بلوچستان ءَ جتا جتائیں وئیلاں زھگے ءَ ھوار سَے مردم بیران دہ زدگ، جونے دست کپتگ

سربوتگیں ھالانی رِد ءَ بلوچستان ءِ دمگ ڈیرہ مراد جمالی، سوراب، دکی، اوستہ محمد، چمن، تمبو ءَ تیرگواری ءُ دگہ وئیلاں دو مردم بیران بیتگ اَنت ءُ دہ زدگ بوتگ انت وھدیکہ خان کوٹ ءَ یک مردمے ءِ جون دست کپتگ –

گیشیں ھالانی رِد ءَ ڈیرہ مراد جمالی نسیرآباد ءَ ناشناسیں پرپٹ سوارانی تیرگواری ءَ یک مردمے بیران بوتگ – وئیل خان کوٹ ءَ گوٹ شاہن خان ءِ نزیک ءَ دیم ءَ اتکگ کہ نشناسیں پرپٹ سواراں اھسان نامیں مردمے تیر اماچ کُتگ کُشتگ – وئیل پیشی زاتی جیڑہ سوب گوشگ بوھگ انت –

دمگی پولیس ءَ وت ءَ وئیل جاہ ءَ سر کتگ کشندہ تچگ ءُ رؤگ ءَ سوبمند بوتگ انت پولیس ءَ جون چست کتگ ءُ نادراہ جاہ ءَ سر کتگ اود ءَ اژدری چار ٹپاس ءَ پد کھول ءِ ھوالگ ءَ داتگ –

ھمے وڑ سوراب ءَ ناشناسیں مردمانی تیر گواری ءَ یک مردمے بیران بوتگ – وئیل سوراب ءَ چار راہ ءِ سر ءَ دیم ءَ اتکگ کہ ناشناسیں مردماں ھاجی خان پندرانی تیرانی آماچ کتگ کُشتگ بیران بوتگیں مردم کلات ءِ جھمنند انت –

ھمے وڑ دکی ءَ اناگتی تیر لگگ ءِ سوب ءَ کسان سالیں گونڈلے بیران بوتگ –

وئیل دکی ءِ دمگ کلی ملک علی مھمد ءَ ناسر ءَ گِس ءِ تہ ءَ دیم ءَ اتکگ – نادراھجاہ بنشون ءِ رِد ءَ گِس ءِ تہ ءَ پسٹل ءِ ساپ کنگے میان ءَ توپک ءَ آس بُرتگ ءُ پنچ سالی گونڈل مدثر خان ء محمد زئی بیران بوتگ، اژدری چار ءُ ٹپاس پد گونڈل ءِ جون کھول ءِ ھوالگ ءَ دئیگ بوتگ –

ھمے وڈ اوستہ محمد ءَ دو ٹکی ٹولیانی میان ءَ جنگ چوپ ءَ تیرگواری ءَ پنچ مردم ٹپی بوتگ انت وئیل گوستگیں روچ ءَ رند ءُ بلیدئی ٹکانی میان ءَ پیشی زاتی دژمنی ءِ سوب ءَ دیم ءَ اتکگ، تیرگواری ءَ چہ پنچ مردم ٹپی بوتگ انت –

دگہ وئیلے چمن ءَ بوتگ کہ گیس سلینڈر ءِ ترکگ ءَ سُتکگ ءُ زدگ بوتگ انت –

ھالانی رِد ءَ چمن ءَ گِس ءَ سیلنڈر ءِ ترکگ ءِ سوب ءَ یکیں کھول ءِ پنچ مردم ستکگ ءُ زدگ بوتگ انت وئیل ھما ٹیم ءَ بوتگ کہ زالبول ءِ گِس ءِ تہ ءَ ورگ ءِ ھڈ کنگ ءَ بوتگ کہ گیس ترکیتگ تراکگے سوب ءَ آئی ءِ نزیکیں دگہ پنچ مردم ستکگ ءُ زدگ بوتگ انت – زدگ بوتگیں مردمانی تہ ءَ چُک ءُ زالبول ءُ یک مردین ءِ ھوار انت- زدگ بوتگیں مردم ھما دمان ءَ نادراھجاہ ءَ سر کنگ بوتگ انت –

دومی نیمگ ءَ تمبو خان کوٹ ءَ اللہ داد ڈپ ءِ نزیکیں کور ءَ یک مردم ءِ جون ءِ دست کپتگ جون نادراھجاہ ءَ سر کنگ بوتگ اودا آئی ءِ پجار گلام علی کٹوہر ءِ نام ءَ چہ بوتگ اے درگت ءَ گیشیں پٹ پول برجاہ انت –

زانگ بہ بیت گوستگیں روچ ءَ بلوچستان ءِ تیاب دپی دمگ گوادر ءَ ھم یک مردم ءِ جون ءِ دست کپتگ، جون ڈی جی اے نادراھجاہ ءَ سرکنگ بوتگ اودا آئی پجار عبدالغفار ء لال بکش ءِ نام ءَ چہ بوتگ –