تمپ ءَ گوستگیں شپ ءَ دُزاں زالبولانی سر ءَ توپک داشتگ ءُ سھر ءُ دگہ گران نھادی مڈی دز اِتگ اَنت

بلوچستان ءِ دمگ کیچ ءِ ھنکین تمپ ءَ گوستگیں شپ ءَ ناشناسیں دزاں اُرش کرتگ ءُ زالبولانی سھر، دگہ گران گھادی مڈی دز اِتگ ءُ برتگ اَنت –

چہ تمپ ءَ سر بیتگیں ھالانی رد ءَ گوشگ بیتگ کہ گوستگیں شپ ءَ دازن چیری بازار ءَ دزاں اُرش کرتگ ءُ وابیں زالبولانی سر ءَ توپک داشتگ ءُ آیانی سھر، زر ءُ مباھل دز اِتگ ءُ برتگ اَنت –

ھالانی تہ ءَ گوشگ بیتگ کہ دُزی ءِ وھد ءَ زالبول ھم دُزاں لَٹ ءُ کُٹ کرتگ اَنت ءُ اشی ءَ ابید دازن ءِ سری بازار ءَ ھم یک لوگے ءَ اُرش کنگ ءِ جھد کرتگ بلے میتگ ءِ مھلوک ءَ بست کرتگ ءُ دُز تتکگ اَنت –

زانگ بہ بیت گوستگیں سال ءَ دُزاں دازن ءَ یک لوگے ءَ بیڑ برتگ ءُ اود ءَ کلثوم ء سعید ءِ گُٹ بے دردی ءَ زھگانی دیم ءَ بُر اِتگ ءُ آئی ءِ گوش ءِ سھر کش اِتگ ءُ برتگ اَنت –

ھمے رنگ ءَ تربت ڈنک ءَ ھم اود ءَ دزاں یک لوگے ءَ بیڑ برتگ اَت ءُ اود ءَ ملکناز نامیں زالبولے ءَ گھگیری کرتگ ءُ چریشی ءَ دُزاں ملکناز کُشتگ اَت ءُ آئی ءِ کسان سالیں زھگ برمش زدگ کرتگ اَت –

چرے وئیلانی بیگ ءَ پد بلوچستان ءَ سیاسی ءُ سول سوسائٹی ءَ بندوکیں مھلوک برانز گپتگ اَت ءُ بلوچستان ءَ ھوار کراچی ءُ دگہ شھراں زھرشانی کنگ بیتگ اَت –

بلوچستان ءَ سیاسی پاٹیانی گوشگ اِنت کہ دُزی ءُ ڈنگیاں ریاست ءِ نیمگ ءَ جوڑ کرتگیں توپک برداریں گل کہ“ڈیتھ اسکواڈ” ءِ نام ءَ زانگ بیت اِنت ھوار اِنت –

بلوچستان ءِ سیاسی پاٹیانی گوشگ اِنت کہ ڈیتھ اسکواڈ بلوچستان ءَ سیاسی باسک ءُ دگہ تکاں بندوکیں مردمانی کُشگ ءُ جنگ ءُ آوار جنگاں ھوار دُزی ءُ ڈنگیاں دزمان جن اِنت –

سیاسی پاٹیانی گوشگ اِنت کہ بلوچستان ءَ ریاست ءَ اے گل بے لگام کرتگ ءُ یل کرتگ کہ بلوچستان ءَ بلوچ مھلوک ءِ کُشت ءُ کوش ءُ دگہ ناوشیں وئیلاں بہ کنت –