کیچ ءَ پاکستانی پوج ءِ سر ءَ اُرش، اُرشانی زمّہ واری بی ایل ایپ ءَ منّ اِتگ اَنت

تربت ءُ مند ءَ پاکستانی پوج ءِ سر ءَ اُرش کتگ ءُ پنچ پوجی کارمند کُشتگ – میجر گوھرام

سربوتگیں ھالانی رِد ءَ ناشناسیں سلاہ بندیں مردماں مروچی مند ءِ دمگ شیراز ءَ ٹٹ جنوکیں پوجی کارمندانی سر ءَ اُرش کُتگ – اُرش ءَ پاکستانی پوج ءَ جانی ءُ مالی ءُ تاوانانی دیمپانی بوتگ –

ھمے وڑ بیست ءُ چار جون ءَ ناشناسیں مردماں کیچ ءِ بنجاھی شھر تربت ءَ پارک ھوٹل ءِ نزیک ءَ برجاھیں پاکستانی پوج ءِ پانگس ءِ سر ءَ دستی بمب اُرش ءِ کُتگ- اے اُرش ءَ ھم پاکستانی پوج ءَ جانی تاوان ءِ دیمپانی بوتگ –

دومی نیمگ ءَ بلوچ آجوئی لوٹوکیں سلاہ بندیں گل بلوچستان لبریشن پرنٹ ءِ جارکش میجر گوھرام بلوچ ءَ رسانکدراں وتی شنگ کرتگیں درشان ءِ تہ ءَ ھردو اُرشانی زمّہ واری منّ اِتگ گوشتگ کہ مئے سرمچاراں مروچی سھب ھشت ءُ نیم ءَ کیچ ءَ مند ءِ دمگ شیراز ءَ سلاہ کوہ ھند ءَ سیمسراں ٹٹ جنوکیں پھازگی پوجی کارمندانی سر ءَ وتکاریں سلاھاں گوں اُرش کُتگ –

میجر گوھرام بلوچ ءَ گوشتگ کہ سھب ءَ ماھلہ سرمچاراں پیسر ءَ چہ سنگر بستگ ءُ پھازگی ءِ ھاتر ءَ آؤکیں سَے کارمندانی سر ءَ تیرگواری کُتگ کُشتگ اَنت –

آئی ءَ گوشتگ کہ آھانی کمک ءَ آؤکیں کارمندانی سر ءَ ھم اُرش کُتگ یک دگہ کارمند ءَ کُشتگ، نزیکیں پانگِس ءَ چہ سرمچارانی دارگ ءُ نشانگ کنگ ءِ جھد کنگ بوتگ بلے آ سرمچارانی دارگ ءَ بے سوب بوتگ اَنت اودے ھستیں مشینری ھم ارش ءَ چہ تاوان داتگ اَنت-

میجرگوھرام بلوچ ءَ دیمتر ءَ گوشتگ کہ بیست ءُ چار جون ءَ سرمچاراں پارک ہوٹل ءِ نزیک ءَ برجاھیں پوجی پانگِس دستی بمب اُرش ءَ نشانگ جوڈ کرتگ، اُرش ءِ آسر ءَ یک پوجی کارمندے مُرتگ ءُ دو ٹپی بوتگ انت –

میجر گوھرام بلوچ ءَ گوشتگ کہ مئے اُرش بلوچستان ءِ آجوئی تاں برجاہ مان انت –