پشین: ھوارانی گوارگ ءَ لوگ ءِ چَھت ءِ کپتگ ءُ یکیں کھول ءِ پنچ مردم بیران

بلوچستان ءَ ھورانی گوارگ ءَ بلوچستان ءَ جانی ءُ مالی تاوانانی دیمپانی –

ٹی بی پی پتر ھال ءَ سر بیتگیں ھالانی رد ءَ پشین ءِ دمگ بوستان کلی ریگی ءَ یک لوگے ءِ چھت ءِ کپگ ءِ سبب ءَ یکیں کھول ءِ پنچ مردم بیران بیتگ اَنت –

لیویز بنشون ءِ رد ءَ لیویز ءَ ھال ءِ سر بیگ ءَ وت ءَ وئیل جاہ ءَ سر کرتگ ءُ اود ءَ لیویز ءِ کارمنداں بیران بیتگیں مردمانی لاش کَش اِتگ ءُ پشین ھسپتال ءَ سر کرتگ اَنت –

ھالانی تہ ءَ گوشگ بیتگ کہ مھمد داود نامیں مردمے ءِ ھِشتی ءِ لوگ اچانگ ءَ گوستگیں شپ ءَ لُمب اِتگ ءُ کپتگ –

بیران بیتگیں مردمانی تہ ءَ مھمد داود ءُ آئی ءِ چار زھگ کہ آیانی اُمر دوازدہ سال ءَ بہ گر داں سَے سال ءَ ھوار اَنت –

گوستگیں شپ ءَ ھمے دمگ ءَ ھور ءَ ھم گورتگ ءُ چریشی ءِ سبب ءَ لوگ ءَ مِس کش اِتگ ءُ لوگ لُمب اِتگ ءُ کپتگ –

گوستگیں روچ ءَ بلوچستان ءِ جتا جتائیں جاھاں بشی ھورانی گوارگ ءَ ھپت مردم بیران بیتگ اِت اَنت –

ھمے وڑ ءَ گوستگیں روچ ءَ تربت ءَ توپانی ھورانی گوارگ ءَ ھار ءَ گاڑی ءِ بڈینتگ ءُ چریشی ءَ چُک ءُ زالبولاں ھوار چار مردم بیران –

وئیل پیدارک ءِ دمگ کلگ جمک ءَ پیش اتکگ کہ اود ءَ گاڑی ءِ آپ ءَ برتگ ءُ چریشی ءَ زالبول ءُ چکاں ھوار چار مردم بیران بیتگ اِت اَنت –

لیویز بنشون ءِ رد ءَ گاڑی ءِ ڈرائیور شکیل گنگزار ءِ لاش گوستگیں شپ ءَ در کنگ بیتگ ءُ دگہ دو زدگ بیتگیں کس ھم درکنگ ءُ ھسپتال ءَ سر کنگ بیتگ اَنت –

دگہ چک ءُ زالبولاں ھوار سَے مردم آپ ءَ برتگ اَنت ءُ اشانی تہ ءَ چِل ءُ پنچ سالی زالبولے ءِ لاش سھب ءَ گندگ بیتگ –

بلوچستان ءَ ھورانی گوارگ ءَ بجلی ءِ نزام ھم گار ءُ بیگواہ اِنت ءُ مروچی دوبر ھم ھوراں گوارگ بندات کرتگ ءُ بلوچستان ءَ مولم شناسان داں مروچیگ ءَ ھورانی گوارگ گُشتگ اَت –

ھمے وڑ ءَ لسبیلہ ءَ ھم ھورانی گوارگ ءَ راہ ءُ در بند بیتگ اَنت –

گیشیں ھالانی رد ءَ لسبیلہ ءَ ھورانی گوارگ ءَ کوراں ھار کرتگ ءُ ھب گڈان وندر، دریجی کنراج، اوتھل، لاکھڑا ءُ بیلار ءَ گورتگیں ھوراں کوراں ھار کرتگ ءُ راہ ءُ در بند بیتگ اَنت ءُ بجلی ءِ نزام بیگواہ –