نبشتانک: ائید، تو پد ءَ پیداک ئے؟
نبشتہ کار: ھاتر اسلم
دی بلوچستان پوسٹ
من اِشکُرتگ تو ھمک سال ءِ وڑ ءَ پد ءَ پیداک ئے بلے ما ترا گوں کجام دل ءَ وش آتک بہ کن ایں؟ ترا پہ ما چے گوں اِنت؟ من زاناں تو مئے درداں پد ءَ گیش کنگ لوٹ ئے-
تو شری ءَ سرپد ئے مئے مات سالانی سال پہ وتی تاسُپیں بچانی ودار ءَ نِشتگ اَنت، مئے لاڈُکیں گھاراں وتی زند پہ وتی بندیگیں براتاں ببا داتگ اگاں کسے ماں زنداناں بندیگ نہ اِنت، گڑا آ پہ لاپ ءِ شوھاز ءَ ماں دراں ڈیھ اِنت.ما چہ درداں سَریچ ایں، مئے چم اَرساں کور اَنت، ما تھاروکیں زندے ءِ واھند ایں. ما ترا چو وش آتک کن ایں؟-
ما چوناھا گوں تو ھچ گِلگدار نہ ایں. ما گُل لوٹ ایں ترا پہ مُرادے وش آتک بہ کن ایں ما ھم لوٹ ایں کہ اے وشیں روچ ءَ پہ وشی بہ گوازین ایں چو یدگہ راجانی وڑ ءَ مارا تَر ءُ تَاب ھم وش بیت نوکیں پازوار ءِ پاد ءَ کنگ ءُ نوکیں گُد ءِ گور ءَ کنگ ءَ مئے دل اوں مان بیت بلے بژن سد بژن کہ مئے نسیب ءَ بدبھتی ءُ تنگدستی نبشتہ اِنت کہ ما گلامی ءِ آس ءَ سوچان ایں-
اے ھپتاد ءُ سیمی سال اِنت تو مئے درداں سال پہ سال گیشتر کنان ئے تئی آھگ ءِ روچ ءَ ھمک مردم بیچاڑ ءُ مُلور اِنت. کَماشاں بگر داں ورنایاں، زھگاں بگر داں زالبولاں درست گمیگ اَنت کسے وتی پت ءَ یات کنت کسے وتی برات ءَ گیر کار ایت ءُ کسے وتی سیاد ءُ وارسے-
ترا اگاں باور کنت، اے روچ ءَ کس ءَ را سما نہ بیت کہ اے وشی ءِ روچے کسی دل نہ لوٹ ایت گوں بچکنداں نوکیں گد گور ءَ بہ کنت پرچا کہ ھرکسی ھیال پہ وتی پت، برات، سیاد ءُ ازیزاں روت کہ باریں آ چے پیم اَنت؟-
تئی وشیں روچ پہ ما وش نہ اَنت تئی آھگ مارا گیشتر دردانی ءُ رنجانی باوٹ کنت اے وشیں ءُ شاتکامیں روچ بھ پہ وشی نہ گوز اَنت داں ما آجو نہ بہ ایں-
تئی آھگ ھما وھد ءَ وش اِنت کہ ما آجو بہ ایں ، وتی سرڈگار ءِ واھند وت بہ ایں گڑا ترا ما گوں دل ءِ جولانک ءَ وش آتک گوش ایں ءُ ترا بے دروریں مھر دے ایں-
اُمیت اِنت کہ منی گپّاں چہ بھ دلگران نہ بہ ئے پرچا کہ من راستی پَدر کرت ءُ وتی راج ءِ بیوسی ءُ لاچاری گوں تو زھرشان کرت کہ ما تئی آھگ ءَ سک باز وشں ایں بلے گلامی مارا تئی آھگ ءَ گیش درد دنت ءُ گریوگ ءَ پرما ایت-
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔