بلوچستان ءَ بشی رگامانی گوارگ ءَ دو مردم بیران، بازیں کچے ءَ مھلوک ءَ مالی تاوان

بلوچستان ءَ بشی ھورانی گوارگ بندات اَنت ءُ بازیں جاھاں ھوراں توپانی کرتگ ءُ مھلوک ءِ دیوال دور داتگ اَنت ءَ دو کس بیران بیتگ اَنت ءُ بلوچستان ءَ بیوکیں ھورانی گورگ ءَ بجلی ھم دمگاں با بروبری ءَ اَنت –

شال، زیارت، ھرنائی، لورالائی، کوھلو، بارکھان، ڈیرہ بگٹی، پیرکوہ، رکنی، ژوب، موسیٰ خیل، سبی، مستونگ، قلات، سوراب، ھاران، لسبیلہ، آواران ءَ گرند ءَ گریوکاں گوں ھور ءِ بیگ ءِ گمان کنگ بیتگ اَنت –

قلات ءُ کش ءُ گوری دمگاں گرند ءُ گروکاں بیوکیں ھور ءَ پد آپ لوگانی تہ ءَ پتریتگ، مھلوک ءَ وتی کمک ءَ وت لوگانی تہ ءَ آپ ءِ کشگ ءَ زدبند اَنت قلات ءِ گیشتر جھلگیں جاہ آپ ءَ کپتگ اَنت ءُ جوہ آپ ءَ سریچ اَنت –

سبی ءِ میتگ مل چانڈیہ ءَ توپانی ھوراں بند پروشتگ ءُ چریشی ءِ سبب ءَ لوھڑیں آپ بازار ءَ مانریتگ ءُ چریشی ءِ سبب ءَ بازیں لوگاں تاوان بیتگ –

دمگی مردماں انتزامیہ ءِ گون ءَ دزبندی کرتگ ءُ زوت ءَ زوت توپان ءِ رکگ ءِ واستا گامگیج زورگ ءِ کڈن کرتگ –

دالبندین: توپانی ھورانی سبب ءَ چاگی ءِ یک میتگے ءَ دیوالے ءِ کپگ ءَ دو مردم بیران ءُ یکے زدگ بیتگ –

اسسٹنٹ کمشنر جاوید ڈومکی ءَ گوشتگ کہ چاگی ءَ گیش مردمانی تاوان بیگ ءِ گمان کنگ بیگ ءَ اِنت ءُ چاگی ءَ گیش مردمانی بیرانی ءِ ھال پیداک اَنت –

اسسٹنٹ کمشنر جاوید ڈومکی ءَ گشتگ کہ بیران بیتگیں مردمانی لاش پرنس فھد نادراہ جاہ ءَ برگ بیتگ اَنت –

ھمے وڑ ءَ ھزدار ءَ یکشلیں ھورانی گوارگ ءَ بازیں جاھاں بجلی نیست اَنت – چیف کیسکو ءَ سدکی داتگ ءُ گوشتگ کہ ھزدار، نال ءُ وڈھ ءَ بجلی ءِ گھتری ءِ واستا گامگیج زورگ بیت اِنت –

ھمے رنگ ءَ ڈیرہ بگٹی ءَ زمیندارانی ڈگار پُر بیتگ اَنت – بلوچستان ءَ یکشلیں ھور بازیں جاھاں بیگ ءَ اَنت ءُ پنجگور ءَ ھوار مکران ءِ بازیں جاھاں ھم سبک سبک ءَ ھوراں گورتگ –

گوستگیں روچ ءَ کیچ کور ءَ ھم اتکگیں آپ ءَ یک ھژدہ سالی ئیں ورنایے بڈینتگ ءُ کُشتگ – مولم شناساں بلوچستان ءِ مولم ءِ گیشتریں ھورانی گوارگ ءِ گمان پدر کرتگ اَنت –