کولواہ ءُ مند ءَ پاکستانی پوج ءِ سر ءَ اُرش، اُرشانی زمّہ واری بی ایل ایپ ءَ منّ اِتگ

مراھستان ءُ شیراز ءَ پاکستانی پوج ءِ سر ءَ اُرش کتگ ءُ جانی ءُ مالی تاوان داتگ – میجر گوھرام بلوچ

سربوتگیں ھالانی رِد ءَ گوستگیں روچ ءَ ناشناسیں سلاہ بندیں مردماں کولواہ ءِ دمگ مراھستان ءَ پاکستانی پوج ءِ کاروان ءِ سر ءَ اُرش کتگ ، دمگی مردمانی رد ءَ اُرش ءَ پاکستانی پوج ءَ جانی ءُ مالی تاوان رس اتگ اُرشکار درآیگ ءُ روگ ءَ سوبین بوتگ اَنت –

دومی نیمگ ءَ کیچ ءِ دمگ مند ءَ پاکستانی پوج ءِ سر ءَ پد ماں پد دو اُرش کنگ بوتگ اَنت – اُرش مند ءِ کوھی دمگ شیراز سلات کوہ ءَ ٹٹ جنوکیں پھازگی پوجیانی ءُ ادار ءَ پد نوک جوڑ بؤکیں پانگس ءِ سر ءَ کنگ بوتگ اُرش ءِ آسر ءَ پاکستانی پوج ءَ جانی ءُ مالی تاوان ءِ دیمپانی بوتگ –

بلوچ آجوئی لوٹوکیں سلاہ بندیں گل بلوچستان لبریشن فرنٹ ءِ جارکش میجر گوھرام بلوچ ءَ رسانکدراں وتی شنگ کرتگیں درشان ءِ تہ ءَ اے اُرشانی زمّہ واری منّ اِتگ ءُ گوشتگ کہ مئے سرمچاراں کیچ ءِ دمگ کولواہ مراھستان ءَ پاکستانی پوج ءِ دو گاڑی ءُ چار پرپٹانی کاروان ءِ سر ءَ نوکیں ءُ وتکاریں سلاھانی گوم ءَ اُرش کتگ اُرش ءِ آسر ءَ پاکستانی پوج ءِ سےَ کارمند مرتگ ءُ بازین ئِے ٹپی بوتگ اَنت-
جارکش ءَ گوشتگ کہ اے کاروان مراھستان ءَ پوجی لشکرکشی ءَ پد وتی بنجل ءِ نیمگ ءَ رؤگ ءَ بوتگ- آئی گوشتگ کہ لشکر کشی ءِ میان پاکستانی پوج ءِ کارمنداں چُک ءُ زالبولانی سر ءَ زوراکی ھم کتگ-

جارکش میجر گوھرام بلوچ ءَ وتی درشان ءِ تہ ءَ دیمترءَ گوشتگ کہ کیچ ءِ دمگ مند ءَ سیمسر ءِ نزیک ءَ شیراز ءَ سلات کوہ ءَ ٹٹ جنوکانی پھازداری ءَ ساڑی ئیں پوجی کارمندانی سر ءَ اُرش کتگ – آئی ءَ گوشتگ کہ ادار ءَ پد ھمے دمگ ءَ نوک جوڑ بوؤکیں پوجی پانگس ءِ یک دگہ اُرش ءِ کُتگ، اے اُرشاں پاکستانی پوج ءَ بازیں کچّے ءَ جانی ءُ مالی تاوان رس اِتگ-

جارکش ءَ گڈسر ءَ گوشتگ کہ ایردستیں بلوچستان ءِ آجوئی ءَ تاں زورگیریں پوج ءِ سر ءَ مئے اُرش برجاہ مان انت –