روکپتی بلوچستان ءَ کرونا نادراھی گیش بیست مردم بیران

سر بیتگیں ھالانی رد ءَ روکپتی بلوچستان ءَ کرونا نادراھی گیش بیان اِنت ءُ تنی وھدی بازیں کچے ءَ ھمے نادراھی ءَ مرگ ءِ آماچ بیتگ اَنت –

گوستگیں روچ ءَ داں مروچیگ ءَ کرونا نادراھی ءَ سیستان و بلوچستان ءَ بیست مردم بیران بیتگ اَنت ءُ پانزدہ سد ءُ دَہ نوکیں کیس رپورٹ کنگ بیتگ اَنت –

سیستان و بلوچستان ءَ کرونا نادراھی ءِ سبب ءَ لس کار ءُ باری مھلوک ءَ ھوار شھری جنجالانی دیمپان اَنت ءُ نادراہ جاھاں آسراتی ءِ نہ بوگ ءِ بروبری ءَ اِنت –

کرونا نادراھی ءِ بارو ءَ اُستان ءِ راجمان پتر ءِ باسک ءُ ایرانشھر ءِ نمائندگ عبدالناصر درخشان ءَ راجمان پتر ءَ تران کنان ءَ گوشتگ کہ سیستان و بلوچستان ءِ جاھاں اے مزنیں نادراھی ءِ گر ءُ دار ءَ ھچ آسراتی نیست اَنت –

آئی ءِ گوشگ اِنت کہ اے دردناکیں گپے کہ وتی ھمساھگیں اُستان ءِ ھچ کمک بیگ ءَ نہ اِنت اد ءَ ناں شریں اکسیجن ھست نانکہ ونٹیلیٹر ھست –

آئی ءِ گوشگ اِنت کہ سیستان و بلوچستان ءَ نادراہ بس تھتانی سر ءَ وپتگ ءُ ھنچیں نادراہ ھست اَنت آ ھمے پَر پروکی ءَ جنان ءُ مرگ ءَ اَنت –