءُ بیگواہ کنوکانی دستاں نہ رک اِتگ اَنت –

ٹی بی پی پتر ھال ءَ سر بیتگیں ھالانی رد ءَ بلوچستان ءِ تیابدپی شھر گوادر ءَ ھواریں دمگ پسنی ببر شور ءَ ورڈ نمبر یک ءَ گوستگیں شپ ءَ پاکستانی پوج ءَ بیڑ برتگ ءُ اود ءَ داد بکش ء مھمد آوار جتگ ءُ گوں وت برتگ –

دمگی مردمانی رد ءَ آوار جنگ بیتگیں ورنا ٹیلر ءُ بلوچی زبان ءِ شائرے بیتگ –

بلوچستان ءَ آوار جنیانی درچ یک دھکے ءَ برجاہ اَنت ءُ گار ءُ بیگواھیں مردمانی واستا گوانک ءِ توار وائس فار بلوچ مسنگ پرسنز ءِ چیئرمین نسر اللہ بلوچ ءُ وائس چیئرمین ماما قدیر بلوچ ءِ سروکی ءَ زھرشانی درچ یکشل ءَ برجاہ اَنت –

دومی نیمگ ءَ بلوچستان ءَ گار ءُ بیگواہ بیتگیں مردمانی کھولانی نیمگ ءَ ھمک ائیدانی وڑ ءَ اے ائید ءَ ھم کراچی ءُ شال ءَ زھرشانی کنگ ءِ جار پِرینگ بیتگ اَنت –

بیگواھیں مردمانی گوشگ اِنت مزنیں ائید ءِ اولی روچ ءَ کراچی ءُ شال ءَ زھرشانی کنگ بیت اِنت ءُ چاگردی رسانکجاھاں سرپدی مھم کارمرد کنگ بیت اِنت –

وائس فار بلوچ مسنگ پرسنز ءِ وائس چیئرمین ماما قدیر بلوچ ءُ بیگواھیں مردمانی کھولانی نیمگ ءَ شنگ بیتگیں درشانی ءَ گُشتگ کہ ھمک سال ءِ ائیدانی وڑ ءَ اے سال ءِ ائید ءَ ھم بیگواھیں مردمانی کھول وتی دوستیں مردمانی یلو کنگ ءِ واستا زھرشانی کن اَنت –

ماما قدیر بلوچ ءِ گوشگ اَت کہ بیگواھیں مردمانی کھولانی واستا آیانی بیگواھیں مردماں ابید ائید گم ءُ رنجاں گوں آیانی سر ءَ کوھے ءِ گم ءَ کم نہ اِنت ءُ کھولانی گور ءَ زھرشانی ءَ ابید دگہ ھچ راہ ءُ در نیست اِنت –

کراچی ءِ پریس کلب ءِ دیم ءَ بیگواھیں مردمانی کھولاں نندانکی بنجل جنگ ءِ جار جتگ – کھولانی رد ءَ آ ائید ءِ اولی روچ ءَ کراچی پریس کلب ءِ دیم ءَ گوازین ایت ءُ زھرشانی کنت –

اے درگت ءَ ٹی بی پی ءِ گون ءخ سمی دین بلوچ ءَ رھوت کرتگ ءُ آئی ءَ گُشتگ کہ دوستگیں مردمانی جتائی ائید ءِ وشیاں زبھر بیتگ اَنت – آیاں گوشتگ کہ ھما روچ ءَ داں مئے مردم یل بنت ھما روچ ءَ مئے ائید بیت اِنت –

بیگواھیں ڈاکٹر دین مھمد بلوچ ءِ جنک سمی دین ءَ دیمتر ءَ گُشتگ کہ کراچی پریس کلب ءِ دیم ءَ زھرشانی ءِ مول ءُ مراد ھاکم ءُ دنیا ءَ وتی توار ءِ سر کنگ اِنت کہ بیگواھیں مردمانی کھول کجام درد ءَ گوازینگ ءَ اَنت نانکہ آ نیکراھی دود داشت کن اَنت ناکہ آیانی لوگاں وشی ءِ شاتمانی بنت ئِے –

سمی دین ءَ کراچی ءُ کش ءُ گوراں نندوکیں بیگواھیں بلوچانی کھولاں ھوار سندھی، پشتون،شیعایانی کھول ءُ ایکٍوسٹساں گوں بھر زیرگ ءِ دزبندی کرتگ –

ھمے وڑ ءَ ارب امارات ءُ پاکستان ءَ زورانسری بیگواھی ءِ آماچ بیتگیں انسانی ھکانی باسک راشد ھسین ءِ گوھار فریدہ بلوچ ءَ چاگردی رسانکجاھاں شنگ کرتگیں کلوہ ءِ تہ ءَ گوشتگ کہ راشد ءِ ھواری ءَ مئے وشی ءُ شاتمانی ھم بیگواہ بیتگ اَنت – ارب امارات ءَ مزنیں ائید ءِ روچ ءَ ارب امارات ءِ سرکار ءَ گوں دزبندی کن آں من ءَ انساپ بہ دنت – اے روچ ءَ چاگردی رسانکجاہ ءَ بھر زور ایت ءُ کمپئین ءَ دستاں ھوارینگ ءُ منی توار ءَ گوں ھمتوار بہ بہ ئِے-

اے درگت ءَ بلوچ سوشل میڈیا ایکٹوسٹساں خلیجی ڈیھ ءَ ائید ءِ روچ ءَ راشد ھسین بلوچ ءِ واستا #SaveRashidHussain ءُ پاکستان ءَ ائید ءِ روچ ءَ #SaveBalocbMissingPersons ٹوئٹر ءَ کارمرد کنگ بیت اِنت –

ھمے وڑ ءَ بلوچ نودربر رھشون زاکر مجید بلوچ ءِ مات ءَ گُشتگ کہ دگہ چُنت ائیداں گوں گریوگاں گوازینگ کپ ایت من ءَ –

بلوچستان ءَ زورانسری بیگواھی ءِ آماچ بیتگیں نودربر رھشون زاکر مجید ءِ مات بیگواھیں مردمانی واستا جھد کنوکیں گل وائس فار بلوچ مسنگ پرسنز ءِ بنجل ءَ اتکگ ءُ وتی زھگ ءِ یل کنگ ءِ ھواری ءَ ءُ ائید ءِ روچ بیگواھیں مردمانی واستا بیوکیں زھرشانی ءَ بھر زورگ ءِ دزبندی کرتگ –

زاکر مجید ءِ مات ءَ گُشتگ اَت کہ ھمک سالانی ائیدانی وڑ ءَ اے ائید ھم پہ مئے واستا گماں گوں پءداک اِنت ءُ ھمک ائید ءَ ما زھرشانی تہ ءَ گوزگ ءَ اِنت اے ائید ھم گوں زھرشانیان آیگ اِنت –

آئی ءَ شال ءَ نندوکیں دراھیں مردماں گوں دزبندی کرتگ ءُ زھرشانی ءَ بھر زیرگ ءِ واستا دزبندی کرتگ –