سمّی ءِ ارس بچکند بنت
شائر: نور
دی بلوچستان پوسٹ
پُل ءُ وشبوه ءِ گستائی ءِ گپ کئے ءَ باور اِنت
روچ چہ روژنائی ءَ سستگ وتی
ماهکانی چہ ماه ءَ گِسر
ما ءُ تو در پہ در
شپ تهاری چو کِیلّ ءَ اِنت ما دیستگ اَت
گُلزمین ءَ منی
اِے سپر کہ مساپر پِلکّان اِتنت، ارس ءُ هونان اتنت،
تیر سوهان اِتنت مرد جُنزان اِتنت
درچک ءُ دارانی گلّہ وتی جاگہ ءَ
مردمانی دل ءِ روکیں آس ءَ بہ توسیت نہ گنداں کَسے
وائے کم دزرسی وائے مئے بے وسی
گاریں مردانی شوهاز گْران اِنت بلے
مهلبو دل مہ جن
وهد پِر گردیت هرچی هما پیم بیت
زلم ءُ زورانی شپ کِنزیت آ دیم بیت
گاریں کِشکانی بندیں مساپر اوں واتر کن اَنت
سبز ءُ میتاپ بوستان ءِ آپ بند بنت
سمّی ءِ اَرس بچکند بنت